Síijen tu kaajil Santo Domingo, República Dominicana. Teen u tʼuupil le kantúul paalal anchajoʼ. In taataʼob kaʼacheʼ u kʼáat u líiʼsoʼonoʼob ichil utsul máakoʼob utiaʼal ka xiʼiktoʼon utsil. Kanpʼéel jaʼab u bin in síijileʼ in taataʼobeʼ tu kʼaj óoltoʼob jujuntúul misioneroʼob. Tumen maʼalob tu yiloʼob bix u vestirkubaʼob yéetel bix u modosoʼobeʼ, in taataʼobeʼ tu chʼaʼtukloʼob k-bin tu religionoʼob: La Iglesia de Jesucristo de los Santos de los Últimos Días.

Jatsʼuts in wilik kaʼach in táakpajal tiʼ le baʼaxoʼob ku beetaʼal teʼ iglesia mormonoʼ yéetel maʼalob in wilik kaʼach le baʼaxoʼob ku kaʼanskoʼob yoʼolal le familiaʼoboʼ bey xan yoʼolal le kuxtal unaj u bisik máakoʼ. Jach kiʼimak in wóol kaʼach yéetel in religión, le oʼolal tin chʼaʼtuklaj in beetik in misioneroil.

Le yaanten 18 jaʼaboʼobeʼ in taataʼobeʼ tu chʼaʼtukloʼob k-bin kajtal tu luʼumil Estados Unidos utiaʼal ka páajchajak u maas kaʼantal in xook. Óoliʼ junjaʼab tiʼ leloʼ, in tío yéetel in tía j-jaajkunajoʼob tiʼ Jéeobaeʼ taal u xíimbaltoʼonoʼob tu kaajil Florida, ka tu invitartoʼonoʼob tiʼ junpʼéel asamblea tuʼux ku tsoʼolol baʼax ku yaʼalik le Bibliaoʼ. Jaʼakʼ in wóol ka tin wilaj tuláakloʼob kaxtik le tekstoʼoboʼ yéetel ku tsʼíibtikoʼob le baʼax ku kankoʼoboʼ. Le oʼolal tin kʼáataj lápiz yéetel juʼuneʼ ka joʼopʼ in beetik xan beyoʼ.

Ka tsʼoʼok le asambleaoʼ, in tío yéetel in tíaeʼ, tumen tu yojéeltoʼob in kʼáat in beetinba misioneroileʼ, tu yaʼaloʼobten jeʼel u yáantkenoʼob in maas kan le baʼax ku yaʼalik le Bibliaoʼ. Teneʼ jach maʼalob tin wuʼuyil, tumen teʼ kʼiinoʼoboʼ maas in kʼaj óol U Libroil Mormón ke le Bibliaoʼ.

Cada ken tsikbalnakoʼon tiʼ teléfono yoʼolal le Bibliaoʼ, in tío yéetel in tíaeʼ ku líiʼskoʼob in wóol utiaʼal ka in ket le baʼax kin creertik yéetel  le baʼax ku kaʼansik le Bibliaoʼ. U kʼáatoʼob kaʼach ka in naʼat u jaajil tin juunal.

Yaʼab tiʼ u kaʼansaj le mormonoʼob kin creertik kaʼachoʼ, baʼaleʼ maʼ in wojel wa letiʼe ku kaʼansik le Bibliaoʼ. In tíaeʼ tu túuxtajten le revista ¡Despertad!, 8 tiʼ noviembre tiʼ 1995, beetaʼan tumen u j-jaajkunajoʼob Jéeobaoʼ. Teʼeloʼ ku tsoʼolol jujunpʼéel baʼaxoʼob ku creertik le mormonoʼoboʼ. Jaʼakʼ in wóol le ka tin wileʼ yaʼab tiʼ u kaʼansaj le mormonoʼob maʼ in wojel kaʼachoʼ. Tin xakʼaltaj u kúuchil le mormonoʼob teʼ Internetoʼ, ka tin wilaj jach jaaj le baʼax ku yaʼalik le revistaoʼ. Bey xan tin wilil le ka binen in xíimbalt le museo mormón yaan tu kaajil Utahoʼ.

Kaʼacheʼ kin tuklikeʼ U Libroil Mormoneʼ jach bey jeʼex le Bibliaoʼ. Baʼaleʼ le ka káaj in xakʼalxoktik le Bibliaoʼ, tin tsʼáaj cuentaeʼ le baʼax ku kaʼansik le mormonoʼoboʼ ku bin tu contra le baʼax ku yaʼalik le Bibliaoʼ.

Chiʼichnaken xan tumen le mormonoʼoboʼ ku kaʼanskoʼob unaj u nojbaʼalkúuntkuba máak yoʼolal le luʼum tuʼux síijoʼ. Ku yaʼalikoʼobeʼ u jardinil Edén bineʼ tiaʼan kaʼach tu kaajil Jackson County, Missouri, Estados Unidos. U nuuktakil le iglesia xanoʼ ku yaʼalikoʼobeʼ «ken kʼuchuk u kʼiinil u gobernar u Reino Dioseʼ, u bandera Estados Unidos kun wiltaʼal tumen iikʼ tak tu maas kaʼanlil le astaoʼ», tumen letiʼ bin kun gobernar yóokʼol tuláakal le Luʼumoʼ.

Kin tuklik túuneʼ baʼax wal kun úuchul tiʼ le u maasil luʼumoʼoboʼ, jeʼex le tuʼux síijenoʼ. Junpʼéel áakʼabeʼ, tʼaʼanen tiʼ teléfono tumen juntúul xiʼipal mormón táan u kaʼansaʼal utiaʼal u beetik u misioneroil. Ichil le tsikbaloʼ tin kʼáatajtiʼ baʼax jeʼel u beetik wa ka líikʼik baʼateʼel u luʼumil tu contra uláakʼ luʼumoʼobeʼ. Jaʼakʼ in wóol le ka tu yaʼalajteneʼ jeʼel u yóotik baʼateʼel tu contraʼobeʼ kex wa u yéet mormoniloʼob. Jach tuukulnajen tiʼ le baʼaxoʼob kin creertikoʼ ka tʼaanajen xan yéetel u nuuktakil le iglesia mormonoʼ. Tu yaʼaloʼobteneʼ jujunpʼíitil ken in naʼate.

Jach lúub in wóoleʼ, ka joʼopʼ in tuklik jach baʼax oʼolal in kʼáat in beetinba misioneroil. Tin tsʼáaj cuentaeʼ chéen tumen in kʼáat in wáant le máakoʼoboʼ. Kin tsʼíiboltik xan le tsiikil ku yeʼesaʼal tiʼ le misioneroʼoboʼ. Baʼaleʼ u jaajileʼ óoliʼ mix baʼal in wojel kaʼach yoʼolal Dios. Kex yaʼab u téenel in xokmaj le Bibliaoʼ mix juntéen tin wuʼuyaj wa jach kʼaʼanaʼan ichil in kuxtal. Maʼ in wojel kaʼach baʼax u tukultmaj Dios u beetik yéetel le Luʼum wa yéetel wíinikoʼ.

Ikil in xokik le Biblia yéetel le j-Jaajkunajoʼoboʼ, tsʼoʼok in kanik bix u kʼaabaʼ Dios, baʼax ku yúuchul tiʼ máak ken kíimik, bix ken u béeykuntil Jesús le baʼax u tukultmaj u beetik Diosoʼ yéetel yaʼab uláakʼ baʼaloʼob. Tsʼoʼok in kanik yaʼab baʼaxoʼob tiʼ le Bibliaoʼ yéetel jach kiʼimak in wóol in tsikbaltik tiʼ uláakʼ máakoʼob. Kaʼacheʼ chéen in wojel yaan Dios, baʼaleʼ bejlaʼeʼ ku páajtal in tsikbal tu yéetel tumen letiʼeʼ in maas maʼalob amigo. Tu kʼiinil 12 tiʼ julio tiʼ 2004, okjaʼanajen utiaʼal in beetkinba j-Jaajkunajil. Seis meses tiʼ leloʼ ka tin maas tsʼáaj in wóol in maas meyajtik Dios.

Cinco jaʼaboʼob meyajnajen Brooklyn, Nueva York, Estados Unidos, tuʼux ku nuʼuktaʼal u meyaj u j-jaajkunajoʼob Jéeoba. Jach kiʼimak in wóol úuchik in wáantaj utiaʼal u beetaʼal Bibliaʼob, libroʼob yéetel uláakʼ jóoʼsaʼaniloʼob ku yáantik u millonesil máakoʼob tuláakal yóokʼol kaab. Bejlaʼeʼ láayliʼ jach kiʼimak in wóol in wáantik uláakʼ máakoʼob utiaʼal ka kaanbalnakoʼob tiʼ Dioseʼ.