JUNTÚUL sukuʼuneʼ náatsʼ tu yiknal Kingsleyeʼ ka tu péetskʼabtaj, Kingsley túuneʼ tu káajsaj u xookil u discurso. Lelaʼ letiʼe yáax juntéen ka tu máansaj u discurso teʼ múuchʼuliloʼ. Kingsleyeʼ tu láaj aʼalaj cada junpʼéel tʼaan ku chíikpajal teʼ versiculoʼob tocarnaj tiʼoʼ. Chéen baʼaleʼ kex u xookil le Biblia táan kaʼach u máansikoʼ maʼ táan kaʼach u paktik u Bibliaiʼ. ¿Baʼaxten?

Kingsleyeʼ, kajaʼan kaʼach Sri Lanka, letiʼeʼ chʼóop, maʼ jach sáasil u xikiniʼ tsʼoʼoleʼ tiʼ silla de ruedas yaan. ¿Bix tu kʼaj óoltil Jéeoba yéetel bix úuchik u káajal u máan teʼ Escuelaoʼ? Paʼatik in tsikbaltikteʼex.

Ka tin kʼaj óoltaj Kingsleyeʼ jaʼakʼ in wóol tumen tin wilaj jach taak kaʼach u kaanbal tiʼ le Bibliaoʼ. Letiʼeʼ tsʼoʼok kaʼach u xook yéetel uláakʼ sukuʼunoʼob yéetel yaan kaʼach tiʼ ich braille le libro El conocimiento que lleva a vida eterna. * Chíikaʼan xan tsʼoʼok kaʼach u sen xokik tumen tsʼoʼok u xuʼupul. Teneʼ tin kʼáatajtiʼ wa u kʼáat ka in tsʼáa xook tiʼ, ka tu yaʼalajteneʼ u kʼáat, chéen baʼaleʼ yaan kaʼapʼéel baʼal talamkúunt k-xook.

Yáaxeʼ Kingsleyeʼ kajaʼan kaʼach teʼ tuʼux ku kanáantaʼal le máaxoʼob chʼijaʼanoʼob yéetel maʼ tu  páajtal u xíimbaloʼoboʼ. Teʼeloʼ jach yaʼab máakoʼob yaan kaʼachiʼ, le oʼolaleʼ istikyaj u yuʼubiken. Como jach kʼaʼam in tʼaan utiaʼal u yuʼubikeneʼ, tuláakal le máaxoʼob yanoʼob teʼeloʼ ku yuʼubikoʼob bix in tsʼáaik xook tiʼ cada semana.

U kaʼapʼéeleʼ, Kingsleyeʼ maʼ tu páajtal kaʼach u jach xook yéetel istikyaj u pʼáatal tu pool baʼax ku kanik. Utiaʼal u maas kaanbaleʼ, jach ku líiʼskuba yéetel le baʼax ken k-xokoʼ. Antes tiʼ in bineʼ ku xokik le baʼax ken k-iloʼ, ku kaxtik le tekstoʼob tu Biblia ich brailleoʼ tsʼoʼoleʼ ku jach tuklik bix ken u núukil le kʼáatchiʼoboʼ. Le baʼax ku beetik kaʼachaʼ le áant utiaʼal u maas kaanbal. Utiaʼal k-xookeʼ ku kutal kaʼach teʼ alfombraoʼ, ku lotik u yook, tsʼoʼoleʼ ken u kan wa baʼaxeʼ tumen jach kiʼimak u yóoleʼ ku kʼaʼam aʼalik. Maʼ xáanchaj ka joʼopʼok k-xook kaʼatéen tiʼ junpʼéel semanaiʼ tsʼoʼoleʼ kaʼapʼéel hora kin xook tu yéetel.

Kingsleyeʼ jach taak kaʼach u bin teʼ muchʼtáambaloʼoboʼ, chéen baʼaleʼ ku talamtal tiʼ tumen kʼaʼabéet u yáantaʼal kutal tu silla de ruedas, tsʼoʼoleʼ utiaʼal u bin teʼ muchʼtáambaloʼ kʼaʼabéet u bisaʼal kaʼach tak u silla de ruedas tiʼ coche. Teʼ múuchʼuliloʼ yaʼab sukuʼunoʼob tu turnartubaʼob utiaʼal u yáantkoʼob, lelaʼ tu yiloʼob bey junpʼéel nojoch privilegioeʼ. Ken xiʼik teʼ muchʼtáambaloʼoboʼ ku kutal kaʼach tu yiknal junpʼéel bocina, jach ku chʼenxikintik le muchʼtáambaloʼ yéetel ku comentar.

Ka tsʼoʼok u máan tiempo táan u xookeʼ Kingsleyeʼ tu yaʼaleʼ taak u máansik u discurso teʼ Escuelaoʼ. Kaʼapʼéel semanaʼob antes tiʼ u máansik u yáax discursooʼ tin kʼáatajtiʼ wa tsʼoʼok u ensayartik. Letiʼeʼ tu yaʼalajten: «Tsʼoʼoki sukuʼun, treinta u téenel in xoke». Teneʼ tin felicitartaj úuchik u ensayartik ka tin waʼalajtiʼ wa jeʼel u páajtal in wuʼuyik u xookeʼ. Letiʼeʼ tu jeʼekʼabtaj le Biblia ich brailleoʼ, tu tsʼáaj u dedos yóokʼol, ka joʼopʼ u xokik. Pero tin wileʼ maʼ táan u máansik u dedos yóokʼol le letras jeʼex suukil u máansik ken xooknakoʼ. ¿Baʼaxten? ¡Tumen tsʼoʼok kaʼach u kanik de memoriail tuláakal le versiculoʼob tocarnajtiʼoʼ!

Ka tin wilaj lelaʼ joʼopʼ u yáalal u jaʼil in wich yéetel maʼ tu páajtal in creertik baʼax táan in wilik kaʼachi. Tin kʼáataj tiʼ Kingsley bix úuchik u kanik de memoriail wa chéen treinta u téenel tu xokaj. Letiʼeʼ tu núukajten: «Maʼ sukuʼun, tin ensayartaj treinta u téenel sáamsamal». Kingsleyeʼ óoliʼ junpʼéel mes kulaj yóokʼol u alfombra utiaʼal u babal xokik le versiculoʼob hasta ka tu kanaj de memoriailoʼ.

Ka túun kʼuch u kʼiinil u discursooʼ. Le ka tsʼoʼok u xookeʼ tuláakal le sukuʼunoʼob papaxkʼabnajoʼoboʼ yéetel yanoʼobeʼ okʼolnajoʼob ka tu yiloʼob bix tu tsʼáajil u yóol. Juntúul kiik xuʼul u máansik u discursoʼob tumen jach ku nerviosataleʼ, tu kaʼa kʼáataj ka tsʼaʼabak u discursoʼob. ¿Baʼaxten? Letiʼeʼ tu yaʼalaj: ¡Wa Kingsley ku páajtal u beetkeʼ, jeʼel xan in páajtaleʼ!».

Ka máan tres años joʼopʼok u xookeʼ, tu kʼiinil 6 tiʼ septiembre tiʼ 2008, Kingsleyeʼ okjaʼanaj utiaʼal u yeʼesik tsʼoʼok u kʼubik u kuxtal tiʼ Jéeoba. Letiʼeʼ chúukpaj u yóol u meyajt Jéeoba tak ka kíim tu kʼiinil 13 tiʼ mayo tiʼ 2014. Tsʼoʼoleʼ jach ku creertik kaʼach yaan u seguer u meyajtik Jéeoba teʼ Paraísooʼ yéetel mix bikʼin kun kaʼa kʼojaʼantal (Isa. 35:5, 6). (Tsikbaltaʼab tumen Paul McManus.)