In maamaeʼ 17 años yaantiʼ ka síijen 1960. Táant u pʼaʼatal kaʼach tumen in taataeʼ. Teʼ kajaʼanoʼon kaʼach yiknal in abueloʼob tu kaajil Burg, junpʼéel u chan kaajil República Democrática Alemana (wa Alemania oriental). Teʼ kaajoʼ yaʼab máakoʼob maʼatech u creertikoʼob Dios; in láakʼtsiloʼobeʼ beyoʼoboʼ. K-tiaʼaleʼ minaʼan Dios kaʼachi.

In abueloeʼ jach ku máansik tiempo tin wéetel. Teneʼ jach uts tin tʼaan xan u tsʼáaik baʼal in beete. Yaan horaeʼ ku yaʼalikten ka naʼakaken in chʼak u kʼab le cheʼoboʼ. Como paaleneʼ báaxal in tiaʼal. Jach kiʼimak in wóol kaʼachi.

Siete años yaanten ka úuch junpʼéel baʼal jach kʼaas. Táant in káajsik in xook segundo gradoeʼ. Junpʼéel kʼiin táan in suut tin wotocheʼ, naʼaken tiʼ junpʼéel torre de alta tensión. Tsʼoʼok in naʼakal 8 metros teʼ torreoʼ ka tu jatsʼen le corrienteoʼ. Ka aajeneʼ hospital yanen pero maʼ tin wuʼuyik in kʼaboʼob. Luʼsaʼab tu kaʼapʼéelal tumen jach eeli yéetel jeʼel kaʼach u envenenartik in kʼiʼikʼeleʼ. Le baʼax úuchtenoʼ jach tu lúuʼsaj u yóol in maama yéetel in abueloʼob. Como paaleneʼ maʼ tin naʼatik bukaʼaj yajil ken in máansil in kuxtal bey minaʼan in kʼaboʼoboʼ.

Ka jóokʼen hospitaleʼ joʼopʼ in kaʼa bin xook. Le paalaloʼoboʼ káaj u yaʼalikoʼobten baʼal, u lelenchʼintikenoʼob yéetel u chʼinkenoʼob. Maʼ tu páajtal in defenderkinba. Jach yaj tin wuʼuyil úuchik u pʼaʼastikenoʼob. Tu tsʼookeʼ bisaʼaben tu escuelail Birkenwerder, tuʼux ku kaʼansaʼal paalaloʼob discapacitadoʼob. Bey náach yanil le escuelaoʼ in maama yéetel in abueloʼobeʼ maʼatech u bin u yilenoʼob. Chéen tiʼ vacaciones kin wilkoʼob. Diez años tin beetaj teʼeloʼ.

Yaʼab baʼax tin kanaj in beet yéetel in wookoʼob. Máans ta tuukul bukaʼaj talmil u janal máak yéetel u yook. Tin kanaj in mach in cuchara yéetel in wook, bey xan in jaʼik in koj. ¡Kensa bix tin kanil le baʼaloʼobaʼ! Tak le ken tsikbalnakeneʼ kin péeksik in wook utiaʼal u maas naʼataʼal baʼax kin waʼalik. In wookoʼobeʼ suunaj in kʼaboʼob.

Káaj u yutstal tin wich ciencia ficción. Yaan kʼiineʼ kin máansik tin tuukul ku yantal in kʼaboʼob de  robot utiaʼal in beetik jeʼel baʼaxakeʼ. Le ka tin cumplirtaj 14 añoseʼ káaj in tsʼuʼutsʼ chamal. Ken in tsʼuʼutsʼ chamaleʼ kin wuʼuyik maʼalob yanilen yéetel beyen jeʼex u maasil máakoʼoboʼ. Kin tuklik kaʼachi: «Si tak teen ku páajtal in tsʼuʼutsʼ chamal. Tsʼuʼutsʼ chamaleʼ utiaʼal nukuch máakoʼob. ¡Baʼax in kʼáajtiʼ wa minaʼan in kʼaboʼob!».

Mantatsʼ kin kaxtik baʼal in beete yéetel maʼatech in pʼáatal tin juunal. Táakpajen ichil junmúuchʼ táankelmoʼob u kʼáatoʼob ka múul meyajnak tuláakal máak. Le organizacionaʼ kʼaj óolaʼan bey Juventud Libre Alemana; ku yáantaʼal tumen le gobiernooʼ. Teʼeloʼ kʼuchen in beet in secretarioiliʼ. Tsʼoʼoleʼ ooken in kan kʼaay yéetel poecía; kin táakpajal xan tiʼ deporteʼob utiaʼal discapacitados. Ka tsʼoʼok in xook yéetel in beetik in practicaseʼ káaj in meyaj tiʼ junpʼéel empresa yaan teʼ kaajoʼ. Jeʼex u bin in nojochtaleʼ bey úuchik xan u maas meyajten prótesis tumen ku beetik in wuʼuyikinba chúukaʼanen.

Junpʼéel kʼiin táan in páaʼtik tren utiaʼal in bin meyajeʼ náatsʼ juntúul máak tin wiknal. Tu yaʼalajteneʼ jeʼel u kaʼa tsʼaʼabal in kʼaboʼob tumen Dioseʼ. Maʼ tin naʼataj baʼaxten tu yaʼalajten leloʼ. U jaajileʼ in kʼáat ka yanak in kʼaboʼob tu kaʼatéen pero in wojel maʼ tu béeytal. Tsʼoʼoleʼ mix tech in creertik wa yaan Dios. Desde teʼ kʼiin jeʼeloʼ tin chʼaʼtuklaj maʼ in kaʼa tʼaan tu yéetel.

Ka máan kʼiineʼ juntúul x-chʼúupal in wéet meyajeʼ tu invitarten in xíimbalt u láakʼtsiloʼob. Le táan k-ukʼik cafeoʼ, u taataʼobeʼ káaj u tʼaanoʼob yoʼolal Jéeoba. Bey bin u kʼaabaʼ Diosoʼ. Yáax in wuʼuyik kaʼach leloʼ (Salmo 83:18). Ka máan tin tuukul: «Minaʼan Dios, chéen kunel u tsʼaʼabal u kʼaabaʼ. Yaan in weʼesiktiʼob chéen tusaʼanoʼob». In tsʼaamileʼ jach jaaj baʼax kin creertik, le oʼolal tin waʼalajtiʼob jeʼel k-kaʼa tsikbal yoʼolal le Bibliaoʼ. Tu tsʼookeʼ maʼ béeychaj in weʼesiktiʼob minaʼan Diosiʼ.

Jeʼex binik k-xakʼaltik u profecíailoʼob le Bibliaoʼ bey xuʼulik in creertik minaʼan Diosoʼ. Tin wileʼ tsʼoʼok u béeychajal yaʼab tiʼ le baʼaxoʼob u yaʼalmaj Diosoʼ, kex máan u cientosil wa tak u milesil años u yaʼale. Juntéenjeakeʼ t-xokaj Mateo 24, Lucas 21 yéetel Kaʼapʼéel tiʼ Timoteo 3, ka t-ketaj yéetel le baʼaxoʼob ku yúuchul bejlaʼoʼ. Jeʼex juntúul doctor ku naʼatik baʼax kʼojaʼanil yaan tiʼ juntúul máak ken u yojéelt baʼaxoʼob ku yúuchultiʼeʼ, le jejeláas profecíaʼob tin xokaj teʼ Bibliaoʼ tu yáanten in wil kuxaʼanoʼon «tu tsʼook kʼiinoʼob». * Hasta pʼáat jaajap in chiʼ ka tin wojéeltaj, tumen tu táan in wich táan u béeytal le profecíaʼoboʼ.

Tin tsʼáaj cuenta jach letiʼ u jaajiloʼ. Káaj in orar tiʼ Jéeoba Dios, tsʼoʼoleʼ kex diez años káajak in tsʼuʼutsʼ chamaleʼ tin pʼataj. Seguernaj in xokik le Biblia kex junpʼéel añooʼ, ka tsʼaʼab in wokjaʼ 27 tiʼ  abril tiʼ 1986 tiʼ junpʼéel bañera. Lelaʼ taʼakumbail beetaʼabik tumen prohibirtaʼan kaʼach u j-jaajkunajoʼob Jéeoba tu lakʼinil Alemania.

Tu yoʼolal leloʼ chéen tu yotoch le sukuʼunoʼob k-muchʼikbaoʼ yéetel maʼ yaʼab sukuʼunoʼob in kʼaj óol kaʼachi. Baʼaleʼ juntéenjeakeʼ chaʼab in bin tu chikʼinil Alemania tuʼux maʼ prohibirtaʼan le j-Jaajkunajoʼoboʼ. Hasta ka béeychaj in bin tiʼ junpʼéel asamblea tuʼux tin wilaj u milesil sukuʼunoʼob yéetel kiikoʼob. ¡Maʼatech u tuʼubulten le kʼiin jeʼeloʼ!

Ka niʼik u pakʼil Berlineʼ xuʼul xan u prohibirtaʼal k-religión. ¡Kʼuch u kʼiinil in meyajtik Jéeoba tu táan tuláakal máak! Chéen baʼaleʼ kex in kʼáat in maas tsʼáa in wóol kʼaʼaytajeʼ saajken tiʼ le máaxoʼob maʼ in kʼaj óoloʼoboʼ. Kin wuʼuyik bey chan paalen tu tséeloʼobeʼ. Pero tu añoil 1992, anchaj junpʼéel mes tin chúukbesaj 60 horaʼob teʼ kʼaʼaytajoʼ, ka túun tin chʼaʼtuklaj in seguertik tuláakʼ mesoʼoboʼ. Tres años tin beetaj beyoʼ.

Jach kin kʼaʼajsik le tekstoaʼ: «¿Máax ku lúubul u muukʼ wa maʼ tu lúubul in muukʼ xan tu yéetel?» (2 Corintoiloʼob 11:29). Kex minaʼan in kʼabeʼ yaan in pool yéetel in chiʼ utiaʼal in wáantik uláakʼ máakoʼob. Tsʼoʼoleʼ jeʼex yanilenaʼ ku páajtal in naʼatik bix u yuʼubikuba le máaxoʼob yaan baʼax ku bineltik tiʼ u wíinkliloʼoboʼ. In wojel bix u yaatal tu yóol máak ken u yóot u beet baʼax maʼ tu páajtal u beetik. Le oʼolal kin wilik in wáantik le máaxoʼob bey u yuʼubikubaʼoboʼ. Jach kiʼimak in wóol in wáantik uláakʼ máakoʼob.

U jaajileʼ yaan horaeʼ ku chan lúubul in wóol, pero natural in tsʼíiboltik junpʼéel wíinklil chúukaʼan. Kex yaʼab baʼax ku páajtal in beetik tin juunaleʼ yaʼab tiempo ku bisikten. Letiʼe teksto líiʼsik in wóol sáamsamalaʼ: «Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ» (Filiposiloʼob 4:13). Jéeobaeʼ sáamsamal ku tsʼáaikten u muukʼil utiaʼal in beetik baʼaxoʼob suuk u beetik máakoʼ. In wojleʼ Jéeobaeʼ mix bikʼin ken u pʼaten, le oʼolaleʼ mix bikʼin xan kun xuʼulul in meyajtik.

Jéeobaeʼ tsʼoʼok u síikten junpʼéel familia, le baʼax luʼsaʼabten tin paaliloʼ. Yáaxeʼ yaan in x-kiʼichpan atan, u kʼaabaʼeʼ Elke. Letiʼeʼ jach uts yéetel u yaabiltmen. Tsʼoʼoleʼ yaan u millonesil in sukuʼunoʼob yéetel in kiikoʼob: le j-Jaajkunajoʼob yaan tiʼ tuláakal yóokʼol kaaboʼ.

Jach ku líiʼsik in wóol in tuukul tiʼ le Paraíso u yaʼalmaj Diosoʼ; teʼeloʼ yaan u «túumbenkuntik tuláakal baʼal», tak in kʼaboʼob (Apocalipsis 21:5). Utiaʼal in naʼatik bix ken u beet Dios lelaʼ, kin xokik baʼaxoʼob tu beetaj Jesús ka taal way Luʼumeʼ. Tu séebaʼanil úuchik u tsʼakik le discapacitadoʼoboʼ, tak le máax kúulxotʼtaʼab u xikinoʼ (Mateo 12:13; Lucas 22:50, 51). Le baʼax u yaʼalmaj Jéeoba yéetel le milagroʼob u beetmaj Jesusoʼ ku yeʼesikteneʼ maʼ tun xáantal ken kaʼa chúukpajak in wíinklil.

Kex u jaajileʼ le baʼax maas kʼaʼanaʼanoʼ letiʼe úuchik in kʼaj óoltik Jéeoba Diosoʼ. Bejlaʼeʼ kin wilik bey in Taataeʼ yéetel bey in amigoeʼ, tumen ku líiʼsik in wóol yéetel ku tsʼáaikten muukʼ. Kin wuʼuyikinba jeʼex David ka tu tsʼíibtaj: «Yuumtsileʼ letiʼ tsʼáaikten muukʼ [...]. Letiʼ túuneʼ ka tu yáantajen. In puksiʼikʼaleʼ kiʼimak u yóol» (Salmo 28:7). Le oʼolaleʼ kex minaʼan mix juntsʼíit in kʼabeʼ in machminba tiʼ u jaajil yéetel mix bikʼin ken in chaʼe.