Wa yaan tiʼ juntúul k-amigo junpʼéel kʼojaʼanil jeʼex le ansiedad wa le depresiónoʼ yaan horaeʼ maʼ k-ojel bix jeʼel k-áantikeʼ. Pero u jaajileʼ yaʼab baʼaloʼob jeʼel u páajtal k-beetik tu yoʼolaleʼ.

«Cada juntúuleʼ kʼaʼabéet u séeb uʼuyik baʼax ku yaʼalaʼaltiʼ» (SANTIAGO 1:19).

Junpʼéel bix jeʼel a wáantik a amigoeʼ letiʼe kéen a chʼenxikint le kéen taakak u tsikbaltiktech wa baʼaxoʼ. Yaan horaeʼ maʼ tsaaj a núukiktiʼ mix baʼaliʼ chéen kʼaʼabéet a wuʼuyik kéen u yaʼaltech bix u yuʼubikuba yéetel a weʼesiktiʼ a yaabiltmaj. Ilawil a naʼatik bix u yuʼubikuba yéetel maʼ a criticartik, kanáant baʼax ka waʼaliktiʼ. Wa ku yaʼaliktech wa baʼax beetik u yaatal a wóoleʼ kʼaʼajseʼ maʼ u yóoliliʼ u yaʼalikiʼ (Job 6:2, 3).

«Tʼaaneneʼex yéetel le máaxoʼob jach lubaʼan u yóoloʼoboʼ, líiʼseʼex u yóoloʼob» (1 TESALONICENSES 5:14).

Maʼ xaaneʼ a amigoeʼ jeʼel u lúubul u yóol yéetel u yuʼubik mix baʼal u biilaleʼ. Teʼ súutukoʼob beyaʼ yaan horaeʼ maʼ tu kaxtik máak baʼax u yaʼaleʼ pero tak chéen yéetel ka a waʼaltiʼ a yaabiltmaj yéetel taak a wáantikeʼ jeʼel a líiʼsik u yóoleʼ.

«Juntúul jach maʼalob amigoeʼ ku yeʼesik yaabilaj tiʼ tuláakal súutukil» (PROVERBIOS 17:17).

Wa yaan juntúul a amigo lubaʼan u yóoleʼ tu lugar a tuklik a wojel bix jeʼel a wáantikeʼ maas maʼalob ka a kʼáattiʼ. Wa mix letiʼ u yojel bix jeʼel a wáantikeʼ jeʼel u páajtal a ofrecerkaba utiaʼal  a jóokʼol tu yéetel wa tuʼuxeʼ. Jeʼel xan u páajtal a bin a man jujunpʼéel baʼaloʼob kʼaʼabéettiʼeʼ wa a wáantik u limpiart u yotocheʼ (Gálatas 6:2).

«Eʼeseʼex paciencia» (1 TESALONICENSES 5:14).

Yaan kʼiineʼ a amigoeʼ maʼ kun taaktal u tsikbaltiktech baʼax ku yúuchultiʼ. Le oʼolaleʼ maʼalob ka a waʼaltiʼ jeʼel a chʼenxikintik kéen taakak u tsikbaleʼ. Tu yoʼolal xan u kʼojaʼanileʼ maʼ xaaneʼ jeʼel u yaʼaliktech wa baʼax jeʼel u beetik u yaatal a wóoleʼ. Yaan hora xaneʼ kex tsʼoʼok a tsʼáaikabaʼex de acuerdo utiaʼal a bineʼex wa tuʼuxeʼ jeʼel u yaʼaliktech maʼ tun bineʼ. Wa yaan horaeʼ kex mix baʼal a beetmajtiʼeʼ jeʼel u kʼuuxil ta wéeteleʼ. Wa ku beetiktech lelaʼ ilawil a weʼesik paciencia yéetel a naʼatik bix u yuʼubikuba (Proverbios 18:24).

«Teneʼ kin waʼalik tiʼ in amiga maʼ ten in pʼat tu juunal. Kex yaan hora maʼ tu páajtal in solucionartik baʼax ku yúuchultiʼeʼ jach kin chʼenxikintik baʼax ku yaʼalikten. Yaan horaeʼ chéen letiʼe baʼax kʼaʼabéet u beetik máakoʼ» (Farrah, a u amigaeʼ yaan ansiedad tiʼ, depresión yéetel trastorno alimentario).

«Juntúul tiʼ in amigaʼobeʼ jach uts tin wéetel yéetel mantatsʼ ku animarken. Juntéenjeakeʼ tu invitarten utiaʼal ka xiʼiken janal tu yotoch. Teʼeloʼ como en confianza yaniloʼoneʼ tin waʼalajtiʼ baʼax ku yúuchulten, ka tsʼoʼokeʼ maas maʼalob tin wuʼuyilinba» (Ha-eun, yaan depresión tiʼ).

«Jach ku kʼaʼabéettal u yeʼesik máak paciencia. Yaan horaeʼ le baʼaxoʼob ku beetik in watanoʼ ku beetik u yaatal in wóol. Chéen baʼaleʼ kin kʼaʼajsikeʼ maʼ u yóoliliʼeʼ baʼaxeʼ letiʼe kʼojaʼanil yaantiʼoʼ. Leloʼ ku yáantken utiaʼal maʼ in kʼuuxil yéetel utiaʼal in weʼesik yaabilaj tiʼ» (Jacob, u yataneʼ yaan depresión tiʼ).

«In wataneʼ jach ku yáantken yéetel ku líiʼsik in wóol. Le kéen jach lúubuk in wóol yoʼolal le ansiedadoʼ maʼ taak in beetik mix baʼaliʼ. Letiʼ túuneʼ maʼatech u jach kʼáatikten ka in beet junpʼéel baʼal u yojel maʼ taak in beetik teʼ súutukoʼ. Minaʼan uláakʼ máax jeʼex in wataneʼ tumen jach ku yáantken yéetel ku yeʼesikten u yutsil» (Enrico, yaan ansiedad tiʼ).