XOOK 01
¿Jeʼel wa u yáantkech le Biblia ichil a kuxtaloʼ?
Yaʼab máakeʼ taak u yojéeltik baʼaxten kuxaʼan máak, baʼaxten ku sufrir, baʼaxten ku kíimil yéetel baʼax kun úuchul ichil junpʼíit kʼiin. Pero yaan uláakʼ baʼaxoʼob chiʼichnakkúuntik máak jeʼex u tsʼáaik baʼax kʼaʼabéet tiʼ u familia yéetel u yantal kiʼimak óolal tiʼ. Yaʼab máak tsʼoʼok u yilkeʼ le baʼaloʼobaʼ ku tsoʼolol teʼ Bibliaoʼ yéetel ku yáantik máak ichil u kuxtal. Techeʼ bix a wilik, ¿jeʼel wa xan u yáantkech le Bibliaoʼ?
1. ¿Baʼax preguntailoʼob ku núukik le Bibliaoʼ?
Le Bibliaoʼ ku núukik le preguntaʼobaʼ: ¿bix káajik le kuxtaloʼ? ¿Baʼaxten kuxaʼanoʼon? ¿Baʼaxten ku sufrir le utsul máakoʼoboʼ? ¿Yaan wa baʼax ku pʼáatal kuxaʼanil tiʼ máak kéen kíimik? Wa tuláakal máak u kʼáat ka yanak jeetsʼelileʼ, ¿baʼaxten jach yaʼab guerraʼob yaan? ¿Bix kun tsʼoʼokol le yóokʼol kaabaʼ? U millonesil máakoʼob tsʼoʼok u kaxtikoʼob u núukil u preguntaʼob teʼ Bibliaoʼ yéetel kiʼimak u yóoloʼob yéetel le baʼax tsʼoʼok u kankoʼoboʼ.
2. ¿Jeʼel wa u yáantkech le Biblia utiaʼal ka yanaktech kiʼimak óolaloʼ?
Le Bibliaoʼ ku tsʼáaik maʼalob consejoʼob. Ku yaʼalik baʼax unaj u beetik le máaxoʼob yanoʼob ichil le familia utiaʼal ka yanak kiʼimak óolal tiʼoboʼ, ku yaʼalik bix jeʼel u disfrutartik máak le meyaj ku beetkoʼ yéetel baʼax unaj u beetik utiaʼal maʼ u sen estresar. Jeʼex kun bin a xokik le publicaciónaʼ yaan a kanik baʼax ku yaʼalik le Bibliaoʼ yéetel uláakʼ baʼaloʼob. Yaan xan a tsʼáaik cuentaeʼ le Bibliaoʼ jeʼel u yáantkecheʼ tumen tuláakal «le baʼax ku yaʼalikoʼ maʼalob utiaʼal kaʼansaj» (2 Timoteo 3:16).
Le publicaciónaʼ maʼ tu jeelintik le Bibliaoʼ, baʼaxeʼ yaan u yáantkech utiaʼal a maas kʼaj óoltik tubeel. K-invitarkech utiaʼal ka a xok tuláakal le tekstoʼob ku chíikpajal ichil le xookoʼoboʼ, tsʼoʼoleʼ ilawil baʼax yaan yil yéetel le baʼax ka kanikoʼ.
UTIAʼAL A MAAS NAʼATIK
Koʼox ilik bix tsʼoʼok u yáantaʼal yaʼab máakoʼob tumen le Bibliaoʼ, bix jeʼel u jatsʼutstal k-ilik u xookil le Bibliaoʼ yéetel baʼax utsil ku taasik k-áantaʼal tumen wa máax utiaʼal k-naʼatik.
3. Le Bibliaoʼ jeʼel u yáantkecheʼ
Le Bibliaoʼ bey junpʼéel sáasil ku julik k-beeleʼ. Ku yáantkoʼon utiaʼal k-beetik baʼax maʼalob yéetel ku yeʼesiktoʼon baʼax ku taal u kʼiin u yúuchul.
Xokeʼex Salmo 119:105, kéen tsʼoʼokkeʼ ka tsikbaltikeʼex lelaʼ:
-
Le máax tsʼíibt le Salmoaʼ, ¿baʼax ku tuklik kaʼach yoʼolal le Bibliaoʼ?
-
¿Baʼax ka tuklik teech yoʼolal baʼax ku yaʼalik le Bibliaoʼ?
4. Le Bibliaoʼ ku núukik le baʼaxoʼob taak a wojéeltikoʼ
Juntúul koʼoleleʼ tu tsʼáaj cuentaeʼ teʼ Biblia yaan u núukil le baʼaloʼob taak u yojéeltikoʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼax taak kaʼach u yojéeltik le koʼoleloʼ?
-
¿Bix úuchik u yáantaʼal le ka káaj u xokik le Bibliaoʼ?
Le Bibliaoʼ ku núukik le baʼaxoʼob taak a wojéeltikoʼ. Xokeʼex Mateo 7:7, kéen tsʼoʼokkeʼ ka tsikbaltikeʼex lelaʼ:
-
A tuklikeʼ, ¿tiaʼan wa teʼ Biblia le baʼaxoʼob taak a wojéeltikoʼ? ¿Bey baʼaxoʼob taak a wojéeltikeʼ?
5. Jeʼel u yutstal ta wich a xokik le Bibliaoʼ
Yaʼab máakeʼ uts tu yich u xokikoʼob le Bibliaoʼ tumen yaʼab baʼaloʼob ku kankoʼobiʼ. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼaxten yaʼab paalaloʼobeʼ maʼ uts tu yich u xookoʼobiʼ?
-
¿Baʼaxten yaan paalaleʼ uts tu yich u xokikoʼob le Bibliaoʼ?
Le baʼax ku yaʼalik le Bibliaoʼ jach ku líiʼsik k-óol tumen ku yaʼalik yaan u kʼuchul u kʼiinil u yutstal tuláakal baʼal. Xokeʼex Romanos 15:4, kéen tsʼoʼokkeʼ ka tsikbaltikeʼex lelaʼ:
-
¿A kʼáat wa a wojéelt uláakʼ jatsʼuts baʼaloʼob ku yaʼalik le Biblia kun úuchloʼ?
6. Chaʼa a wáantaʼal
Yaʼab máakeʼ uts tu tʼaan u xokik le Biblia tu juunaloʼ, chéen baʼaleʼ tsʼoʼok u yilkoʼobeʼ maas ku naʼatkoʼob wa ku chaʼik u yáantaʼaloʼob. Xokeʼex Hechos 8:26-31, kéen tsʼoʼokkeʼ ka tsikbaltikeʼex lelaʼ:
-
¿Baʼax jeʼel u yáantkech a maas naʼat baʼax ku yaʼalik le Bibliaoʼ? (Ilawileʼex versículo 30 yéetel 31).
Juntúul máak etiopíaileʼ áantaʼab u naʼat baʼax ku yaʼalik le Bibliaoʼ. Bejlaʼa xaneʼ yaʼab máakoʼob tsʼoʼok u yilkoʼob jach maʼalob ka áantaʼakoʼob u naʼatoʼob baʼax ku yaʼalik le Bibliaoʼ.
BAʼAX SUUK U YAʼALAʼAL: «Chéen kunel u xokik máak le Bibliaoʼ».
-
¿Baʼax jeʼel a waʼalik wa ka aʼalaʼaktech beyoʼ? ¿Baʼaxten bey a tuukuloʼ?
BAʼAX TSOʼOLI
Le Bibliaoʼ ku tsʼáaiktoʼon maʼalob consejoʼob, ku tsoliktoʼon le baʼaxoʼob taak k-ojéeltikoʼ, ku líiʼsik k-óol yéetel ku tsʼáaiktoʼon esperanza.
Baʼax ta kanaj
-
¿Baʼax consejoiloʼob ku tsʼáaik le Bibliaoʼ?
-
¿Bey baʼax preguntailoʼob ku núukik le Bibliaoʼ?
-
¿Baʼax a kʼáat a kan teʼ Bibliaoʼ?
KAN U MAASIL
Ilawil bix u yáantkoʼon le consejoʼob ku tsʼáaik le Biblia teʼ kʼiinoʼobaʼ.
«Le Bibliaoʼ mantatsʼ ku yáantaj» (U Pʼíich Tulumil Kanan, núm. 1 2018)
Ilawil bix áantaʼabik juntúul máak tumen le Bibliaoʼ. Letiʼeʼ desde tu chichnil ku yuʼubik kaʼach minaʼan u biilal u kuxtal.
Ilawil bix jeʼel u yáantik le Biblia le familiaʼob utiaʼal u kiʼimaktal u yóoloʼoboʼ.
«12 baʼaloʼob jeʼel u yáantik le familiaʼoboʼ» (¡Aajkech! núm. 2 2018)
Ilawil baʼax ku yaʼalik le Biblia yoʼolal máax gobernartik le yóokʼol kaabaʼ.