Jeová uputari imiraitá ta uikú arama yepewasú. (Salmo 18:25) Importante yepé mendasá uikú yepewasú ta uyuruyari arama. Ta uprecisari ta umuñhã kuayé ta uyusaisú piri arama.

Kuá tempo upé iwasú yepé mendasá supé ta uikú arama yepewasú. Remuñhakunta arama ne mendarisá reprecisari remuñhã mukũi maã.

MAÃ BÍBLIA UMBEU: “Pesikari arama yawéwarawaté pañhe purangawaá supiwaá arama yuíri.” (Filipowaraitá 1:10) Ne mendarisá yepé maã importantewaá.

Jeová uputari umendariwaitá ta uyuka tempo aintá supé. (Eclesiastes 9:9) Deus uputari resikari remuñhã maã ne mena u ne rimirikú uprecisariwaá asuí pesikari pekuá mayé pepoderi peyumusurí. (1 Korintowaraitá 10:24) Rexari ne mena u ne rimirikú ukuá reprecisari aé asuí revalorizari aé.

MAÃ REPODERI REMUÑHÃ:

• Resikari reyuka tempo reikú arama ne mena u ne rimirikú irum asuí resendú puranga maã aé umbeuwaá.

• Remanduári pe resé yepewasú, umbá añhũ ne resé.

MAÃ BÍBLIA UMBEU: “Uarixiwaá kuá umaã maãwaá kuñhã resé umuñhãté puxiwera kuá kuñhã irum ipiá upé.” (Mateu 5:28) Umanduári ramé ikiawaá resé, mayé uarixisá yawé.

Jeová umbeu reprecisari remuñhakunta ne piá. (Provérbios 4:23; Jeremias 17:9) Remuñhakunta arama ne piá, remaã katú maã resé remanduáriwaá. (Mateu 5:29, 30) Remuñhã mayé Jó yawé. Aé uprometeri ipiá upé ti arama usikari amú kuñhã iximirikú suí. (Jó 31:1) Kirimbá indé ti arama remaã ikiawaá, ne remuarixí amú mira irum ne mena u ne rimirikú suí.

MAÃ REPODERI REMUÑHÃ:

• Rexari amuitá ta ukuá indé ti resikari amú mira ne mena u ne rimirikú suí.

• Resikari rekuá mayé ne mena u ne rimirikú uyusaã. Resendú aé umaã ramé ti puranga yepé ne amizade amú mira irum asuí rembawa kuá amizade irum.