Bay reb e magawon nib thil ni mada’nag Nicolas nge Céline. I m’agan’row ni ngar rin’ew reb e maruwel ni ke pi’ e branch u France ngorow ni aram e nga ranow nga reb e ulung nib beech. I lungurow: “Som’on e ri gamow ba felfelan’, machane faani boch nga tomuren ma gamow tawrengnag e pi fager romow. Ngiyal’ nem e dawori gel e chugur ko tha’ u thilmad e pi walag ko bin baaram e ulung ni ka fin gu warow ngay.” a Ere uw rogon ni ngam par ni gab felfelan’ ma boor ban’en ni ga be rin’ u nap’an ni kam man nga reb e ulung nib beech? Uw rogon nrayog ni nge pi’ yugu boch e girdi’ e ayuw? Ma mang boch e tow’ath nrayog ni nge yag ngom, ma mang boch nrayog ni ngam pi’ ko pi walag ko bin nib beech e ulung ni kam man ngay?

ANINGEG BAN’EN NRA AYUWEGEM

1. Mu taga’ ngak Jehovah. (Ps. 37:5) Kazumi ni ma par u Sapan e nap’an ni fek e pumoon rok reb e maruwel ni bay u yugu bang, ma aram me chuw ko bin baaram e ulung ni ke gaman 20 e duw ni ke un ngay. Uw rogon ni ‘pi’ ir ngak Somol’? I yog ni gaar: “Gu weliy ngak Jehovah urngin ban’en nug be rus ngay, nge tin be kireban’ug ngay, nge tin be magafan’ug ngay. Gubin yay nug ra rin’ e re n’ey, ma ma pi’ gelngig.”

Uw rogon nrayog ni ngarim taga’ ngak Jehovah? Ba t’uf ni ngad rin’ed boch ban’en ni nge gel e michan’ rodad ni bod e woldug nib t’uf e ran riy nge yong’olen e but’ ya nge yag ni ga’. Nicolas ni faan kan weliy murung’agen e guy nnap’an ni i fal’eg i lemnag murung’agen Abraham, nge Jesus, nge Paul ni yad boch e pumoon ni boor ban’en nra paged fan ya nge yag nrin’ed e n’en nib m’agan’ Got ngay, ma aram me yag ni ngari pagan’ ngay nra ayuweg Jehovah. Faanra gubin ngiyal’ ni ga ma fil e Bible rom ni yigoo gur ma gathi kemus nra ayuwegem ni ngam athamgil u fithik’ e pi n’en be thil ko par rom, ya ka ga ra fil boch ban’en nrayog ni ngam fanay ni ngam pi’ e athamgil nga laniyan’ e pi walag u lan e bin nib beech e ulung ni kam man ngay.

 2. Dab um taarebrogonnag boch ban’en nga boch. (Ekl. 7:10) Nap’an ni chuw Jules u Benin nge yan i par nga Meriken, mab t’uf ni nge mecham nga yugu reb e yalen. I yog ni gaar: “Ug lemnag nthingar gu weliy urngin ban’en u murung’ageg ngak gubin e girdi’ nug be mada’nagrad.” Bochan nib thil e re n’ey ko n’en nib mecham ngay, ma aram me tabab ni nge palognag ir ko ulung. Machane tomuren ni nang e pi walag nib fel’ rogon, ma aram me thilyeg e lem rok. I gaar: “Ke mich u wan’ug ndemtrug e gin gad bay riy u fayleng, ma girdi’ e taareb rogon. Kemus nib thil rogon ni yad ma non mab thil e ngongol rorad. Ba ga’ fan ni nge m’agan’um ngay nra be’ ma rogon.” Ere dab um taarebrogonnag e ulung ni um moy riy ko bin nib beech e ulung ni kam man ngay. Bay reb e walag nib pin nib pioneer ni ka nog Anne-Lise ngak ni gaar, “Kug wan gu par nga bang ni bochan e gu baadag ni nggu fil boch ban’en nib beech, ma da gur athapeg ni gubin ban’en ni bay u rom ni nge taareb rogon ko n’en bay ko gin ug moy riy.”

Ku arrogon e piin piilal ndab ur taarebrogonnaged e ulung ni ur moyed riy ko bin nib beech e ulung ni ka ranod ngay. Ra ba thil rogon ni yibe rin’ ban’en ma gathi gubin ngiyal’ ni be yip’ fan nde puluw. Ba fel’ ni ngam nang boch ban’en u rarogon e re ulung nem u m’on ni nga mog boch ban’en nrayog ni ngan rin’. (Ekl. 3:​1, 7b, NW) Kab fel’ ni ngam dag e kanawo’ nrayog ni ngan folwok riy ko bin ngam guy rogon ni ngan rin’ e n’en ga be lemnag.​—2 Kor. 1:24.

3. Mu yoornag e tin ga be rin’. (Fil. 1:27) Nap’an ni ga ra chuw ngam man mu par nga bang ma boor ban’en nib t’uf ni ngam rin’ maku boor e tayim nib t’uf ni ngam rin’ e pi n’ey riy. Machane ba ga’ fan ni ngam un ko muulung ko bin nib beech e ulung ni kam man ngay u rogon feni papey nrayog rom, ma faanra rayog mab fel’ ni ngam un ko muulung u tagil’ e liyor. Ya bin riyul’ riy e, uw rogon nrayog ni nge ayuwegem e pi walag u rom ni faanra darur guyed gur ara fin munmun mi gimed mada’? Lucinda nra chuwgad l’agruw i ppin ni fak nga ranod ra pared nga reb e mach nib ga’ u South Africa e yog ni gaar: “Ni pi’ e athamgil nga lanin’ug ni nggu yoornag e tin gu be rin’ ni fan ko re ulung nem ni ka fin gu uned ngay, mug un ko pi walag ko machib, mug pi’ e fulweg u nap’an e muulung. Ku gogned ko pi walag ni pumoon nrayog ni ngaun tay e muulung ni fan ko machib u tabinaw romad.”

Ra um athamgilgad e pi walag u “taab yang” ni ngam rin’ed e pi n’en yima rin’ ni fan ko ulung, ma aram reb e kanawo’ nib manigil nrayog ni ngam pi’ e ayuw riy ni “nge mich u wan’ e girdi’ fare Thin Nib Fel’ ni yib rok Got.” Anne-Lise ni faan kan weliy murung’agen e pi’ e piin piilal e athamgil nga laniyan’ ni nge guy rogon ni ngar machibgad gubin e walag u lan e ulung u taabang. Mang angin ni yib riy? I yog ni gaar, “Ba papey nug nang ni ireray reb e kanawo’ nib fel’ ni ngam nang riy ni kam mang bang u reb e ulung.” Maku reb e faanra um ognagem ni ngam rin’ boch ban’en ni bod ni ngam un i klinnag Tagil’ e Liyor mag be un i fal’eg e yungin ke kireb riy, ma aram e ga be dag ko pi walag ni ga be tay ni ireram e ulung rom e chiney. Ga ra yoornag e tin ga be rin’ u lan e bin nib beech e ulung ni kam man ngay, ma aram e ra papey ni ngam mechamgad e pi walag u rom mu kum tay ni yad boch i girdien e tabinaw rom.

4. Mu yognag boch e fager ngom nib beech. (2 Kor. 6:​11-13) Reb e kanawo’ nib fel’ nrayog ni ngam yognag boch e fager riy e aram e ngam dag ngorad ni ga be lemnagrad. Ere mu tay e tayim u m’on  ngu tomuren e muulung ni ngam nonad yugu boch e girdi’ mag guy rogon ni ngam nang rarogorad. Mu guy rogon ni ngam nang fithingrad. Faanra dab mu pagtalin fithingan e girdi’, ma gab gol mab mom ni ngan non ngom, ma aram e ra adag e girdi’ ni ngar nanged gur maku dariy e maruwar riy nra yag boch e fager ngom nib beech.

Mu pag pi walagem ni ngar nanged e bin riyul’ i rarogom ko bin nge magafan’um ngay ko yad ra adag dakenam fa danga’. Mu rin’ e n’en ni yog Lucinda ni faani gaar, “Ke chugur thilmad e pi walag e chiney ni bochan e ug pininged yad ni ngar bad nga tabinaw romad.”

“UM PIRED NRA BIGIMED MA BA T’UF ROK BIGIMED”

Bay boch e girdi’ nrayog ni yad be magagawon ni nga ranod nga reb e Tagil’ e Liyor nib sug e girdi’ riy ndar nanged yad. Ere uw rogon nrayog ni ngam ayuweg e piin ka fin nra bad ko ulung rom ndab kur magagawongad? I pi’ apostal Paul e athamgil nga lanin’uy ni gaar: “Um pired nra bigimed ma ba t’uf rok bigimed, ni bod ni be par Kristus ni gimed ba t’uf rok.” (Rom. 15:7) Faanra folwok e piin piilal rok Kristus, ma aram e rayog ni ngar ayuweged e piin ka yad bbeech ni ngar nanged ni yibe t’ufegrad. (Mu guy fare kahol ni kenggin e “ N’en Nra Ayuwegem u Nap’an ni Kam Man Mu Par Nga Bang.”) Machane gubin e girdi’ u lan e ulung nib muun e bitir ngay nrayog ni ngar ayuweged e piin ka yad bbeech ni nge dab kur magagawongad.

Ra ngam t’ufeg yugu boch e girdi’ mab muun boch ban’en ngay ni bod ni ngam piningrad nga tabinaw rom, machane ku rayog nib muun ngay ni ngam ognag e ayuw ngorad u boch ban’en. Bod ni bay reb e walag nib pin ni fanay e tayim rok ni nge dag boch ban’en ko binaw rok ngak reb e walag nib pin ni ka fini yib i par ngaram, miki dag ngak rogon nrayog ni nge un u bus nge train. Ri ngat e re walag ney ko n’en ni rin’ fare walag nib pin me ayuweg ni nge mecham ko par u rom.

REB E KANAWO’ NRAYOG NI NGAM MON’OG RIY

Nap’an ni be ga’ reb e asmen’ing i yan ma boor yay ni ma thilyeg dugren u m’on ni nga fini yag ni nge changeg. Ere ku arrogon nnap’an ni ga ra yan nga reb e ulung nib beech mab t’uf ni nge dabki magafan’um nga boch ban’en nrayog ni nge talegem ndabi fel’ rogon  e pigpig rom ngak Jehovah ni bod fare asmen’ing nib t’uf ni nge thilyeg dugren u m’on ni nga fini yag ni nge changeg. I gaar Nicolas nge Céline: “Ga ra chuw ngam man mu par nga bang, ma aram reb e kanawo’ nib manigil nrayog ni ngam fil boch ban’en riy. Ba t’uf ni nggu maruweliyew boch e fel’ngin nib beech ya nge yag nug mechamgow ngak boch e girdi’ ni kab beech nge bang nib thil ko gin ug moyew riy.” Jean-Charles ni faan kan weliy murung’agen u tabolngin e re article ney e weliy rogon ni yib angin e re n’ey ngak chon e tabinaw rok ni gaar: “Chiney ni kug warod nga reb e ulung nib beech e ke yag ni nge ilal e lem rok gal fakmow mu kur chugurgow ngak Jehovah. Tomuren in e pul, me m’agan’ e chi pin ni baaram ni fakmow ngay ni nga i un i pi’ e welthin u nap’an e muulung u lan e wik miki mang e re pagel ni baaram ni fakmow reb e unbaptized publisher.”

Machane uw rogon ni faanra dabiyog ni ngam chuw ngam man nga bang nib t’uf e ayuw riy ni bochan rarogom? Faanra arrogon, ma rayog ni ngam fol u boch ban’en ni kan weliy ko re article ney u lan e ulung rom. Rayog ni ngam yoornag e tin ga be rin’ u lan e ulung ni aram e ngam yarmiy ni ngam machibgad boch e walag u taabang ma ga be yognag boch e fager nib beech ara kum chugurnag boch e tha’ u thilmed e pi fager rom ma ka ga be taga’ ngak Jehovah. Gur, rayog ni ngam ayuweg e piin ka yad bbeech ara piin nib t’uf e ayuw rorad, fa? Bochan ni t’ufeg e aram e pow ko tin riyul’ e Kristiano, ma aram fan ni faanra um dag e t’ufeg ma rayog ni nge ayuwegem ni ngam ilal ko tirok Got ban’en. (John 13:35) Rayog ni nge pagan’um ngay ni “ereray e pi maligach nib m’agan’ Got ngay.”​—Heb. 13:16.

Boor e Kristiano ni ke yag ni ngar pared ni yad ba felfelan’ ma boor ban’en ni yad be rin’ u lan e bin nib beech e ulung ni ka ranod ngay ni yugu aram rogon ni bay boch e magawon ni yad be mada’nag, maku arrogom! I yog Anne-Lise ni gaar: “Nap’an nug thilyeg e ulung rog me ayuwegeg ni nggu pufpuf ngak boor e walag.” Kazumi e ke mich u wan’ e chiney nnap’an ni ga ra yan nga reb e ulung nib beech ma “rayog ni ngam guy rogon ni be ayuwegem Jehovah u boch e kanawo’ ndawor mu guy u m’on riy.” Ma uw rogon Jules? I yog ni gaar: “Pi fager ni ke yag ngog e ke ayuwegeg ni nge dab kug magagawon. Chiney e kari chugur thilmad e pi walag u lan e ulung ni ke mo’maw’ ngog ni ngkug chuw nggu wan nga bang.”