Ana Mlungu Akusasimanikwaga Palipose?
Kwanga kwakutyochela m’Baibulo
Mlungu akusawonaga chilichose, soni kutenda yindu pa malo galigose gakusaka. (Misyungu 15:3; Ahebeli 4:13) Atamose kuti jwalakwe akusatenda yeleyo, nambope Baibulo jangasalaga kuti Mlungu akusasimanikwa palipose soni pandaŵi jilijose. Mmalo mwakwe Baibulo jikusalosya kuti jwakwe akwete malo gakusatamaga mpela mwayiŵelele ni ŵanduwe.
Mwaŵelele Mlungu: Mlungu ali msimu. (Yohane 4:24) Pangali mundu jwampaka akombole kumwona jwalakwe. (Yohane 1:18) Mmesomkulola gagalembedwe m’Baibulo, ndaŵi syejinji gakusalosya kuti jwalakwe akwete malo gasyesyene gakusatama. Baibulo jangasalaga kuti jwalakwe akusasimanikwa palipose.—Yesaya 6:1, 2; Chiwunukuko 4:2, 3, 8.
Malo gakusatama Mlungu: Mlungu akusatama kwinani, ku malo kwayili yakupanganyikwa ya usimu. Maloga gali gakulekangana mnope ni gakusatamaga ŵandu ni yinyama. Mlungu jwanasoni “malo kwinani kwakusamako.” (1 Ayimwene 8:30, NWT) Baibulo jikusasala kuti pandaŵi jine “malayika gayiche kukuwonechela pameso pa AMBUJE.” Yeleyi yikulosya kuti Mlungu akwete malo gasyesyene gakusatamaga.—Yobu 1:6.
Naga Mlungu jwangasimanikwa palipose, ana jwalakwe mpaka asamalile uneji pajika?
Elo. Jwalakwe akusamsamalila jwalijose pajika. Atamose kuti jwalakwe akusatamaga kwinani ku malo kwayili yakupanganyikwa ya usimu, nambope jwalakwe akusiŵamanyililaga chenene ŵandu ŵakusasaka kumtumichila. Soni jwalakwe akusiŵakamuchisya ŵandu ŵeleŵa. (1 Ayimwene 8:39; 2 Mbili 16:9) Kwende tulole mwakusatendela Yehofa yeleyi kwa ŵakutumichila ŵakwe:
Pandaŵi jakupopela: Yehofa Mlungu mpaka apikane lipopelo lyawo pandaŵi jakupopelajo.—2 Mbili 18:31.
Pandaŵi jakulagasika nganisyo: “AMBUJE akusaŵa chiŵandika ni ŵandu ŵa mtima wekasiche, akwakulupusya ŵelewo ŵajasile mtima.”—Salimo 34:18.
Pandaŵi jakusaka chikamuchisyo: Yehofa Mlungu ‘tachimmanyisya ni kumjiganya’ kupitila m’maloŵe gakwe gagali Baibulo.—Salimo 32:8.
Nganisyo syakulemwecheka syakuti Mlungu akusasimanikwa palipose
Nganisyo syakulemwecheka: Mlungu akusasimanikwa palipose m’chilengedwechi.
Yisyesyene yakwe: Mlungu jwangatamaga pachilambo chapasi kapena palipose mu yindu yatukusayiwonaga ni mesoyi. (1 Ayimwene 8:27) Yili yisyene kuti ndondwa soni yindu yine yaŵapanganyisye “yikusajenesya ya lumbili lwa Mlungu.” (Salimo 19:1) Nambo jwalakwe jwangatamaga mu yindu yaŵapanganyisyeyo. Mwachisyasyo mundu jwakwambula yindu, jwangatamaga pa chindu chajambwilecho. Nambope chajambwilecho mpaka chitukamuchisye kumanyilila yindu yine ya mundu jwachijambwilejo. Mwakulandana ni yeleyi chilengedwe chikusatusalila yakwamba ‘ndamo syangawoneka,’ mpela machili, lunda soni chinonyelo.—Aloma 1:20.
Nganisyo syakulemwecheka: Mlungu akusosekwa asimanikweje palipose ni chakulinga chakuti amanyilileje yindu yosope soni aŵe jwamachiligosope.
Yisyesyene yakwe: Msimu weswela wa Mlungu uli machili gakusakamulichisya masengo jwalakwe. Pakukamulichisya masengo msimu weswela, Mlungu mpaka amanyilile soni kutenda chilichose, kwine kulikose, pandaŵi jilijose pangajigalila kuti jwalakwe aŵe kumaloko.—Salimo 139:7.
Nganisyo syakulemwecheka: Lilemba lya Salimo 139:8 likusasala kuti Mlungu akusasimanikwa palipose. Likusati, “Naga ngukwela kwinani, ŵalakwe ali kukoko, naga ngugona mchilambo cha ŵandu ŵawe alole, ŵalakwe ali kukoko.”
Yisyesyene yakwe: Lilembali ngalikusala ya malo gakusasimanikwa Mlungu. Nambo likutusalila kuti Mlungu nganaŵa alepele kutukamuchisya ligongo lya malo gatuli.
You May Also Like
KWANGA KWA YIWUSYO YA M’BAIBULO
Ana Msimu Weswela Uli Chichi?
Pamagongo gakupikanika chenene, Baibulo jikusawukolanga msimu weswela mpela “magasa” ga Mlungu.
