Ŵandu ŵali pa ujakwe akusaŵecetanaga kuti akusye unasi wawo. Mwakulandana ni yeleyi, Mlungu akutusalila kuti tuŵecetaneje ni jwalakwe kuti tuŵe paunasi wakulimba mnope. Jwalakwe ŵatite, “Cimciŵilanga kwa une ni kwisa kukupopela nipo cinjimpikanila.” (Yeremiya 29:12) Pakuŵecetana ni Mlungu, “cacim’ŵandicila [jwalakwe], soni jwalakwe cacaŵandicila.” (Yakobo 4:8) Baibulo jikusatusimicisya kuti, “Yehofa ali ciŵandika wosope ŵakuŵilanjila pa jwalakwe.” (Salimo 145:18) Patukupopela mnope kwa Mlungu, tukusaŵasoni tuli mkusya unasi wetu ni jwalakwe.

Yesu ŵatite, “Nduni mwa jemanja jwele mwanagwe ali aŵendile mkate, mpaka ampe liganga? Kapena ali aŵendile somba mpaka ampe lijoka? M’yoyo, naga wawojo . . . akusamanyilila kupeleka mituka jambone kwa ŵanace ŵawo, kuli wuli Atati ŵawo ŵakwinani? Ŵalakwe cacipeleka yindu yambone kwa ŵandu ŵakusiŵaŵenda.” (Matayo 7:9-11) M’yoyo, Mlungu akwalimbikasya kuti apopeleje kwa jwalakwe ligongo lyakuti “akusasamala ya wawojo” soni akusasaka kwakamucisya. (1 Petulo 5:7) Baibulo jikusasala kuti, ‘Mkadandawula ni kandu kane kalikose, nambo pa cilicose mwa lipopelo soni kuyamicila, yakuŵenda yawo yimanyice kwa Mlungu.’—Afilipi 4:6.

Ŵasayansi ŵane ŵapatile yakuti ŵandu ŵajinji akusalipikana kuti akusasosekwa kupopela. Atamose ŵandu ŵane ŵangakulupilila kuti kwana Mlungu akusalipikanasoni m’yiyi. * Yeleyi yikulosya kuti Mlungu ŵapanganyisye ŵandu kuti anonyeleje yindu yausimu. Yesu ŵatite, “Ŵakusangalala ali ŵandu ŵakusamanyilila kulaga kwawo kwausimu.” (Matayo 5:3) Litala limo lyampaka tumacisye kulagaku, lili kuŵecetana ni Mlungu ndaŵi syosope.

Naga tukupopela kwa Mlungu, ana mpaka tupate maumbone gapi?