ACHINANGOLO
8: Aŵeje Chisyasyo Chambone
ANA YELEYI YIKUGOPOLELA CHICHI?
Achinangolo ŵakusalosya chisyasyo chambone akusatenda yindu yakusajiganya. Mwambone, ngaŵa mkwembecheya kuti ŵanache ŵawo chatendeje yindu mwakulupichika, chitamilecho pakwete paŵapikene wawojo ali mkuŵecheta kuti, “Mwasalile ndyosile,” naga mundu jwine akwasosa.
David jwatite, “Ŵajinji akusanonyela kuŵecheta kuti ‘Mtendeje yangusaŵecheta ngaŵaga yangusatenda.’ Kuŵecheta kweleku nganikuŵa kukamuchisye ŵanache. Mpela litonji lyalikusakwemba mesi mwangasawusya, ŵanache akusajigalila yiliyose yatukusaŵecheta soni kutenda. Nambosoni mpaka atusalile naga tukutenda yindu yakutindana ni yatukusitwajiganya.”
MFUNDO JA M’BAIBULO: “Mmwe ŵamkusalalichila kuti, ‘Mkajiŵaga,’ ana mkusajiŵagasoni?”—Aloma 2:21.
LIGONGO LYAKWE KULI KWAKUSOSEKWA
Ŵanache atamosesoni ŵachinyamata akusiŵakulupilila mnope achinangolo ŵawo kupunda jwalijose, atamose achimjawo. Yeleyi yikugopolela kuti achinangolo ali pamalo gandanda gambone pakwalongolela ŵanache ŵawo litala lyakuŵajilwa, mnopemnope naga akusatenda yakusajiganya.
Nicole jwatite, “Mpaka tusaleje chindu chichocho mwakuwilisyawilisya mwine ni ganisyaga kuti mwanache jwetu ngakupikana. Nambo naga tukutenda yakulekangana ni yatukusajiganya, mpaka asimonje mwanachejo ali mkwasalila wawojo kuti akutenda yakulekangana ni yakusaŵecheta. Ŵanache akusalolechesya chilichose chatukutenda, atamose yili mkuwoneka mpela ngayikwakwaya.”
MFUNDO JA M’BAIBULO: “Lunda lwakutyochela kwinani . . . lwangatenda yachinyengo.”—Yakobo 3:17.
YAKUSOSEKWA KUTENDA
Aliwungunyeje pa yakusanonyela kutenda. Ana akusanonyela kulolela yakusangalasya yamtuli? Ana ŵamkwawo soni ŵanache ŵawo akusatenda nawo yindu mwamtuli? Ana akwete achimjawo ŵandamo syamtuli? Ana wawojo akusiŵaganichisyaga ŵane? Mwakata, ana yakusatenda wawojo ni yakusasaka kuti ŵanache ŵawo chajigalile?
Jwamkongwe jwine lina lyakwe Christine jwatite, “Une ni ŵamkwangu ngatukusitwakanganichisya ŵanache ŵetu kuti akuyeje ndamo syele m’weji ngatukusakuya.”
Apelecheje pepani palemwisye. Ŵanache ŵawo akusamanyilila kuti wawojo ali ŵangali umlama. Kusala kuti “pepani” kwa ŵamkwawo kapena ŵanache ŵawo yikusakamuchisya kuti ŵanachewo akuwoneje kusosekwa kwa kuŵa ŵakuwona mtima soni kulinandiya.
Robin jwatite, “Ŵanache ŵetu akusosekwa atupikaneje tuli mkwitichisya patulemwisye soni akusosekwa atupikaneje tuli mkupepesya. Naga ngatukutenda yeleyi, ŵanache ŵetu chachilijiganya kuti akusosekwa kusisaga yakulemwa yawo.”
Jwamlume jwine lina lyakwe Wendell jwatite, “M’weji mpela achinangolo, yatukusatenda yikusiyakwaya mnope ŵanache ŵetu, soni chisyasyo chetu chili chida chekulungwa ligongo lyakuti ŵanache akusalijiganya ndaŵi syosope pakulola chisyasyo chetu chambone.”
