Kulilekasya kukusapwatikapo

• kuwusimana mtima

• kuŵambala kutenda yindu yangakosecela

• kutenda yindu atamose kuti yili yakusawusya

• kuŵika yakusaka ya ŵane pasogolo

Ŵanace ŵakulilekasya akusakana kutenda yakusakala atamose kuti yikusawoneka kuŵa yakusangalasya. Mwakulekangana ni yeleyi, yikusaŵa yangasawusya kuti ŵanace ŵangalilekasya aŵe

• ŵakupya mtima

• ŵakulaga ni ulwele wanganisyo

• ŵakwemba sona, kumwa ukana kapena kukamulicisya masengo mitela jakusokonasya mtwe

• ŵangasagula cenene yakulya

Pakuwungunya kwine ŵapatile kuti ŵandu ŵaŵaliji ŵakulilekasya paŵaliji ŵanace, pakusile ngakusalaga mnope ni yakusawusya yamcilu, kusoŵa kwa mbiya nambosoni akusaŵa ŵakupikanila malamusi. Yakuwungunyayi yamtendekasisye Ticala jwa kusukulu jine (University of Pennsylvania) kuŵeceta kuti, “Kulilekasya kuli kwakusosekwa mnope.”

Acinangolo patite iyayi agopoleleje iyayi.

CIWUNDO CA M’BAIBULO: “Naga atite ‘Elo’ agopoleleje elo, soni naga atite ‘Iyayi,’ agopoleleje iyayi.”—Mateyu 5:37, NW.

Ŵanace mpaka alile mnope pakusaka kwalinga acinangolo kuti ŵape cilicose cakusaka. Naga nangolo agamba kumpa mwanace cilicose cakusaka, mwanacejo akusalijiganya kuti kulila mpaka kucenje maloŵe gakuti iyayi nikuŵa elo.

Naga nangolo atite kuti iyayi mwamti ngakumpa mwanacejo cakusakaco, mwanacejo akusalijiganya ciwundo cakuti ndaŵi syosope nganituŵa tupatile catukusaka. Mundu jwine (David Walsh) jwatite, “Ŵandu ŵakusapata yiliyose yakusasaka mpaka awoneceje kuti akusangalala. Nambo yakuwona yakwe yili yakuti ngakusaŵa ŵakusangalala. Mundu jwakulilekasya ni jwakusaŵa jwakusangalala. Naga tukwakunda ŵanace ŵetu kula ni nganisyo syakuti yiliyose yakusasaka mpaka ayipate, nikuti ngatukwanonyela.” *

 Kwalekasya ŵanace ŵetu yindu yine kucakamucisya msogolo kuti caŵe ŵakulilekasya paumi wawo. Mwacisyasyo pasimene ni yakulingwa mpela kumwa mitela jakusokonasya mtwe, kugonana mkanajinjile mu ulombela kapena yitendo yiliyose yakuwulasya cacikombola kuyiŵambala.

Twakamucisyeje ŵanace ŵetu kumanyilila yakuyicisya ya ndamo jakusakala kapena jambone

CIWUNDO CA M’BAIBULO: “Yele yakusapanda mundu, tacigowola iyoyo.”—Agalatiya 6:7.

Ŵanace ŵetu akusosekwa kumanyilila kuti yitendo yiliyose yikwete yakuyicisya yakwe. M’yoyo, kulepela kulilekasya kukusaŵa ni yakuyicisya yakusakala. Mwacisyasyo, naga mwanace ali jwangakaŵa kupya mtima jwine pamlemwecesye, ŵandu akusamŵambala. Nambo naga akusalingalinga kuŵa jwakulilekasya jwine pamtandite, ŵandu akusaŵa ŵagopoka kunguluka najo. M’yoyo, kwende twakamucisye ŵanace ŵetu kumanyilila kuti naga akuŵa ŵakulilekasya caciŵa ni umi wambone.

Twakamucisye ŵanace ŵetu kumanyilila yindu yayili yakusosekwa mnope

CIWUNDO CA M’BAIBULO: ‘Mpakomboleje kusagula ayo yayili yambone mnope.’—Afilipi 1:10.

Kulilekasya nganikuŵa kwamba kuŵambala kutenda cakusakala. Nambo kukusapwatikapo kutenda yayili yakusosecela atamose yiwoneceje kuŵa yangasangalasya. Yili yakusosekwa kuti ŵanace ŵetu amanyilileje yayili yakusosekwa mnope ni kuyitendaga yeleyo candanda. Mwacisyasyo, akusosekwa kutenda kaje masengo ga kusukulu mkanajawule kung’anda.

Tuŵeje cisyasyo cambone

CIWUNDO CA M’BAIBULO: “Une napele jemanja cisyasyo, kuti nombenawo tacitenda soni mpela yinatendele une.”—Yohane 13:15.

Ŵanace ŵetu akusayiwona yatukusatenda patutumbilikasisye ŵane. Kupitila mu yitendo yetu, tulosyeje kuti kuŵa ŵakulilekasya kukusaŵa ni yakuyicisya yambone. Mwacisyasyo, ŵanace ŵetu patesile cindu cakututumbilikasya, ana tukusapya mtima kapena tukusalitimalika?