Aganicisye ayi: Alex aŵele ali mkulupilila kuti Mlungu ni juŵapanganyisye yosope kupwatikapo yaumi. Nambo aticala ŵakwe pakwiganya akuti yaumi yatyocele ku yindu yangali umi, jwalakwe akuwoneka jwakusimonga. Aticalawo akwasalilasoni kuti ŵasayansi ŵapatile yeleyi paŵawungunyisye. Alex ngakusaka kuwoneka mpela jwakusigalila. Jwalakwe akuŵeceta jika kuti, ‘Naga yinduyo ŵasayansi ŵapatile kuti yili yisyene, nambi une nduni kuti sisyeje?’

Ana akaŵe Alex, akajiticisye kuti yaumi yatyocele ku yindu yangali umi pakuŵa ni yalembile m’buku?

Pangani jakwayana ni kuyatyocele yindu yaumi, ŵandu akusagamba kusala yakusakulupilila, nambo ŵangamanyilila ligongo lisyesyene lyakusakulupilila yeleyo.

• Ŵandu ŵane akusagamba kulupilila kuti pana jwine juŵapanganyisye yaumi ligongo lyakuti yeleyi ni yakulijiganyaga ku dini syawo.

• Ŵandu ŵane akusagamba kulupilila kuti yaumi yatyocele ku yindu yangali umi ligongo lyakuti yeleyi ni yaŵalijiganyisye ku sukulu.

Baibulo jikusati, “Nyumba jilijose jikwete juŵajitaŵile, nambo juŵapanganyisye yindu yosope ni Mlungu.” (Ahebeli 3:4) Ana kulupilila yeleyi luli lunda?

YAKUSATI ŴANDU: Kalakalako cindu cine cakwe cagambile kuwulika kaneko kusyuka cilambo ni yosope yayili mwelemo.

YAKUSATI ŴANDU: Ŵandu ŵatyocele ku yinyama.

YAKUSATI ŴANDU: Pana maumboni gakusimicisya kuti yaumi yatyocele ku yindu yangali umi.

Julia ŵatite, “Tujile kuti akwenda mu ukweti, ali mkatikati akujisimana nyumba, ana mpaka aŵecete kuti: ‘Pelepatu yitela yagwilile pambone ni kulipanganya jika nyumba jakusalala mpela jeleji?’ Yeleyo yili yangapikanika! M’yoyosoni ngatukusosekwa kulupilila kuti yindu yagambile kusimanikwa mwajika.”

Gwen ŵatite, “Tuwanicisye kuti mundu jwine akwasalila kuti m’cijumba cine mwawulice macini gakulembela mabuku. Inki jakwe japacice palipose m’cijumbaco, mwati pambesi pakwe yagambile kutendekwa kuti buku jilembedwe jika. Ana mpaka akulupilile yeleyi?”

Baibulo jikutulimbikasya kuti tukamulicisyeje masengo “macili ga kuganisya.” (Aloma 12:1) Yeleyi yigopolela kuti akagambaga kulupilila Mlungu pamagongo aga:

• MWAKUGANICISYA (Ngusagamba ganisya kuti pana jwine jwakwe jwamacili mnope)

• KUJIGALILA NGANISYO SYA ŴANE (M’musi mwetu ŵandu ŵajinji akusakulupilila yeleyo)

• YAKWAMBA KWASALILA (Ndili mwanace, acinangolo ŵangu ŵanjiganyaga kuti kwana Mlungu. Pandaŵijo nganingola upile wakusagula)

Mmalo mwakwe, amkulupilileje Mlungu pa magongo gakupikanika cenene.

Teresa ŵatite, “Mkalasi, aticala pakwiganya yayikusatendekwa m’cilu mwetumu, ngusasimicisya kuti kwana Mlungu juŵatupanganyisye. Mbali jilijose ja cilu cetu, atamose jamwana, jikwete masengo gakwe. Soni ndaŵi syejinji, mbalisi sikusakamula masengo tuli ngatukumanyilila. Cilu ca mundu ŵacipanganyisye mwakusimonjesya kwabasi!”

Richard ŵatite, “Kwamba kujiwona nyumba jelewu, sitima, kapena galimoto, ngusaliwusya jika kuti, ‘Ana yeleyi ŵayipanganyisye ŵani?’ Pakusasosekwa lunda kuti mundu alumbikanye yindu yamwanamwana kuti apanganye galimoto. Naga pana juŵapanganyisye galimoto, nikuti panasoni juŵapanganyisye ŵandu.”

Anthony ŵatite, “Kulijiganya yejinji ya sayansi kungamucisye kusimicisya kuti pana juŵapanganyisye yaumi yosope. . . . Kwa une, ngusayiwona kuti kujila kuti pangali juŵatupanganyisye yili yangapikanika ata panandi.”

Ŵasayansi wosope ŵaŵawungunyisye ni kupata kuti yaumi yatyocele ku yindu yangali umi, maumboni gawo panganiji gakusaŵa gakulekangana. Naga ŵasayansi acimsyenewo ŵangakamulana pa cindu cimo, ana kuli kulemwa kayicila nganisyo syawosi?