Ana Yindu Yichiŵa Wuli Msogolo?
Ana . . .
-
yichiŵa mwayiŵelelemu?
-
yichipitilisya kusakala?
-
yichiŵa yambone?
YAJIKUSASALA BAIBULO
“Mlungu . . . tachapukuta misosi josope m’meso mwawo. Ngasipapagwa chiwa, chanasa, kulila, kapena kupikana yipwetesi. Yindu yakala yosope yeneyi yimasile.” —Chiwunukuko 21:3, 4.
ANA YELEYI YIKUTUKWAYA CHAMTULI?
Yikulosya kuti kuchiŵa masengo gasyesyene soni gakusangalasya.—Yesaya 65:21-23.
Kuchiŵa kwangali ulwele, kapena yipwetesi yiliyose.—Yesaya 25:8; 33:24.
Tuchikola umi wangamala wakusangalala, pamo ni ŵamwiŵasa mwetu, soni achimjetu.—Masalimo 37:11, 29.
ANA MPAKA TUKULUPILILE YAJIKUSASALA BAIBULOYI?
Elo, pamagongo gaŵili aga:
-
Mlungu ni jwakwete machili gakwanilisya chakulinga chakwe. M’Baibulo, Yehofa Mlungu jika ni jwakusakolanjidwa kuŵa “Jwamachiligosope,” ligongo akwete machili gejinji. (Chiwunukuko 15:3) Myoyo, jwalakwe ni jwampaka akombole kwanilisya chakulinga chakwe mwakuchenga chilambochi kuti chiŵe chambone mnope. Baibulo jikusasala kuti, “ni Mlungu yindu yosope yili yakomboleka.” —Mateyu 19:26.
-
Mlungu ali jwakusachilila kwanilisya chakulinga chakwe. Mwachisyasyo, Yehofa ali jwakusachilila kwawuchisya umi ŵandu ŵawe.—Yobu 14:14, 15.
Baibulo jikusasalasoni kuti Mwanache jwa Mlungu, Yesu, ŵaposisyepo ŵakulwala. Ana ligongo chichi ŵatesile yeleyi? Ligongo jwalakwejo ŵasachile. (Maliko 1:40, 41) Yesu ŵalosisye mnope ndamo ja Atatigwe pakusachilila kamuchisya ŵakulaga.—Yohane 14:9.
Myoyo ngatukukayichila kuti Yehofa ni Yesu akusaka kutukamuchisya kuti chituŵe ŵakusangalala mnope msogolo.—Masalimo 72:12-14; 145:16; 2 Petulo 3:9.
YATUKUSOSEKWA KUYIGANICHISYA
Ana Mlungu chachichenga wuli chilambochi kuti chiŵe chambone?
Baibulo jikusajanga chiwusyochi pa MATEYU 6:9, 10 soni pa DANIELE 2:44.