Ndili mwanache liŵasa lyetu lyatamaga chiŵandika Leipzig, cha Kungapilo lyuŵa kwa chilambo cha Germany. Msindawu uli chiŵandika ni malile ga chilambo cha Czech ni Poland. Ndili ngwete yaka 6, twasamile ku Brazil kwele baba ŵangu ŵakamulaga masengo, kaneko twasamilesoni ku Ecuador.

Panakwete yaka 14, ŵandumisye ku sukulu jagonela kukoko ku Germany. Ligongo lyakuti achinangolo ŵangu ŵatamaga ku South America, natandite kulisamalila namsyene. Kaneko nakwete mtima wakulidalila. Yindu yanatendaga yakwayagasoni achimjangu.

Ndili ngwete yaka 17, achinangolo ŵangu ŵawujile ku Germany. Pandanda natamaga ni achinangolo ŵangu. Nambo ligongo lyakuti naliji ndili syoŵelele kusagula jika yakutenda, yaliji yakusawusya kuti napikanileje. Myoyo ndili ngwete yaka 18, natyosile panyumbapo.

Nambope yindu nganiyinjendelaga mnope mwamti kaneko natandite kuwungunya chakulinga cha umi. Ndili mbungunyisye nayiweni kuti ngusosekwa kwawula kulikose mchilambochi ŵandu mkanachijonanje.

Nasumile njinga ja moto, mwamti nasamile ku Germany, ni kwawula ku Africa. Kaneko njingaji jajonasiche ni naganisisye yakuwujila ku Europe kuti ngajilinganyichisye. Nambo ndili mbiche pachiko cha ku Portugal, naganisisye yakuti najileche njingaji ni kutanda kwenda paliboti, mwamti njingaji najilesile kukoko.

Naganisisye yakwenda yimpempe ni gulu ja ŵachinyamata ŵaŵakosechelaga komboka nyasa ja Atlantic. Paguluji papali msikana jwine lina lyakwe Laurie jwele mkupita kwa ndaŵi twalombene. Pandanda twapite ku yilumba ya Caribbean. Tuli tutemi kwakandaŵi ku Puerto Rico, twawujile ku Europe. Twasakaga tuli tupatile liboti lyampaka likombolecheje kulichenga kuŵa nyumba jetu. Twasosile libotili kwa miyesi jitatu nambo nganitulipata. Kaneko, asilikali ŵangamwile ni kulemba masengo ga usilikali.

Kwa miyesi 15 naliji mgulu ja asilikali ŵapamesi ŵa ku Germany. Pandaŵiji ni patwalombene ni Laurie soni twalinganyisye yakuti tupitilisye kwenda myilambo yakulekanganalekangana. Ndili ngambile kutanda kwene usilikali, twasumile liboti lyele twalichenjile nikuŵagasoni nyumba. Ndili mkutenda usilikaliwu, mwapanandipanandi natandite kulilinganya libotilyo kuti tutamejemo. Twatesile yeleyi ni chakulinga chakuti tupitilisye kulola yindu yachilengedwe yakulekanganalekangana tuli pamesi. Ndili ndesile masengo ga usilikali napitilisye kulinganya libotili. Mkanitumalisye kulilinganya, twasimene ni ŵa Mboni sya Yehofa mwamti twatandite kulijiganya Baibulo.

Pandanda nayiwonaga kuti ngangusosekwa kuchenga chilichose paumi wangu. Naganisyaga myoyo ligongo lyakuti jwamkongwe junatamaga najo, twaliji tuli tulombene mwalilamusi nambosoni naliji ndili ndesile kwemba sona. (Aefeso 5:5) Nayiwonagasoni kuti paliji pangali chakusawusya kwenda myilambo yakulekanganalekangana ligongo twayiwonaga yindu yachilengedwe yele yiŵapanganyisye Mlungu.

Kusala yisyene, nasosekwaga kuchenga ndamo syangu. Pakuŵa naliji jwakunyada soni jwangasalilidwa yakutenda, nagambaga ganichisya ya lunda lwangu soni yangukwanilisya kuyitenda. Naliji jwakulinonyela.

Lisiku line, naŵalasile yakwamba Ulaliki wa Petumbi wa Yesu. (Mateyu, chaputala 5-7) Pandanda nganimbikanichisyaga yaŵaŵechete Yesu yakusosekwa kwa kuŵa ŵakusangalala. Mwachisyasyo, jwalakwe jwaŵechete kuti ŵandu ŵajakwete njota soni sala jausimu akusaŵaga ŵakusangalala. (Mateyu 5:6) Nasimonjile kuti ana mpaka yikomboleche wuli kuti mundu jwanjota soni jwasala aŵe jwakusangalala. Ndili mbitilisye kulijiganya, namanyilile kuti wosopewe tukusakola sala soni njota jausimu. Nambo chakusosekwa mnope chili kulimanyilila kuti tukusosechela yindu yeleyi paumi wetu. Yesu jwaŵechete kuti, “Ŵana upile ŵandu ŵakulaga m’mitima mwawo mu usimu.”—Mateyu 5:3.

Tuli tulijiganyisye Baibulo kwakandaŵi ku Germany, Laurie ni une twasamile ku France, soni kaneko ku Italy. Kulikose kwatwajawulaga twasimanaga ni ŵa Mboni sya Yehofa. Chindu chachatusangalasyaga mnope chaliji chakuti ŵaliji ŵakunonyelana soni ŵakamulana. Yeleyi yandendekasisye kumanyilila kuti ŵa Mboni sya Yehofa ali mpela liŵasa limo lya pachilambo chosope. (Yoh. 13:34, 35) Pali papite ndaŵi, Laurie ni une twabatisidwe ni kuŵa ŵa Mboni sya Yehofa.

Ndili mbatisidwe nasosekwagape kuchenga ndamo syangu pa umi wangu. Laurie ni une twaganisisye yakwawula ku United States kupitila pa nyasa ja Atlantic. Tuli pasikati pamesi, natandite kuganichisya mnope ya Mkupanganya jwetu, jwali jwakusimonjesya mnope. Mwamti nayiweni kuti ŵanduwe tuli ŵakutuluka mnope pakulandanya ni Mkupangnya jwetu. Ligongo lyakuti nakwete ndaŵi jejinji, natandite kuŵalanga Baibulo. Ngani jajasangalasyaga mnope jaliji jakusala yaŵatesile Yesu ali pachilambo chapasi. Yesutu ŵaliji mundu jwamlama, mwamti ŵapataga ndaŵi jakwakamuchisya ŵandu ŵane. Jwalakwe jwakamulichisyaga masengo ndaŵi jakwe pakutenda yakusaka Atati ŵakwe ŵakwinani.

Chisysyo cha Yesuchi changamuchisye kumanyilila kuti nasosekwaga kukamulichisya masengo ndaŵi jangu pakwasalila ŵane ya Uchimwene wa Mlungu m’malo mwakwamba kutenda yakusaka yangu. (Mateyu 6:33) Myoyo Laurie ni une tuli tuyiche ku United States, twaganisisye yakutamilichika kweleko kuti tukoleje ndaŵi jakwanila jakumtumichila Yehofa.

Pandaŵi jinaliji mundu jwangasaka kusalila yakutenda jila, ndaŵi sine nalepelaga kumanyilila yakusosekwa kutenda. Nambo apano, Maloŵe ga Mlungu gakusangamuchisya kuti saguleje yindu mwalunda. (Yesaya 48:17, 18) Apano ngusayiwona kuti umi wangu ukwete sogolo jambone ligongo lyakuti ngumtumichila Mlungu soni ngusinakamuchisya ŵane kuti amtumichilejesoni.

Kukuya mfundo sya m’Baibulo kukamuchisye liŵasa lyetu kuti liŵe lyakulimba soni lyakunonyelana. Apano tukwete mwanache jwamkongwe jwakusalala mnope, mwamti jwalakwesoni akumtumichila Yehofa.

Tukusimanape ni yakusawusya. Nambo tukusayiwona kuti Yehofa akusatukamuchisya soni ngasituleka kumkulupilila jwalakwe.—Misyungu 3:5, 6.