BAIBULO JIKUSACHENGA UMI WA ŴANDU

“Ŵasakaga Kuti Simichisye Jika Yisyesyene Yakwe”

Jakuŵechetedwa ni Luis Alifonso

CHAKA CHKUPAGWA: 1982

CHILAMBO CHAKUTYOCHELA: DOMINICAN REPUBLIC

MBILI JANGU: NAKULILE MU DINI JA MORMON

KALA KANGU: Napagwile ku Santo Domingo, m’chilambo cha Dominican Republic. Paŵanache mcheche ŵa mwiŵasa mwetu, uneji ndili jwakumalisya. Achinangolo ŵetu ŵalijiganyisye sukulu mwamti ŵasakaga kuti ŵanachewe tuŵe ŵandamo syambone. Uneji mkanimbagwe, achinangolo ŵangu ŵasimene ni ŵandu ŵa mu dini ja Mormon. Nambo yakuwala yaŵaŵete jemanjaji yaliji yambone kwabasi. Yeleyi yatendekasisye achinangolo ŵangu kuti ajinjile dini jeleji. Liŵasa lyetu lyaliji lyandanda kwinjila diniji.

Panakulaga nasangalalaga mnope ni yindu yayatendekwaga mu diniji. Nasangalalagasoni ligongo lyakuti diniji jalimbikasyaga maŵasa kuti gakoleje ndamo syambone. Myoyo chakulinga changu chaliji chakuti chimbe mmishonale.

Panakwete yaka 18, liŵasa lyetu lyasamile ku United States ni chakulinga chakuti ngatende majiganyo ga ku yunifesite. Pali pamasile chaka mayi ŵangu ŵanandi ŵaŵaliji ŵa Mboni sya Yehofa ŵayiche kukunguluka ku Florida. Mayiŵa ŵatuŵendile kuti tujawule nawo ku msongano. Kumsonganoku nasimonjile mnope kum’wona jwalijose ali ajigele Baibulo jakwe soni ali mkulemba m’makope gawo mfundo syakulijiganya. Myoyo naŵendile kuti ambe chakulembela soni pakulemba kuti lembeje mfundo syangu.

Panyuma pa msonganowu mayi ŵanguŵa ŵasalile kuti pakuŵa ngusaka kuŵa mmishonale mpaka namkamuchisye kulijiganya mfundo jine jakwe ja m’Baibulo. Nayiweni kuti syaliji nganisyo syambone ligongo pandaŵiji nganimanyililaga yejinji yakwamba Baibulo. Yanamanyililaga mnope yaliji yakwamba Buku ja Mormon.

YAJATITE BAIBULO PAKUCHENGA UMI WANGU: Patwalijiganyaga kupitila pa foni, mayi ŵanguŵa ŵalimbikasyaga kuti lekanganyeje yangusakulupilila ni yajikusajiganya Baibulo. Chakulinga chawo chaliji chakuti simichisye jika yisyesyene yakwe.

Pandaŵiji papali yindu yejinji yanayikulupililaga yakwayana ni dini ja Mormon, nambo nganimanyililaga naga yanakulupililagayo yikusakamulana ni Baibulo. Myoyo mayiŵa ŵandumichisye magasini ja Ajimuche! ja Nofemba 8, 1995, jakuwandisidwa ni wa Mboni sya Yehofa. Magasiniji jajakwete ngani syasyasalaga chikulupi cha dini ja Mormon. Nasimonjile mnope ligongo lyakuti nganimanyililaga yejinji yajikusajiganya dini ja Mormon. Yeleyi yandendekasisye kuti ndande kuwungunya pa Webusayiti kuti simichisye yajasalaga Ajimuche! jila naga yaliji yisyene. Soni napatile maumboni gane gakonjechesya panapite kukulola malo gakusunjila yindu yakala ya dini ja Mormon ku Utah.

Yanakulupililaga yaliji yakuti yajikusasala Buku ja Mormon ni Baibulo yangalekangana. Nambo panatandite kulijiganya Baibulo mwakusokoka, nayiweni kuti yajajiganyaga dini ja Mormon yaliji yakulekangana mnope ni yajikusasala Baibulo. Mwachisyasyo m’Baibulo pa Esekiele 18:4 NWT, pakusati umi ukusawa. Nambo Buku ja dini ja Mormon, pa Alma 42:9, jikusasala kuti: “Umi ŵangawa.”

Konjechesya pelepa diniji jajiganyaga kuti Mlungu akusachinonyela chilambo chetu. Mwachisyasyo jajiganyaga kuti mgunda wa Edeni waliji m’chilambo cha Jackson, Missouri, ku U.S.A. Nambosoni achimlongola wa diniji ŵajiganyaga kuti, “Lisiku line Uchimwene wa Mlungu uchilamulila chilambo chapasi kupitila mwa achakulungwakulungwa wa m’chilambo cha United States.”

Nasimongaga kuti ligongo chichi chilambo chetu ni chele chichilamulilaga yilambo yine. Lisiku line panapochele foni kutyochela kwa mundu juŵalijiganyisye kuti aŵe mmishonale, twatandite kukambilana nganiji. Ni nawusisye kuti naga chilambo chine ni chilambo chenu chili pangondo, ana mli ŵakoseka kumenyana ni ŵandu ŵa dini ja Mormon? Nasimonjele mnope ligongo jwajanjile kuti elo. Yaŵajanjileyi yandendekasisye kuti ndande kuganichisya mnope pakwamba yanakulupililaga soni kuti nawusye achimlongola ŵa dini ja Mormon yanakulupililaga. Jemanjaji ŵanjanjile kuti kwanga kwa yiwusyo yanguyi kuchipatikana kusogoloku.

Yaŵajanjile achimlongola ŵa diniji yanguŵesye mnope. Yeleyi yandendekasisye kuti ndande kuganichisya yayandendekasisye kuti ngole nganisyo syakuŵa mmishonale jwa dini ja Mormon. Nayiweni kuti nasakaga kuŵa mmishonale pakusaka kuti nakamuchisyeje ŵandu. Ligongo line lyanasachilaga kuŵa mmishonale lyaliji lyakuti ŵandu anjimbichisyeje. Nambo nganimanyililaga kuti nganisyo syelesi syaliji syakulekangana ni yaŵasakaga Mlungu. Atamose kuti munyumamu nanonyelaga kuŵalanga Baibulo, nambo yanaŵalangagayo nganinayikulupililaga. Nganimanyililaga chakulinga cha Mlungu pakwamba ŵandu soni chilambo.

UMBONE WAMBATILE: Pandaŵi jinalijiganyaga Baibulo ni ŵa Mboni sya Yehofa, nalijiganyisye yindu yejinji. Mwachisyasyo nalijiganyisye yakwamba lina lya Mlungu, chachikusatendekwa mundu pawile soni udindo wakwete Yesu pakwanilisya chakulinga cha Mlungu. Pambesi pakwe natandite kujipikanichisya chenene Baibulo soni natandite kwasalila ŵane yanalijiganyisye. Namanyililaga kuti Mlungu apali, nambo apano ngusaŵecheta najo kupitila mu lipopelo soni ali mjangu. Pa Julayi 12, 2004 nabatisidwe ni kuŵa jwa Mboni sya Yehofa. Soni pali pamasile miyesi 6, natandite kumalila ndaŵi jangu pakulalichila.

Kwa yaka msanu, natumichile ku likulu lya Mboni sya Yehofa ku Brooklyn, New York. Kweleku nasangalalaga mnope kukamuchisya nawo pamasengo gakupanganya Baibulo soni mabuku gane gakulondesya ya Baibulo. Yindu yeleyi yikusakamuchisya ŵandu ŵajinji kusyungulila pachilambo chosope. Apano ngupitilisya kwakamuchisya ŵandu kuti nombenawo alijiganye yakwamba Mlungu.