Chikalata Chandanda cha Petulo 4:1-19
4 Pakuŵa Klistu ŵalasile paŵaliji mundu, jemanjasoni mlikosechelesye kuti mkole nganisyo mpela syaŵakwete jwalakwejo, ligongo mundu palasile nikuti alekangene ni ulemwa.
2 Yeleyi yili myoyo ni chakulinga chakuti ndaŵi josope jachatameje ni umi atendeje yakusaka ya Mlungu, ngaŵaga yakumbila ya ŵandu.
3 Ndaŵi jajipiteji jaliji jakumkwanila jemanja kutenda yakusaka ya ŵandu ŵa m’chilambo. Pandaŵijo mwaliji mkutenda ndamo jakulijasilila,* mwaliji ŵakusachilila kutenda yakulemwecheka, mwaliji ŵakumwelesya mnope, mwatendaga yisangalalo yangalondeka, mwamwaga mwampikisano, soni mwajitindiŵalilaga milungu jakusepa.
4 Ŵandu ŵa m’chilamboŵa akusasimongaga pakumwona jemanja kuti mlesile kutenda nawo ndamo* syakusakala syelesi, mwamti ni ligongo lyakwe akusamnyosyaga jemanja.
5 Nambo jemanjaji chachijanga magambo pameso pa jwele jwali jwakoseka kwawelusya ŵandu ŵaumi soni ŵawe.
6 Ni ligongo lyakwetu ngani syambone ŵasilalichile atamose kwa ŵandu ŵawe. Yeleyi yaŵele myoyo kuti jemanjajo atameje ni umi mwakulongoleledwa ni msimu mwakamulana ni nganisyo sya Mlungu, atamose kuti ŵandu akusiŵawelusyaga jemanjajo pakujigalila mwakuwonechela.
7 Nambo mbesi ja yindu yosope jiŵandichile. Myoyo mŵeje ŵaganisya chenene, soni ndaŵi syosope mkumbuchileje kupopela.*
8 Nambo kupunda pa yosope, mŵeje ŵakunonyelana mnope, ligongo kunonyelana kukusasiŵa yakulemwa yejinji.
9 Mpochelaneje chenene* mwangali kudandawula.
10 Jwalijose jwa jemanja jwapochele mtuka kutyochela kwa Mlungu. Myoyo mwakamulana ni muŵapochelele jwalijose mtukawo, awukamulichisyeje masengo pakwatumichila ŵane. Pakuŵa jemanja mli ŵakulolela ŵamwapochele umbone mtima wekulungwa wele Mlungu akusawulosya m’matala gakulekanganalekangana.
11 Naga jwine ŵapochele mtuka wakuti aŵecheteje, jwalakwejo aŵecheteje mwakulosya kuti maloŵego ŵagapochele kutyochela kwa Mlungu. Naga jwine akutumichila, jwalakwejo atumichileje mwakamulana ni machili gapochele kutyochela kwa Mlungu. Yeleyi yili myoyo ni chakulinga chakuti Mlungu achimbichikwe mu yindu yosope kupitila mwa Yesu Klistu. Pakuŵa uchimbichimbi soni machili yili ya Mlungu mpaka kalakala. Ame.
12 Achalongo achimjangu ŵapamtima, mkasimongaga ni yakusawusya yayikukolela pasikati penu, mpelaga kuti yili yachilendo. Jemanja mkusimana ni yakusawusya yeleyi kuti yimlinje.
13 Nambo mŵeje ŵakusangalala pamkusimana ni yeleyi ligongo mkulagasika pa magongo gakulandana ni gaŵalajile Klistu. Myoyo, pandaŵi jele uchimbichimbi wakwe uchiwonechela, jemanja chimchiŵasoni ŵakusangalala mnope.
14 Naga ŵane akumnyosya ligongo lya lina lya Klistu, mŵeje ŵakusangalala, ligongo pelepo nikuti msimu wa Mlungu wawuli wauchimbichimbi uli pa jemanja.
15 Pasikati penu pakaŵa jwalijose jwakusimana ni yakupweteka ligongo lyakuti ali jwakuwulaga mundu kapena jwawiyi kapena jwakutenda yakusakala kapenasoni jwakwinjilila yachimsyene.
16 Nambo naga jwine akulaga ligongo lyakuti ali Mklistu, jwalakwejo akatendaga sooni, nambo apitilisye kumchimbichisya Mlungu mwakutenda yindu mpela Mklistu.
17 Pakuŵa ajino jili ndaŵi jakwe jakuti kuwelusya kutande, soni kukutandila ni nyumba ja Mlungu. Sambano naga kukutandila pa m’weji, ana yichamalila uli ŵandu ŵali ŵangapikanila ngani syambone sya Mlungu?
18 “Soni naga mundu jwakutenda yambone pameso pa Mlungu chachikulupuka mwakulajilila, nambi mundu jwangakulupilila Mlungu soni mundu jwakulemwa yichimmalila uli?”
19 Myoyo, kwa ŵandu ŵakusimana ni yakupweteka ligongo lyakutenda yakusaka ya Mlungu, apitilisye kutenda yambone soni kupeleka umi wawo mmyala mwa jwele juŵapanganyisye, jwalisoni jwakulupichika.
Maloŵe Gamwiŵanda
^ Kapena kuti, “ndamo jakutesya sooni; ndamo jangalilekasya; ndamo jakulilechelela.” Mu Chigiliki akusati, a·sel′gei·a. Alole Kugopolela kwa Maloŵe Gane.
^ Kapena kuti, “mlesile kuwutuka pampepe ni jemanjajo mundamo.”
^ Kapena kuti, “mkumbuchileje kuti lipopelo lili lyakusosekwa.”
^ Kapena kuti, “Mwatendeleje ŵane yindu yambone.”
