Karaha ty nivolan̈in’i António Guterres Sekretera Zeneralin’ny Firenena Mikamban̈a, momba fanafihan̈a mivantan̈a nataon’i Iran tamin’i Israely tamy sabotsy 13 Avrily 2024: “Iziôty fotoan̈a tôkony han̈anaovan̈a raha baka hampakirikiry lagera. Aviô iziôty fotoan̈a tôkony han̈aboahan̈a fifihezan-ten̈a mare.”

 Mbala araiky amy raha mandalo eran-tany fo lagera an Israely io.

 “Mbala tsiary nisy lagera maro be karaha amy ziôty rango nisian’ny Ady Lehibe II. Aviô olo mandeha aroe arivo tapitrisa na ampahefatran’ny vahoaka eran-tany mipetraka amy tany misy lagera.”​—Filan-kevitrin’ny Filaminan̈a amy Firenena Mikamban̈a, 26 Zanvie 2023.

 Ty aby tany misy lagera amy ziôty: Israely, Gaza, Syria, Azerbaïdjan, Ukraine, Soudan, Éthiopie, Niger, Myanmar, aviô Haïti. a

 Ombian̈a ma hifaran̈a lagera? Ho vitan’ny mpitondra amy donia ty ma hampisy filaminan̈a? Ino raha koran̈in’ny Baiboly momba zen̈y?

 Fisian’ny ady eran-tany amy ziôty io, man̈aboaka fa hely tavela hifaran̈a ady jiaby io. Ady aby io man̈atanteraka faminanian̈an’ny Baiboly momba andra iain̈antsika ziôty. Karaha ty ikahian’ny Baiboly izio: “Vanim-potoan̈an’ny faran’ny donia ty.”​—Matio 24:3.

•   ‘Anaro haharen̈y ady ndreky filazan̈a ady. ... Hisy firenena hiady amy firenena, aviô hisy fanjakan̈a hiady amy fanjakan̈a.’​—Matio 24:6, 7.

 Vakia lahatsoratra “Ino ma Raha Ahaizan̈a ‘Andra Farany’ na ‘Vanim-potoan̈an’ny Farany’?” baka hahitan̈a nan̈ino lagera aby misy amy ziôty io man̈atanteraka faminanian̈an’ny Baiboly.

 Baiboly efa nivolan̈a tsialohaloha fa hifaran̈a ady ataon’olombelon̈o. Amy fomba akôry? Tsy baka amin’ny angôvon’olombelon̈o fa baka amin’ny Aramagedona, izio ikahian̈a “Adin’ny andra maventin’ny Zan̈ahary Farany Mahery.” (Apokalypsy 16:14, 16) Afaran’ny ady io, Zan̈ahary han̈atanteraka fampan̈antinan̈anany momba olombelon̈o. Ke olo amy zen̈y hiadan̈a tsisy farany.​—Salamo 37:10, 11, 29.

 Baka hahaizanao tsarabe momba adin’ny Zan̈ahary hamaran̈a ady jiaby io, vakia lahatsoratra “Ino ma Ady Aramagedona Zen̈y?”