Izio ady farany ataony fanjakan̈anolombelon̈o ndreky Fanjakan̈any Zan̈ahary. Iro fanjakan̈anolombelon̈o aby io ndreky iro panohan̈a iro aby io ndray izioty efa tsy man̈eky Zan̈ahary ndreky fitondrasan̈any Zan̈ahary. (Salamo 2:2) Handravan̈a fitondrasan̈anolombelon̈o jiaby ady Aramagedona io.​—Daniela 2:44.

 Indraiky fo ahitan̈a volan̈a “Aramagedona” zen̈y amy Baiboly ao. Aminy Apokalypsy 16:16 ao izio. Faminanian̈a amy bokiny Apokalypsy ao man̈ambara fa iro “iro panjaka jiaby ambony tany havory aminandra maventy iadivany Zan̈ahary Farany Mahery” io. Amy volan̈a hebreo, ‘Aramagedona an̈arany toeran̈a’ io.​—Apokalypsy 16:14.

 Azovy ma hiady aminy Aramagedona? Jesosy Kristy hitariky tafiky andan̈itry an̈y, ke handresy iro fahavalony Zan̈ahary aby io. (Apokalypsy 19:11-16, 19-21) Fahavalony Zan̈ahary lan̈iany olo manohitry fahifan̈anany ndreky mierin̈y izy.​—Ezekiela 39:7.

 An Israely an̈y ma han̈anaovan̈a ady Aramagedona io? Ehe. Izio tsy ady atao antany araiky fa amy tany jiaby.​—Jeremia 25:32-34; Ezekiela 39:17-20.

 Dikany Aramagedona na Haramagedona (Hebreo Har Meghiddohnʹ) zen̈y, “Bongony Megido.” Tanàna araiky tamy faritriny Israely taloha tan̈y Megido zen̈y. Tany fiadiavan̈a taloha tan̈y izio. Maro koa ady natao man̈odidin̈y tanàna io tan̈y koran̈iny Baiboly ao. (Mpitsara 5:19, 20; 2 Mpanjaka 9:27; 23:29) Fa Aramagedona io ndraiky tsy zen̈y. An̈y tsisy bongo maventy tandry olo manohitry Jehovah, ary ndray lemaka ambany amy Jezirela mbala tsy tandry fo. Dikanizen̈y, aminy Aramagedona io, firenena erantany hivory hiady amy fitondrasan̈any Jehovah.

 Ino raha ampiasainy Jehovah aminy ady Aramagedona io? Mbala tsy haintsika akory hampiasany Zan̈ahary angovonany, fa ampoizin̈y ndraiky izy hampiasa raha aby nampiasainy taloha tan̈y: Havandra, horohorontany, mahalen̈y, motro ndreky solifara, tselabaratra, ndreky aretin̈y. (Joba 38:22, 23; Ezekiela 38:19, 22; Habakoka 3:10, 11; Zakaria 14:12) Mety hifamono koa iro fahavalony Zan̈ahary aby io, kanefa ho takatrany jerindro fo fa Zan̈ahary miady amindro.​—Ezekiela 38:21, 23; Zakaria 14:13.

 Ho potiky ma tany jiaby aminy Aramagedona? Ehe, fotony tany ty nataony Zan̈ahary hipitrahanolo mandrakizay. (Salamo 37:29; 96:10; Mpitoriteny 1:4) Avio, tsy olo jiaby hofoaty amizio fa hisy “vahoaka be” ho tafitsaka velon̈o amizio, tsy azovy zen̈y fa lan̈iany olo manompo Zan̈ahary.​—Apokalypsy 7:9, 14; Salamo 37:34.

 Amy Baiboly ao koa, dikany “tany” zen̈y ndraikindraiky, olo ratsy fan̈ahy manohitry Zan̈ahary. (1 Jaona 2:15-17) Zen̈y dikany ivolan̈any fa Aramagedona io “farany rafitry donia ty.”​—Matio 24:3.

 Ombian̈a ma avy Aramagedona io? Jesosy koa fa baka nikoran̈a momba “fahorian̈a be” hifaran̈a aminy Aramagedona io, karaha ty nivolan̈iny momba Aramagedona: “Momba andra ndreky lera, tsisy olo mahay izy, na anjely andan̈itry an̈y, na Zanaka. Baba andan̈itry an̈y zaraiky fo mahay izy.” (Matio 24:21, 36) Fa Baiboly tsy mivolan̈a fa Aramagedona io hanomboko tamy fan̈atrehany Jesosy tsy hitany maso taminy 1914.​—Matio 24:37-39.