Miniminia hely baka ty: Isaka Julia mizaha fitaratra, izy mivolan̈a izy maventy fo ke mila mihen̈y zen̈y. Kanefa ry olobeny ndreky kamaradiny mivolan̈a fa izy “mahia mira kakazo.”

Tan̈atiny jerinany: “Sitrany zaho tsy hihina foeky an̈atiny andra vitsivitsy amy zen̈y zaho mihen̈y, ndray kilo aroe fo.” . . .

Izikoa anao Julia, akory hataonao?

Tsisy maha ratsy izy, izikoa anao mba tihankatsara forma. Ndray Baiboly fo mikoran̈a lelahy ndreky man̈angy tsara sora, karaha ataony Saraha, Rahely, Josefa, Davida, baka io Abigaila. Koran̈iny ao koa fa Abisaga man̈angy araiky ‘farany tsara sora’ eky.—1 Mpanjaka 1:4.

Kanefa, maro tanora miasa loha loatra momba formanany ke mety hitondra problemo be zen̈y. Diniha hely baka ty:

• Hita tamy fan̈adikadin̈ana araiky, fa 58 isanjatony tsaiky man̈angy nivolan̈a fa maventy loatra, kanefa 17 isanjatony amindro io fo ten̈a maventy.

• Tamy fan̈adikadin̈ana hafa ndraiky, nahitan̈a fa 45 isanjatony man̈angy mahia hely mivolan̈a fa maventy loatra zen̈y!

• Tanora sasany tihihen̈y loatra, ke sitrany izy tsy mihina foeky na an̈arany mihina fo. Loso aretin̈y izio amy farany, fotony manjary tsy tia mihina fo izy. Mety hamono izy foeky zen̈y!

 Izikoa anao karaha fa ho tatrany aretin̈y io na aretin̈y hafa miramira io, mangataha fan̈ampian̈a. Koràn̈a amy raimandreninao, na aminy olobe hafa atokisan̈a izio. Baiboly mivolan̈a: “Olo ten̈a naman̈a zen̈y mira rahalahy von̈ono han̈ampy amy fotoan̈a jiaby, indraka eky amy fotoan̈a isiany raha mampiory.”—Ohabolana 17:17.

Baka amy toetrinolo araiky hahavy olo ho tia na tsy ho tia izy. Karaha ty raha nivolan̈iny Baiboly momba Absaloma, zanaka Panjaka Davida:

‘Tsisy lelahy tsara sora mandilatra Absaloma taminy Israely tao. Tsisy tsin̈y foeky izy rango tamy tampodohany firaka tamy felambitiny.’—2 Samoela 14:25.

Kanefa izy olo pamitaka, nan̈ambony ten̈a, baka io tihalaza mare! Tsy hatsaran̈any soranany foeky raha ten̈a koran̈iny Baiboly momba izy, fa izy olo tsy men̈atra mivadiky, pamono olo, ndreky tsy tia olo.

Zen̈y mahavy Baiboly man̈amia atsika hevitry ty:

‘Misikina toetry vaovao.’—Kolosianina 3:10.

‘Ke irarian̈a sanjinaro tsy raha ambelan̈a ... , fa irarian̈a ho toetry misitriky an̈aty fô an̈y.’—1 Petera 3:3, 4.

Marin̈y fa tsy ratsy man̈iry ho tsara vatan̈a zen̈y. Fa mbala raha maventy mandilatra formanao toetrinao. Ke mifen̈a hanan̈a toetry tsara koran̈iny Baiboly ao, fotony zen̈y hahavy anao ten̈a ho tianolo, fa tsy baka aminy anao fatatra be ndreky tsara forma oe! Ho Phylicia: “Izikoa anao zatovo, olo mety ho taitry kanefa toetrinao raha ten̈a tsy ho adin̈any.”

Matetiky kivy ma anao izikoa fa mizaha forma vatan̈anao?

Misy olo an̈arany mihina fo na man̈ano fandidian̈a hampatsara formanany. Asa efa nieritreritry han̈ano zen̈y koa anao?

Ino amy raha aby ty hivoanao, izikoa vitanao? (Fidiana zay izy.)

• HALAVASAN̈A

• HAVINTESAN̈A

• FAN̈EVA

• FORMA

• SORA

• KOLERANY HODITRY

“Ia” ma valinteninao tamindro fan̈ontanian̈a aroe voanalohany? Baka io telo na mihoatra ma nifidinao tamy lay fahatelo? Aleva onon̈o ty: Anao mety mieritreritry raha ratsy be momba anao, kanefa mety tsy ho karaha zen̈y aby fahitanolo anao. Ke aza atao mamparivan̈a anao raha zen̈y.—1 Samoela 16:7.