An̈isany raha efa naharikian̈a siantifiky aby io rango efa ela ditiny myxine. Izio biby andranomasin̈y an̈y. Nan̈ino ma izio mahavarian̈a siantifiky aby io? Fotony amy raha jiaby mizozaka aboakany raha manampahin̈ana, dity io farany mizozaka.

 Diniha hely baka: Myxine io miramiran̈a aminy amalon̈o fo. Izio mipetraka amy farany ambany an̈aty ranomasin̈y lalin̈y be an̈y. Izikoa fa hitany fa misy biby hafa tihihina izy, direkty izy man̈aboaka dity. Misy raha spesialy amy vatan̈anany ao man̈aboaka dity io. An̈atiny dity io misy karazan̈a proteiny maromaro, tafiditry amy zen̈y proteiny karaha taretry madiniky mandeha andrivony. Avadikindro proteiny aby io manjary ranondraha madity rano aby man̈odidin̈y myxine io. Ke azony dity io, loso tampin̈y taovampisefoany zay biby mitady hihina myxine io. Ke direkty biby aby io mandoa man̈aboaka myxine io avio iro milefa.

 Ten̈a maharikian̈a ditiny myxine. Proteiny an̈atinizio ao matify oe karaha taretry in̈y, fotony ampahazatony vahiny fan̈eva araiky hatifiny tsiaraikiaraiky amindro. Kanefa mbala ampitombosin̈y impolo aminy hatanjahan̈any nilon. Iro proteiny karaha taretry aby io ndreky iro karazan̈a proteiny hafa izikoa fa aboaka an̈aty ranomasin̈y an̈y, izio manjary karaha harato malemy hely zay. Kanefa proteiny aby io mahavita mitana rano ampitombosin̈y 26 000 havisarany. Ny marin̈y aminany, efa ho 100 isanjatony dity io rano fo.

 Siantifiky aby io mba tihangala tahaka ditiny myxine, fa iro mbala tsy nahavita. Misy pikaroko araiky nivolan̈a fa maro garamidany loatra fomba fan̈amboarany biby io dity io. Fa siantifiky aby io mieritreritry han̈amboatra proteiny araiky miran̈a taretry in̈y, fa baktery fo handeha hampiasaindro. Iro baka tihan̈amboatra raha mahivan̈a, tsy mora tapaka, mizozaka, baka io mora ravan̈a. Izikoa iro mahavita man̈amboatra proteiny mira taretry, izio manjary mety han̈amboaran̈a lamba, na koa raha hafa ampiasain̈y amy fitahan̈a. Maro raha mety ampiasan̈a izio.

 Akory hevitrinao? Navinavy hoazy ma dity maharikian̈a aboakany myxine, sa izio nisy namoron̈o?