Amy Baiboly ao, dikany “mamelon̈o” zen̈y baka amy volan̈a griky a·naʹsta·sis, dikany “manangana” na “mampitsangana ndraiky koa.” Olo maty vilomin̈y zen̈y, izy ampody velon̈o karaha izy taloha in̈y fo.​—1 Korintianina 15:12, 13.

 Amy Testamenta Taloha na Soratra Hebreo ao ndray tsisy volan̈a manokana ivolan̈ana familoman̈a olo maty io, hita ao fo fampianaran̈a io. Ohatra Zan̈ahary nampiasa paminan̈y Hosea han̈ambara karaha ty: “Iro havotako baka amy Fasan̈a an̈y ndreky amy fahafatesan̈a.”​—Hosea 13:14; Joba 14:13-15; Isaia 26:19; Daniela 12:2, 13.

 Hivilomin̈y aia ma olo maty? Sasany amindro io hivilomin̈y hiain̈y andan̈itry an̈y, fotony iro io hiaraka hanjaka amy Kristy. (2 Korintianina 5:1; Apokalypsy 5:9, 10) “Fitsanganan̈a voanalohany” ndreky ‘fitsanganan̈a alohaloha’ ivolan̈any Baiboly izio. Dikanizen̈y, mbala hisy koa familoman̈a olo maty afaranizio. (Apokalypsy 20:6; Filipianina 3:11) Izio familoman̈a ankamarozanolo maty hiain̈y ambony tany eto.​—Salamo 37:29.

 Karakory hamiloman̈a olo maty? Zan̈ahary nan̈amia Jesosy angovo hamiloman̈a olo maty. (Jaona 11:25) Jesosy hamelon̈o ‘olo jiaby ampasan̈a an̈y’, ke amizio tsisy raha miova raha ahaizan̈a olo io, toetrinany ndreky raha an̈aty jerinany. (Jaona 5:28, 29) Fa iro vilomin̈y hiain̈y andan̈itry an̈y io hahazo vatan̈a arapan̈ahy. Olo hivilomin̈y ambony tany eto ndraiky ho salama vatan̈a, avio iro ho lavorary.​—Isaia 33:24; 35:5, 6; 1 Korintianina 15:42-44, 50.

 Azovy aby olo hivilomin̈y? Baiboly mivolan̈a fa “olo marin̈y ndreky tsy marin̈y.” (Asan’ny Apostoly 24:15) An̈isandro olo marin̈y aby io iro olo nanompo Zan̈ahary taloha tan̈y, karaha ataoniry Noa, Saraha, ndreky Abrahama. (Genesisy 6:9; Hebreo 11:11; Jakoba 2:21) Fa iro olo tsy marin̈y io ndraiky iro olo tsy nan̈araka fitsipikiny Zan̈ahary, fotony iro tsy nafaka nianatra ndreky nan̈araka izio, taminiro mbala velon̈o.

 Fa izy ndraiky edy, lan̈iany olo nivadiky tamy Zan̈ahary efa tsy antinain̈y hivilomin̈y eky.​—Matio 23:33; Hebreo 10:26, 27.

 Ombian̈a ma familoman̈a olo maty? Baiboly efa nan̈ambara fa an̈atiny fan̈atrehany Kristy familoman̈a iro olo maty hiain̈y andan̈itry an̈y. Nikomansy tamy 1914 raha zen̈y. (1 Korintianina 15:21-23) Fa familoman̈a olo maty ambony tany eto ndraiky, amy Fanjakan̈a Arivo Taon̈ony Kristy, amy tany jiaby ty efa paradisa.​—Lioka 23:43; Apokalypsy 20:6, 12, 13.

 Nan̈ino atsika matoky fa hisy ankitin̈y familoman̈a olo maty? Fotony Baiboly mitantara olo sivy nivilomin̈y taloha tan̈y, ke nisy olo nahita raha zen̈y. (1 Mpanjaka 17:17-24; 2 Mpanjaka 4:32-37; 13:20, 21; Lioka 7:11-17; 8:40-56; Jaona 11:38-44; Asan’ny Apostoly 9:36-42; 20:7-12; 1 Korintianina 15:3-6) Familoman̈a Lazarosy ten̈a hafa tamizio, fotony izy efa naty tan̈atiny efatra andra. Baka io koa naro olo nahita Jesosy namelon̈o izy. (Jaona 11:39, 42) Tamy zen̈y, nata iro olo tsy tia Jesosy aby io tsy nafaka nifamatra raha zen̈y. Ndray iro aby nizaha hevitry hamonoan̈a Jesosy ndreky Lazarosy.​—Jaona 11:47, 53; 12:9-11.

 Ambarany Baiboly fa Zan̈ahary mahavita mamelon̈o olo maty, sady izy koa efa tihamelon̈o iro io. Azony onon̈o raha jiaby mombamomba olo tsiaraikiaraiky naty, fotony izy farany mahery. (Joba 37:23; Matio 10:30; Lioka 20:37, 38) Vitany Zan̈ahary mamelon̈o olo maty, sady izy efa tihan̈ano izio! Karaha ty raha koran̈iny Baiboly momba zen̈y: “Efa tsy din̈inao hahita asany tan̈anao.”​—Joba 14:15.

Hevitry diso momba familoman̈a olo maty

 Hevitry diso: Familoman̈a olo maty zen̈y, vatan̈a ndreky fan̈ahy mitambatra.

 Ny marin̈y: Baiboly mampianatra fa fan̈ahy zen̈y olo velon̈o, fa tsy tapaka ain̈y mbala velon̈o afarany fahafatesan̈a. (Genesisy 2:7; Ezekiela 18:4) Olo baka nivilomin̈y zen̈y olo ten̈a olo velon̈o.

 Hevitry diso: Misy olo sasany koa fa baka vilomin̈y, iro efa direkty maty koa.

 Ny marin̈y: Baiboly mivolan̈a fa “zay nan̈ano raha ratsy, hatsangana amy fitsaran̈a.” (Jaona 5:29) Fa kanefa, raha hitsaran̈a iro olo aby io, tsy raha nataondro talohaniro naty, fa raha hataondro afarany iro vilomin̈y. Jesosy nivolan̈a: “Iro olo maty aby io haharen̈y feony Zanaka Zan̈ahary, ke lan̈iany mitandren̈y izy ho velon̈o.” (Jaona 5:25) Dikanizen̈y, mbala hampianarin̈y iro olo velon̈o aby io, ke hisoratin̈y amy “bokiny fiain̈ana” an̈arany lan̈iany “mitandren̈y” na man̈araka raha ampianarin̈y iro io.​—Apokalypsy 20:12, 13.

 Hevitry diso: Izikoa olo io velon̈o, mbala vatan̈a nindesiny naty in̈y fo vatan̈anany.

 Ny marin̈y: Olo koa fa maty, vatan̈anany robaka, avio ravan̈a.​—Apokalypsy 20:12, 13.