იეჰოვაშ მოწმეეფს მოსიამოვნუნა შხვადოშხვა რელიგიაშ კათაწკუმა რწმენაშ გურშენ ჩიება, მარა მონაწილებას ვა ბღებულენთ შხვა რელიგიურ თაყვანიშმცემლობას. ბიბლიაშე ბგებულენთ, ნამდა ნამდვილ ქრისტიანეფ შქას ართობა რე, მუშენდა თინეფ ართ თაყვანიშმცემლობას რენა გაერთიანებულეფ (ეფესოელები 4:16; 1 კორინთელები 1:10; ფილიპელები 2:2). თენა ხვალე თის ვა ნიშნენს, ნამდა თინეფ აფასენა თიცალ თვისებეფს, მუნერით რე ჸოროფა, შხვეფიშ გაჭირებაშ გურშა მეღალა დო პატიება. ჩქინ რელიგიურ შეხედულებეფ გერსხილ რე ზუსტ ბიბლიურ რჩქინაშა, ნამდგაშ უმშო ჩქინ რწმენა მუთუნ ვეჸიდ (რომაელები 10:2, 3).

 ბიბლია „ართ მანგ ვა რენ ფერ“ უღუს სქუაფას ადარენს შხვა რელიგიურ თაყვანიშმცემლობას მონაწილებაშ მეღებას, მუდგაქ შილებე რწმენა დაუსუსტას ქრისტიანს (2 კორინთელები 6:14—17). ზუსტას ათეშენ ურაგადუდ ქრისტე მუშ მოწაფეეფს, ნამდა მონაწილება ვემიღესკო შხვა რელიგიურ თაყვანიშმცემლობას (მათე 12:30; იოანე 14:6). თეშნერო, მოსეშ საშვალებათ ისრაელეფშა მეჩამილ ღორონთიშ კანონ უკრძალენდჷ ისრაელეფს მეზობელ ერეფიშ რელიგიურ თაყვანიშმცემლობას მონაწილებას (გამოსვლა 34:11—14). უმოს გვიანო, ართგურ ისრაელეფქ ვარია უწუეს შხვა რელიგიაშ მიმაჸუნალეფს მოხვარაშე, ნამდა ვაკათესკო თინეფიშ რელიგიას (ეზრა 4:1—3).

 ქო. მაგალთო, 2022 წანას ჩქი 1 501 797 703 საათ გუმურთით შხვა რელიგიაშ წარმომადგენელეფწკუმა ჩიებას. მოციქულ პავლეცალო, ჩქი ხოლო მოკონა, „მუთ შილებე მეტ“ კათაშ რელიგიურ შეხედულებეფს ქინვანჭათ დო ქიგებგათ, მუ წანა (1 კორინთელები 9:19—22). შხვეწკუმა ჩიებაშ დროს მთელ გურით ვოცადუთ, მივაჸუნათ ბიბლიურ რჩევას, ნამდა „დიდ პატიცემა“ გეგმიფრჩქინათ თინეფწკუმა (1 პეტრე 3:15).