არმაგედონ რე ბრძოლა ადამიანურ მთავრობეფ დო ღორონთ შქას. თე მთავრობეფ დო თინეფიშ მომხრეეფ ღორონთის ასე ხოლო ოწინააღმდეგნა თით, ნამდა ვაღიარენა თიშ მართველობას (ფსალმუნი 2:2). არმაგედონიშ ბრძოლა მოსპუნს ადამიანეფიშ მართველობას (დანიელი 2:44).

 სიტყვა „არმაგედონ“ ბიბლიას ხვალე ართშა რე მოშინაფილ გამოცხადებაშ 16:16-ის. წიგნ გამოცხადებას ნაწინასწარმეტყველებ რე, ნამდა „ადგილს, ნამდგას ებრაულო არმაგედონ ჯოხო“, „მსოფლიოშ მეფეეფ“ ეკიშაყარუნა „ობრძოლებერო ... ირფელიშშემალებე ღორონთიშ დიდ დღას“ (გამოცხადება 16:14).

 მი იბრძოლენს არმაგედონს? იესო ქრისტე ქეწაჸუნუ ზეციერ ლაშქარს, ნამდა გიორჯგინან ღორონთიშ ნტერეფს (გამოცხადება 19:11—16, 19—21). თე ნტერეფშა მიშულა თინეფ, მიდგას ჯოგნა ღორონთ დო ოწინააღმდეგნა თიშ მართველობას (ეზეკიელი 39:7).

 პირდაპირ გაგებათ იჸუაფნო არმაგედონიშ ბრძოლა შქა აღმოსავლეთის? თეშ პასუხ რე, ვარ. არმაგედონიშ ბრძოლა ხვალე ართ ადგილს ვარინ, მთელ დედამიწას იჸუაფ (იერემია 25:32—34; ეზეკიელი 39:17—20).

 სიტყვა „არმაგედონ“ ნამთინე თარგმანს გინოღალირ რე მუჭოთ „ჰარ-მეგიდონ“ (ებრაულო Har Meghiddohnʹ), მუთ „მეგიდოშ გვალას“ ნიშნენს. ართ დროს მეგიდო რდჷ ქალაქ ჯვეშ ისრაელიშ ტერიტორიას. ისტორიას მოშინაფილ რე, ნამდა თიშ ხოლოს ბრელ, თინეფ შქას ბიბლიას ენოჭარილ, მნიშვნელოვან ბრძოლაქ მოხვად (მსაჯულები 5:19, 20; 2 მეფეები 9:27; 23:29). მარა არმაგედონს მუთუნნერ კავშირ ვა უღჷ ჯვეშ ქალაქ მეგიდოშ გოხოლუას რდუნ თი ტერიტორიაწკუმა. თექ ვარ რე დიდ გვალა დო ვართ იზრეელიშ ველს მოძუნ თი ტერიტორიას გინტირედან იჸი თინეფ, მით ღორონთიშ წინააღმდეგ გიშელენა. სინამდვილეს, არმაგედონ მეუთითენს დროშა, მუჟამსით ერეფ ეკიშაყარუნა, ნამდა საბოლათ ქეწინააღმდეგან ღორონთიშ მართველობას.

 მუნერ იჸუაფ არმაგედონიშ ბრძოლა? მართალ რე, ზუსტას ვა მიჩქნა, მუჭო გიმირინუანს ღორონთ მუშ ძალას, მარა თის შეულებ გიმირინუას თიცალ საშვალებეფ, მუნერით ულირს გიმურინუაფ. მაგალთო: კირცხ, მიწისძვრა, დიდწყარალა, დაჩხირ დო გოგირდ, ვალ დო გურგინ დო ლახალეფ (იობი 38:22, 23; ეზეკიელი 38:19, 22; აბაკუმი 3:10, 11; ზაქარია 14:12). ღორონთიშ ნტერეფშე ნამთინე თეშ ებორჯებ, ნამდა ართიანს დოჸვილნა დო საბოლათ ქიმეხვადნა, ნამდა თინეფიშ წინააღმდეგ ღორონთ რე გიშულირ (ეზეკიელი 38:21, 23; ზაქარია 14:13).

 გენადგურებნო არმაგედონს დედამიწა? არმაგედონს დედამიწა ვეგენადგურებ, მუშენდა თექ კაცობრიობაქ მარადიულო ოკო იცხოვრას (ფსალმუნი 37:29; 96:10; ეკლესიასტე 1:4). არმაგედონ კაცობრიობაშ განადგურებას ვარინ, თიშ რსხებას ომსახურ, მუშენდა ღორონთიშ მსახურ „ანაყუ ხალხ“ თე ბრძოლას გინასქიდუ (გამოცხადება 7:9, 14; ფსალმუნი 37:34).

 სიტყვა „ქვეყნიერება“ ხვალე დედამიწას ვა ნიშნენს. მინშა ბიბლიას თე სიტყვა უბადო კათაშ ეიოჭარალო გიმირინუაფ, მით ღორონთიშ ხალხის ოწინააღმდეგ (1 იოანე 2:15—17). თე გაგებათ არმაგედონ მოსპუნს თე ქვეყნიერებას (მათე 24:3).

 მუჟამ იჸუაფ არმაგედონ? „დიდ გასაჭირიშ“ გურშენ ჩიებაშ დროს, ნამუთ არმაგედონიშ ბრძოლათ გეთებუ, იესოქ თქუ: „მუმაშ მეტის მითინს ვა უჩქჷ, მუჟამ დოდირთუ თი დღა დო საათ — ვართ ზეცას ანგელოზეფს დო ვართ სქუას“ (მათე 24:21, 36). მარა ბიბლიაშე იძირე, ნამდა არმაგედონ მოხვადუდ იესოშ მეფობაშ პერიოდის, ნამდგაქ 1914 წანას დიჭყჷ (მათე 24:37—39).