იეჰოვაქ დედამიწა ადამიანეფშო შექმნ. თენა ჩქინი ჸუდე რე. პირველი ჩილ დო ქომონჯი, ადამი დო ევა, ღორონთის ცაშ მაცხოვრებელო ვაგურჩქინუ. ცაშ მაცხოვრებელო თიქ ანგელოზეფი გარჩქინ (იობი 38:4, 7). ღორონთიქ პირველი ადამიანი სამოთხეს დახორუ, ნამუსით ედემიშ ბაღი ჯოხოდუ (დაბადება 2:15—17). იეჰოვაქ ადამს დო თიშ მოდგმას შესაძლებლობა მეჩუ, ირიათო უცხოვრებუდესკო დედამიწას. წეკითხით ფსალმუნიშ 37:29; 115:16.

დუდშე სამოთხე ხვალე ედემიშ ბაღის რდუ. ადამ დო ევას მუნეფიშ შთამომავლობათ ოკო ეუფშაფუდესკო დედამიწა. იშო-იშო მთელი დედამიწას ქემინჯებუდეს დო სამოთხეთ გინაშკვანდეს (დაბადება 1:28). დედამიწა დღას ვეგენადგურებუ! თინა ირო რდუ დო იჸუაფუ ხალხიშ ოცხოვრებელი! წეკითხით ფსალმუნიშ 104:5.

ქუჯინით ვიდეოს „მუშენი შექმნჷ ღორონთიქ დედამიწა?“

ადამ დო ევაქ ვადუჯერეს ღორონთის დო ათეშენი იეჰოვაქ გეგნორაუ თინეფი ედემიშ ბაღშე. სამოთხექ მედინუ დო უკული მითინს ვეშიალებუ თიშ დორთინაფაქ. ბიბლიას ჭარუ: „დედამიწა ბოროტიშ [ბოროტი ადამიანეფიშ] ხეს რე“ (იობი 9:24). წეკითხით დაბადებაშ 3:23, 24.

ჩეშალუო იეჰოვაშ პირველი განზრახვაქ? ვარ! ღორონთი იფრელიშ შემალებე რე დო თიშო შეუძლებელი მუთუნ ვარე (ესაია 45:18). ღორონთი დურთინუანს ადამიანეფს თის, მუთ დუდშე აფუდუ თინეფშო ჩაფიქრებული. წეკითხით ფსალმუნიშ 37:11, 34.

დედამიწას სამოთხე ღორონთიშ დანიშნული მეფეშ, იესო ქრისტეშ მართველობაშ დროს ეღედგინებუ. არმაგედონიშ ჩხუპიშ დროს იესო მუში ანგელოზეფს ქანჯღვარუ დო ღორონთიშ არძა  მტერს განადგურენს. თეშ უკული იესო სატანას 1000 წანათ დობორკუნს. ღორონთიშ ხალხი გეგნიღანს თე განადგურებას, მუშენდა თინეფს იესო უხელმძღვანელენს დო დეცვენს. თინეფი გეხარებუნა დედამიწას მარადიული სიცოცხლეთ. წეკითხით გამოცხადებაშ 20:1—3; 21:3, 4.

მუჟამ მოსპუნს ღორონთი ბოროტებას? იესოქ მუჩეს „ნიშანი“, ნამუთ დემეხმარებუნა, გეიშეფჩინათ ბოროტი ქიანაშ აღსასრულიშ მოახლოებაშ დრო. ამდღარი მსოფლიო მდგომარეობა, ნამუთ ადამიანიშ სიცოცხლეს საშიშროებას უქმნენს, თიშ ნიშანი რე, ნამდა ქიანაშ აღსასრული ხოლოს რე. წეკითხით მათეშ 24:3, 7—14, 21, 22.

დედამიწას იესო 1000 წანას იმართველენს დო თე პერიოდის ბოლოს მუღენს ირნერი ტანჯვას (ესაია 9:6, 7; 11:9). იესო ქოთ მეფე იჸუაფუ დო ქოთ მღვდელმთავარი; თინა ღორონთიშ მოჸოროფე ხალხის ცოდვაშე ირსხენს. ღორონთი იესოშ მეშვეობით ბოლოს მუღენს ლახალას, სირჩინუეს დო ღურას. წეკითხით ესაიაშ 25:8; 33:24.

სამოთხეს ღორონთიშ მორჩილი ადამიანეფი იცხოვრენა (1 იოანე 2:17). იესოქ მუში მიმდევრეფს დავალუ, ნამდა დუგორუდესკო თავმდაბალი ადამიანეფი დო დაგურესკო ღორონთიშ მოსაწონო ცხოვრება. ამდღა იეჰოვა მილიონობით ადამიანს ამზადენს, დედამიწას სამოთხეშ მაცხოვრებელო (სოფონია 2:3). იეჰოვაშ მოწმეეფიშ კრებებს ხალხი გურაფლენს, მუჭო ორდან უჯგუში ქომონჯეფი დო ოსურეფი, დიდალეფი დო მუმალეფი. მშობლეფი დო ბაღანეფი ართო ცენა თაყვანს ღორინთის დო გურაფლენა, მუჭო იცხოვრან ბიბლიაშ თანახმათ. წეკითხით მიქაშ 4:1—4.