მოკლე ბიოგრაფია: ჩქიმ დაბადებაშე მუსხირენ წანას ჩქიმ ოჯახ აღმოსავლეთ გერმანიას, ქალაქ ლაიფციგის ცხოვრენდჷ, ჩეხეთ დო პოლონეთიშ საზღვარწკუმა ხოლოს. მუჟამსით ამშვ წანერ ვორდჷ, მუაჩქიმიშ სამუშაშ გურშენ დიო ბრაზილიაშა გინიბლით ოცხოვრებშა დო უკულ ეკვადორშა.

14 წანერ ვორდინ თეშ სკოლა გიმნაზიაშა გომტეს გერმანიაშა. ჩქიმ მშობლეფ მანგარ შორს რდეს, სამხრეთ ამერიკას. ათეშენ მა მიკვოჯინედ ჩქიმ დუდის. დუდშა ზედმეტო დაჯერებულო გინიფრთჷ. შურო ვა მოინტერესუდ, მუჭო მოქმედენდჷ ჩქიმ საქციელ შხვეფწკუმა.

17 წანერ ვორდინ თეშ ჩქიმ მშობლეფქ გერმანიაშა დირთეს. დუდშე თინეფწკუმა ართო ფცხოვრენდჷ, მარა ჩქიმ ხასიათიშ გურშენ ვეშემლებუდ თინეფწკუმა ცხოვრება. ათეშენ 18 წანერ ვორდინ, ჸუდეშე მიდაფრთჷ.

ვა მოსვანჯუანდჷ თიშე ფიქრ, მუ რდუ ცხოვრებაშ აზრ. მუჟამსით გინვოჯინ შხვადოშხვა კატეგორიაშ ადამიანეფიშ ცხოვრებაშ წესის, დებრწმუნ, ნამდა არძაშ უჯგუშ, მუთ შემლებუდ ჩქიმ ცხოვრებას ვაკეთკო, თინა რდუ, ნამდა მიბლიკო დედამიწა, ონდო თის ადამიანეფ საბოლათ მოსპუნდეს.

ქიდიბტე გერმანია, ქიპჸიდ მოტოციკლეტ დო აფრიკაჸურე ქიგვოდირთჷ შარას. მარა მალას მაჸუ ევროპაშა დართინალქ მოტოციკლეტიშ ოკეთებშა. ჭიჭე ხანშა შურო ვეველუდინ თეშ პორტუგალიას, ზღვაპიჯის ქუმოფხვად. გეგნობჭყვიდ, მოტოციკლეტიშ მანგიორო მოგზაურობა გემით გუვაგრძელკო.

ახალგაზრდეფიშ ჯგუფიშ ქუვაკათ. თინეფ ემზადებდეს, ნამდა ატლანტიშ ოკეანე გეგნოკვათესკო. თაქ გეფჩინებაფე ჩქიმ მომავალ მეუღლე, ლორი. პირველო კარიბიშ ზღვაშ კუნძულეფჸურე მიდაფრთით. თეშ უკულ ჭეხანს პეურტო რიკოს ქუვორდით დო კინ ევროპაშა დიფრთით. მა დო ლორის მოკოდეს, გემ ქიფშითკო, ნამდგას იახტათ გეგნვაკეთენდით. მარა სუმ თუთა ხოლო ვარდჷ მიკულირ, ნამდა ჩქინ გეგმეფქ დითირ, მუშენდა გერმანიაშ სამხედრო სამსახურშა ქუდომძახეს.

გერმანიაშ სამხედრო საზღვაო ფლოტის 15 თუთას ვორდჷ. თე დროშ დინახალე მა დო ლორიქ დებქორწინით დო გეგნობჭყვიდით, მივემზადითკო მოგზაურობაშო. ჯარიშ თებაშახ ჭიჭე ხანით ადრე სამაშველო ნავიშ კორპუს ქიპჸიდით დო ჭიჭე გემ გუვაკეთით. გეგნობჭყვიდით,  თე გემს იფცხოვრითკო დო ჯარიშ თებაშ უკულ მთელ მსოფლიო მიბლითკო. გემიშ ენწყუალა ვა მაფდეს თებულინ თეშ იეჰოვაშ მოწმეეფს ქეშეფხვადით.

ბიბლიაქ ჩქიმ ცხოვრება დოთირუ: დუდშე ფიფქრენდჷ, ნამდა მუთუნ ვა მაფუდ ოთირალ ჩქიმ ცხოვრებას, მუშენდა ოსურწკუმა კანონიერო ვორდჷ დაქორწინებულ დო სიგარეტიშ შუმა ხოლო მეტებულ მაფუდ (ეფესოელები 5:5). ფიფქრენდჷ, ნამდა მსოფლიოშ მოლებაშ გეგმა ხოლო ვარდჷ გლახა, მუშენდა თენა საშვალებას ქომჩანდეს, ღორონთიშ გუნაჭყეფუს დევეკვირითკო.

მარა სინამდვილეს მოსაჭირუდ ცვლილებეფიშ კეთება. განსაკუთრებით ჩქიმ შინაგან პიროვნება ოკო დოფთირეკო. ნებტან ამაყ დო დუდშა დაჯერებულ ვორდჷ. მთელ ყურადღება ჩქიმ უნარეფშა დო თიშა მაფუდ გინოღალირ, მუდგას მივოჭირინე. ხვალე ჩქიმ დუდშო ფცხოვრენდჷ.

ართ დღას წებკითხჷ იესოშ გვალას ქადაგება (მათე, დუდეფ 5—7). დუდშე ვაგმაგინ იესოშ ნარაგადიქ ბედნერობაწკუმა დაკავშირებით. მაგალთო, თიქ თქუ, ნამდა ბედნერეფ რენა შქირენულეფ დო ჸუმენულეფ (ეფესოელები 5:5). მანგარო მიკვენდჷ, მუჭო შილებე თეცალ კოჩ ბედნერ რდას. მუთ უმოსის იბრკვიენდჷ, თით უმოსო ინვანჭუდ, ნამდა არძას მიღნა სულიერ მოთხოვნილებეფ. ჩქი თანდაბლურო ოკო ვაღიარათ თენა დო უკულ შემალებენა, დებკმაყოფილათ თე მოთხოვნილებეფ. იესოქ თქუ: „ბედნერეფ რენა სულიერს მოჸუმენაფილეფ“ (მათე 5:3).

გერმანიას ბიბლიაშ გურაფაშ დოჭყაფაშ უკულ მა დო ლორიქ დიო საფრანგეთშა დო უკულ იტალიაშა გეგნოფრთით. სოდგა მიფშითინ, ირდიხას იეჰოვაშ მოწმეეფს ბგორუნდით. ჩქიმწკუმა მანგარო იმოქმედ თი ჸოროფაქ დო ართობაქ, ნამუთ თინეფს უღდეს. ქობძირ, ნამდა იეჰოვაშ მოწმეეფ მართალო მსოფლიო საჯიმალო რენა (იოანე 13:34, 35). ჭიჭე ხანშა მა დო ლორიქ ხოლო დიბნათით დო იეჰოვაშ მოწმეეფო გინიფრთით.

ნათუაშ უკულ გუვაგრძელ ჩქიმ შინაგან პიროვნებაშ თირუა. მა დო ლორიქ ზღვათ აფრიკაჸურე მიდაფრთით დო ატლანტიშ ოკეანეთ ამერიკაშ შეერთებულ შტატეფშა გენოფრთით. მუჟამსით შქაგურ ოკეანეს გემით ხვალე ჩქი ჟირ ვორდით, ქიმეფხვად, მუნერ უმნიშვნელოეფ ვორეთ ჩქინ დიდებულ შემოქმედიშ კარს. შქა ოკეანეს რექინ, ბრელ მუთუნ ვა გაკეთებე, ათეშენ უმენტაშ დროს ბიბლიაშ კითხირს გიმურთუნდჷ. განსაკუთრებულო ბრელს ბკითხულენდჷ იესოშ დედამიწას ცხოვრებაშ გურშენ. თინა სრულყოფილ კოჩ რდუ დო თიცალ უნარეფ უღუდ, მუნერით მა დღას ვამაღვენუდ. მარა თის მუშ დუდშა ვა აფუდ ყურადღება გინოღალირ. თინა მუშ დუდშო ვარინ, მუშ ზეციერ მუმაშ ნებაშ შეიოსრულებერო ცხოვრენდჷ.

მუჟამსით იესოშ მაგალითშე დეფიფქრჷ, ქიმეფხვად, ნამდა ჩქიმ ცხოვრებას პირველ ადგილს ღორონთიშ სამეფო ოკო გივორინეკო დო ვართ ხოლო თინა, მუდგაშ კეთება მა მოკოდ (მათე 6:33). მუჟამსით მა დო ლორიქ ამერიკაშა გენოფრთით, გეგნობჭყვიდით, თექ ქუდოფსქიდითკო დო ყურადღება ჩქინ მსახურებაშა გეგნიბღითკო.

კურთხევეფ, ნამუთ მიბღჷ: ულირს, მუჟამსით ხვალე ჩქიმ დუდშე ფიფქრენდჷ, მიჭირდჷ გადაწყვეტილებეფიშ მეღება. მარა ასე ქიმვოგორე ნამდვილ სიბრძნეს, ნამუთ ფხემძღვანელენს (ესაია 48:17, 18). თეს გეძინელ, ქიმვოგორე ცხოვრებაშ აზრის, ნამუთ თეიშახ ვამჩქუდ, თენა რე ღორონთიშ თაყვანიშცემა დო შხვეფიშ მოხვარა, მეტ ქიგეგან ღორონთიშ გურშენ.

ბიბლიურ პრინციპეფიშ გიმორნაფაქ ჩქიმ დო ლორიშ ქორწინება უმოსო გამანგარ. ხოლო ართ კურთხევა თინა რე, ნამდა პჸუნა ძღაბ, ნამდგაქ ჭეშმარიტებას ირდჷ დო უჸორს იეჰოვა.

ჩქინ ცხოვრება ირო ვარდჷ ადვილ. მარა იეჰოვაშ მოხვარათ გინოჭყვიდილ მაფნა, ვემვოტუათ თიშა მენდება (ესაია 48:17, 18).