Salmu 2:1-12
2 E marĩ da, te aꞌuwẽ norĩ, ꞌRe ihâimana uꞌâsi mono na rosaꞌrada hã te te sima ꞌre ꞌmanharĩ wasété zaꞌra.E marĩ da, te simizaꞌrese ãna tarére na rosaꞌrada hã te te sima ꞌre ꞌmanharĩ zaꞌra.
2 Tiꞌai ãma isibꞌapito norĩ hã, duré dama iꞌrãnhoꞌõmo norĩ hã te Uburé Danhibꞌapito zada te te sima ꞌre rowaꞌõtõ zaꞌra, duré za apito te te ipisutu da zama.
3 Tawamhã ã hã iwasété norĩ hã te ãne te te sima ꞌre nharĩ zaꞌra:
“Oto isiptete zahuré zé hã wa te tiwi prub zaꞌrare waꞌaba.Wapawasisi ré ne siptete na te te ꞌre iwaꞌaꞌmadâꞌâ zahuré mono zé hã wa za tiwi wasina sinarĩ zaꞌra ni za.”
4 Tawamhã Uburé Danhibꞌapito, hâiwa ãma ꞌre isãmra mono hã te tisimasisizé ipire hawi we ta norĩ ãma hã ꞌre sihâ uꞌâsi. Te duré ãma ꞌre waꞌẽi uꞌâsi zaꞌra.
5 Tawamhã sitiꞌrui pese wa, te za tinhimiꞌamhâzépa na hã duré daꞌaꞌrãmi pese.
6 Tawamhã te ãne tinha: “Apito da, te ipisudu hã wa tô dasimasisizé ipire na hã tisã, Siã* ẽtẽ ꞌrãihâ nhisi ĩte iwazéb zahi ãmamhã.”
7 Tawamhã apito te tinha ãne: “Uburé Danhibꞌapito te te ĩma iwaihuꞌuzé, wa za dama sadawa ꞌmahâ.Uburé Danhibꞌapito, te ĩma tinha ãne:
‘A hã, ĩꞌra. Ã bâtâ na wa tô aimama na aima ꞌre ĩhâimana mono da hã ĩsiꞌãma aꞌube.
8 Maꞌãpé ĩwi rowaptẽrẽ. Tawamhã uburé aꞌuwẽ iwamri mono bâ ãma isitom na wa za te aima ꞌre anhomri.Uburé pese te za aima hã ꞌre dahâimana zaꞌra za, daro mono bâ.
9 Tawamhã isiꞌuwazi waré na te za ta norĩ hã ꞌre iꞌanhiꞌẽiꞌrare mo, zéꞌa na ubꞌrẽ da te ꞌre iprub zaꞌra mono ne.’ ”
10 Tahawa, apito norĩ, maꞌãpé asimizaꞌrese ꞌre aihâimana zaꞌra waꞌaba mono.Dama ipire norĩ, maꞌãpé ipire na te aima iwaihuꞌu zaꞌra waꞌaba zém na ꞌre asiꞌmadâꞌâ pese zaꞌra waꞌaba mono.
11 Uburé Danhibꞌapito ãma wazép sina, te za ãma ꞌre aiwata zaꞌra waꞌaba mo, isõꞌremhã ꞌre airẽrẽꞌẽ zaꞌra waꞌaba mono sina.
12 Ãnei õ wamhã, siꞌabaꞌré na asada sahi zaꞌra waꞌaba wamhã, te za aiꞌutõrĩ ꞌwa.Niꞌwam norĩ hã ꞌRe ihâimana uꞌâsi mono, iꞌwawi ꞌre isimapa zaꞌra mono zéb zô ꞌre isõpré mono norĩ si, te za to sina hã ꞌre hâimana uꞌâsi zaꞌra.
Ĩwaꞌõtõ piꞌreba watsuꞌu mono
^ 2:6 Siã hã Zeruzalẽ ꞌri nhoꞌu te wasuꞌu.
