Mateus 20:1-34
20 Zezusi hã ma tô duré rowasuꞌu romnhimiréꞌé na, tisiré ꞌre inomro mono norĩ ma, ãne:
— Hâiwa ãma ꞌre Isãmra mono, daꞌãma ꞌre isibꞌaꞌuwẽ mono zé hã aiwa uvaꞌru ꞌre tedeꞌwa ne, mararé iwatobro ne te te tãma iromhuri zaꞌra da hã te te awaibu da, tite uvaꞌru ꞌre ãma.
2 Tawamhã romhuriꞌwa norĩ ma, ma tô pisutu zaꞌra, za te te nasi tãma iꞌawaꞌâbâ na hã, bâtâ sidâpâ misi robꞌuiprazé isapotore ẽtẽ waipo prã ꞌmanharĩ na. Taha pari ma tô satõrĩ zaꞌra, tite uvaꞌru ꞌre u.
3 Tawamhã 9 na bâtâ pibuzéb ãma mararé, uvaꞌru ꞌre tedeꞌwa hã ma tô duré mo, da te dasina ꞌre iꞌubumroi mono zéb u. Tame ma tô sõpẽtẽ zaꞌra, aibâ norĩ hã marĩ te te ꞌmanharĩ zaꞌra ãna, isisimro hã.
4 Tawamhã ma tô tãma nharĩ zaꞌra, ãne: “Maꞌãpé a norĩ waꞌaba zama aiꞌabaꞌréi waꞌaba ĩte uvaꞌru ꞌre u, romhuri zaꞌra waꞌaba da. Aiꞌabaꞌréi waꞌaba wamhã, iꞌuwaibaba na wa za aima waꞌâbâ zaꞌra waꞌwa za.”
5 — Tawamhã aibâ norĩ hã ma tô aiꞌabaꞌré. Abzuma waꞌwamhã duré siꞌubdatõ bâtâ pibuzéb ãma uvaꞌru ꞌre tedeꞌwa hã ma tô tô õne ꞌmanha.
6 Bâtâ pibuzé hã imrotõ ãma hâiwahâ ma tô sina siri apâ, da te dasina ꞌre iꞌubumroi mono zéb u hã. Tame ma tô duré aibâ aimawi norĩ hã ꞌmadâꞌâ zaꞌra. Ãne ma tô sadanharĩ zaꞌra: “E marĩ wa, te bâtâ wahuré asimroi waꞌwa, marĩ ꞌmanharĩ ãna.”
7 — Asa ma tô ãne siwi sadaꞌâ: “Niꞌwa hã te te wawaibui õ wa, iwaꞌâbâ zô wa te romhuri zaꞌra da hã.”
— Tawamhã uvaꞌru ꞌre tedeꞌwa hã ma tõ ãne tãma nharĩ zaꞌra: “Maꞌãpé a norĩ waꞌaba zama aiꞌabaꞌréi waꞌaba, romhuri zaꞌra waꞌaba da, ĩte uvaꞌru ꞌre u.”
8 — Tawamhã oto mara wamhã, ite romhuriꞌwa norĩ ꞌmadâꞌâꞌwai ma, ma tô tinha, ãne: “Maꞌãpé, romhuriꞌwa norĩ zô aihârâ, pawaꞌâbâ zaꞌra da. Imorĩꞌrata na pawaꞌâbâ zaꞌra na daꞌrãsutuꞌu te iwaibu hã. Taha pari ãma ꞌrãsutu zaꞌra na, imorĩꞌrata na te iwaibu norĩ ãma.”
9 — Tawamhã aibâ norĩ hã hâiwahâ pesere, imrotõ na bâtâ pibuzéb ãma romhuri na te te isãnaꞌrata zaꞌra hã ma tô waibu, robꞌuiprazé isapotore ẽtẽ waipo prã prata ꞌmanharĩ hã misisi.
10 Tahawa, imorĩꞌrata na uvaꞌru ꞌre tedeꞌwa te te iwaibu norĩ hã ma tô rosaꞌrata zaꞌra, za danhipai u te te pawaꞌâbâ zaꞌra newa. Tane nherẽ, hâiba mono bâ ma tô tô õhõ si waibu, robꞌuiprazé isapotore misisi.
11 Robꞌuiprazé hã ma tô waibu. Taha pari ma tô aiwapsari zaꞌra, tinhibꞌapito ma.
12 Ãne ma tô tãma aiwapsari zaꞌra: “Wa norĩ hã bâtâ bâre wa tô romhuri zaꞌra ni, rowaꞌro nhiptete ꞌrowi. Tane nherẽ, ã hã aibâ norĩ hã, daꞌrãsutu ãma iwaibu hã misi bâtâ pibuzém na si ma tô romhuri zaꞌra. Tane nherẽ, ma tô ipawaꞌâbâ zaꞌra, aiwa wama iwaꞌâbâ zaꞌra ne.”
13 Tawamhã uvaꞌru ꞌre tedeꞌwa hã ma tô ãne tãma tinha, misi romhuriꞌwai ma: “Ĩsiwaihu, iꞌupa na aima ĩhâimana õ di. E wa te wasima waihuꞌu ã bâ, za te aima iwaꞌâbâ na hã misi robꞌuiprazé isapotore ẽtẽ waipo prã prata ꞌmanharĩ na.
14 Maꞌãpé âri ate hã. Taha pari aimorĩ, asõrõwa u. Wa ĩsima wẽ, ã hã aibâ daꞌrãsutu ãma te iꞌâri ma, te waꞌâbâ da, te aima iwaꞌâbâ ne, aiwa.
15 E marĩ, te ĩsima iwẽzéb zarina te ꞌmanharĩ ãna, marĩ ĩte na hã. E niwamhã, ma ĩnhoꞌru, wa hã dama ĩnhopru wa.”
16 Tawamhã Zezusi hã ma ãma ꞌrãsutu, ãne:
— Tane, ãhã na imorĩꞌrata na idahâimana zaꞌra hã, daꞌrãsutu u te za tahâimana zaꞌra ni za oto. Duré ãhã na daꞌrãsutu u idahâimana zaꞌra hã, imorĩꞌrata na te za tahâimana zaꞌra ni za oto.
Zezusi hã, siꞌubdatõ ãma tidâꞌâzém na isiwasuꞌuzé, duré za apâ ihâiwaꞌutuzém na zama
17 Zezusi hã duré tisiré ꞌre inomro mono norĩ me, Zeruzalẽ u te te saiꞌuri zaꞌra wamhã, ma tô ꞌmahârâ zaꞌra, isababa siꞌabaꞌré da. Tawamhã ma tô ãne tãma nharĩ zaꞌra:
18 — Maꞌãpé ĩwapari pese zaꞌra waꞌaba. Ãhã na hã wa aiꞌabaꞌré ni, Zeruzalẽ u. Tame te za Tiꞌai ãma Dasiré Ipodo hã hâiba nhomri ni, sasedoti nhibꞌihâꞌa norĩ ma, duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ ma zama. Tawamhã ta norĩ hã te za iwasédé hã ãma hiri zaꞌra. Taha zarina te za dama ꞌru zaꞌra, da te wĩrĩ da hã.
19 Taha pari te za siwi hâiba nho, zudeuꞌõ norĩ ma. Ta norĩ hã te za ãma tiwaꞌẽ zaꞌra. Te za te te siwi ꞌre préꞌé. Te za duré siwi sasõ wedepoꞌo nhonhiꞌrãmi na, dâꞌâ da. Tane nherẽ, siꞌubdatõ bâtâ ãma siꞌutõrĩ õ ré, te za apâ Imama hã hâiwaꞌutu.
Zebedeu mro, Zezusihi wi te te iwaptẽrẽzé
20 Tawamhã Zebedeu mro hã ma tô Zezusihi u wi, tiꞌra siꞌaibâ norĩ ré. Ipapara ma tô aime. Taha pari ma tô tiwi rowaptẽ.
21 Tawamhã Zezusi ma tô piꞌõ sadanha, ãne:
— E marĩ, te asima iwẽ.
Tawamhã piꞌõ hã ma asa sadaꞌâ, ãne:
— Maꞌãpé ropisutu, niwa Apito na asãmra wamhã, ã hã ĩꞌra siꞌaibâ norĩ maparane hã asababa simasisi da, ihâiba amo hã asimire niwĩ duré ihâiba amo hã asimiꞌe niwĩ.
22 Tawamhã Zezusi hã ma tô iꞌra norĩ ma nharĩ zahuré, ãne:
— Aima waihuꞌu aba õ di, iwaptẽrẽ aba zé hã. E sada asiptete waꞌaba di, ihâsi waꞌaba da hã, uva ꞌrãi waꞌu isé za te ihâꞌrẽne ne hã.
Asa ma sadaꞌâbâ zahuré, ãne:
— Ĩhe. Wa te hâsi waihuꞌu pese di.
23 Tawamhã Zezusi hã ma tô tãma nharĩ zahuré, ãne:
— Te za tô ĩsine ihâsi waꞌwa, ĩte uva ꞌrãi waꞌu isé hã. Tane nherẽ, wa hãi õ di, niꞌwa te ipisutu da hã, ĩnhimire niwĩ isãmra da hã duré ĩnhimiꞌe niwĩ. Ĩmama si ma tô pisutu siro, niꞌwam norĩ hã za isimasisi da hã. Taha si te za tisõ, niꞌwam norĩ ma, te te sima iwẽzéb zarina.
24 Tawamhã Zezusihi siré ꞌre inomro mono norĩ 10 na ihâiba zaꞌra, ãne hã te te wapari zaꞌra wamhã, ma tô sada tinhitiꞌru zaꞌra, tisisãnawã zahuré da hã.
25 Tahawa, Zezusi hã ma tô ꞌrâwi sitẽme sô tihârâ zaꞌra. Ãne ma tô tãma waihuꞌu zaꞌra:
— Aima waihuꞌu pese zaꞌra waꞌaba di. Tiꞌai ãma rotiꞌwa norĩ hã isimiroti ꞌre, te za ꞌre hâimana zaꞌra, isibꞌaꞌuwẽ norĩ hã. Duré dama ipire norĩ nhimiroti ꞌre, te za ꞌre hâimana zaꞌra.
26 Tane nherẽ, aiꞌreb zaꞌra waꞌaba, ãne hã ꞌre romhâimana mono tõ. Iwaꞌrãmi te za ꞌre iꞌmanharĩ zaꞌra waꞌaba mo. Niꞌwa hã dama pire da wamhã, dama romhuriꞌwa na te za ꞌre hâimana.
27 Duré niꞌwa hã imorĩꞌrata na hâimana da wamhã, pawaꞌâbâ ãna wapu na dama romhuriꞌwa ne, te za dama ꞌre hâimana.
28 Tane, Tiꞌai ãma Dasiré Ipodo hã da te tãma ꞌre romhuri zaꞌra mono da, wei morĩ õ di. Te te dama ꞌre iromhuri mono da hã, ma tô wei mo, duré tihâiba hã te te dazada sõmri da, daꞌahâ uptabi na te te daꞌanhoꞌreptu da.
Zezusi hã, maparane itobꞌa norĩ te te ipese zahuré zé
29 Tawamhã Zezusi hã duré tisiré ꞌre inomro mono norĩ me, Zerico hawi oto wairébé wamhã, daꞌahâ na ma tô isarina zaꞌra aiꞌabaꞌré ni.
30 Maparane itobꞌa norĩ hã bâdâdi zadaꞌré ãma isimasi hã ma tô wapari zahuré, niꞌwa te te tãma irowasuꞌu zahuré hã, Zezusi te te iroꞌrazâri na hã. Tahawa te nasi ꞌmahârâ zahuré, ãne:
— Apito, Davihi nhihudu, maꞌãpé waꞌãma aipẽꞌẽzé na.
31 Tane nherẽ, daꞌahâ na idasiꞌabaꞌré hã ma tô damreme tãma pẽtẽ zahuré ni, ariꞌiwi simasisi da. Tane nherẽ, ma tô tihârâ ma sé zahuré, ãne:
— Apito, Davihi nhihudu, maꞌãpé waꞌãma aipẽꞌẽzé na.
32 Tawamhã Zezusi hã ma tô mazazâ. Ma tô sô tihârâ zahuré. Ãne te sadanharĩ zahuré:
— E marĩ, te asima iwẽ waꞌwa, te aima iꞌmanharĩ aba da hã.
33 — Apito, wa wasima wẽ ni, wato wama ꞌridawa da. — Ãne ma tô sadaꞌâbâ zahuré, itobꞌa norĩ hã.
34 Tawamhã Zezusi hã ma tô ãma tipẽꞌẽzé zahuré. Tahawa, ma tô tõmo upi zahuré. Tawamhã awaꞌawi pesere ma tô oto robꞌmadâꞌâ zahuré. Taha pari ma tô isarina tineb zahuré.
