Lucas 22:1-71
22 Tawamhã Pascoa na dato nhisi na iꞌuꞌẽtẽ wapu mapuꞌõ, da te ꞌre ihuri mono zéb u roꞌrutu wa oto,
2 sasedoti tisiré norĩ ma ipire norĩ hã duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ me, te sima sô tinhopré, niha na piꞌuriwi Zezusi hã te te siwi wĩrĩ da, dama pahi zaꞌra wa, ta norĩ hã.
Zudasi hã, Zezusi te te dama ihâiba nhomrizé
3 Tawamhã Satanasi hã ma tô oto ãzé Zudasihi wa, Iscarioti na isisi amoi wa. Ta hã 12 na Zezusihi siré ꞌre inomro mono norĩ siré ꞌre imorĩ.
4 Tahawa, Zudasi hã ma tô oto mo, sasedoti ipire norĩ u duré ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ nhibꞌihâꞌa u, rosaꞌrada te te sima hiri zaꞌra da, Zezusi hã za te te tãma ihâiba nhomri zaꞌra na hã.
5 Tawamhã ma tô tãma rowẽ pese zaꞌra. Ma tô duré tãma ropisutu zaꞌra, robꞌuiprazé hã iwaꞌrãmi te te tãma sõmri zaꞌra da.
6 Tahawa Zudasi hã ma tô ãma dazaze. Tawamhã simizaꞌrese te oto tihâiba, bâdâ tãma iwisizéb zô, Zezusi hã te te tãma hâiba nhomri zaꞌra da, daꞌahâ na isiré idahâimana zaꞌra õ zéb zô.
7 Tawamhã bâdâ ma tô oto iwa waptãrã, dato ihâimanazé iꞌuꞌẽtẽ wapu mapuꞌõ, da te ꞌre ihuri mono zéb da hã. Taha bâtâ na hã Zudeu norĩ hã te poneꞌẽrebâ ꞌra hã te te ꞌre simro, Pascoa na dato nhisi ꞌre ihâimana mono zém na.
8 Tawamhã Zezusi ma tô Pedru norĩ Zuwãhã me satõrĩ zahuré. Ãne ma tô tãma nharĩ zahuré:
— Mo oto ane waꞌaba, asipi waꞌaba da, Pascoa na datozém na barana iwasaihurizéb da hã.
9 Tahawa te asa sadanharĩ zahuré, ãne:
— E momo te asima irowẽ, barana iwasaihurizéb da, wa te irobzaꞌra pese da hã.
10 Tahawa Zezusi hã ma tô tãma waihuꞌu zahuré, ãne:
— Ĩwapari pese aba! ꞌRi nhoꞌõmo u azasi aba wamhã, aibâ te za isõpẽtẽ ꞌwa, piza zéꞌa ꞌmanharĩ ꞌre, â te te iꞌâri hã. Taha zarina ane waꞌaba za, ꞌri isébrézéb u.
11 Tawamhã tame ꞌri tedeꞌwai ma nharĩ aba za, ãne: “Rowahutuꞌwa hã te wei wama tiꞌru, wa te asadanharĩ da, ãne: ‘E mame te ꞌri ꞌre waꞌwa hã tihâiba, isiré ꞌre inomro mono norĩ me isaihurizéb da hã, barana Pascoa na dato nhisi na.’ ”
12 Tawamhã ꞌri tedeꞌwa hã, ꞌri ꞌre waꞌwa hâimo te za aima wasuꞌu waꞌwa, irobꞌre zaꞌẽne hã. Tame wazô robzaꞌra pese aba za.
13 Tawamhã ma tô oto tipusi zahuré. ꞌRi nhoꞌõmo u zasi wamhã, uburé ma anhopẽtẽ zahuré, Zezusi hã te te tãma iwaihuꞌu zahuré zéb zarina. Tame ma tô robzaꞌra pese zahuré, Pascoa wa barana isaihurizéb da hã.
14 Tawamhã bâtâ pibuzé hã oto iwa waptãꞌã wamhã, Zezusi hã ma tô oto nhamra meza na. Isiré ꞌre inomro mono norĩ zama ma tô isiré asimro.
15 Taha pari ma tô tãma nharĩ zaꞌra, ãne:
— Wa tô ĩsima wẽ pese, ã mara na Pascoa na dasaihurizém na asiré ĩsa zaꞌra waꞌaba da, te robzépata wana ré.
16 E marĩ wa. Ãne wa za aima waihuꞌu zaꞌra waꞌwa: Niwa ã hã Pascoa na dasa na hã ĩsa zahu õ di za. Niwapsi wa za duré apâ ãma ĩsa, sena na iwaihuꞌuzé hã te te sina iꞌuwaimramizé bâtâ ãma si, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb ãma hã.
17 Tawamhã Zezusi hã ma tô hâsizé hã tiꞌâ, uva ꞌrãi waꞌu isé ré hã. ꞌRe ihâimana uꞌâsi mono ãma te tiwata. Taha pari te tãma nharĩ zaꞌra, ãne:
— Waibui waꞌaba, ã hã. Maꞌãpé asima sõmri aba mono.
18 Tô sena wa za aima waihuꞌu zaꞌra waꞌwa, ãne: Ã hã uva ꞌrãi waꞌu isé hã, niwa te hâꞌrẽne zahu õ di za. Niwapsi, wa za duré apâ hâꞌrẽ, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé bâdâ iwisizéb ãma si.
19 Tawamhã iꞌuꞌẽtẽ wapu hã ma tô duré tiꞌâ. ꞌRe ihâimana uꞌâsi mono ãma te duré tiwata. Taha pari ma tô te te wẽꞌẽ iꞌuꞌẽtẽ wapu. Isiré ꞌre inomro mono norĩ ma, ma tô te te sõmri. Ãne ma tô tãma nharĩ zaꞌra:
— Ã hã ĩhâiba, te wasuꞌu, asada zaꞌra waꞌaba za ĩsisõmrizé hã. Maꞌãpé huri aba, ĩꞌãma rosaꞌrata sina.
20 Tawamhã saihuri pari, tô õne ma duré tãma sõmri zaꞌra, uva ꞌrãi waꞌu zé hã. Te duré tãma nharĩ zaꞌra, ãne:
— Ã hã uva ꞌrãi waꞌu isé ré hâsizé hã, ꞌRe ihâimana uꞌâsi mono, tinhibꞌaꞌuwẽ norĩ ma, te te iropisutuzép té, te wasuꞌu, ĩwapru na asada zaꞌra waꞌaba za ĩwi isisaꞌwari hã.
21 Tane nherẽ, ĩhâiba nhomriꞌwa da hã ãhãta te ĩme nhamra, meza na.
22 Tiꞌai ãma Dasiré Ipodo hã te za tô dârâ, ꞌRe ihâimana uꞌâsi mono te te tãma ipisutuzéb zarina. Tazahã, Tiꞌai ãma Dasiré Ipodo te te dama ihâiba nhomri ma hã, tãma ꞌre ropipa uptabi mono di za!
23 Tahawa, isiré ꞌre inomro mono norĩ hã ma tô ꞌrâwi sisadanharĩ na sãnaꞌrata zaꞌra, niꞌwa hã za te te dama hâiba nhomri zô.
24 Tawamhã isiré ꞌre inomro mono norĩ hã ma tô duré sisadaꞌâbâ zaꞌra, niꞌwa iꞌreb zaꞌra hã, pire na tisiré norĩ nhipai u ꞌre hâimana mono zô.
25 Tahawa, te Zezusi hã tãma nharĩ zaꞌra, ãne:
— Tiꞌai ãma apito norĩ hã te simiroti tete na ꞌre hâimana zaꞌra, tinhibꞌaꞌuwẽ norĩ ma hã. Duré rotiꞌwa norĩ hã te da te ꞌre sisi zaꞌra, “Dasiwaihuꞌu” na.
26 Tane nherẽ, aiꞌreb zaꞌra waꞌaba hã, ãne hã ꞌre romhâimana mono tõ. Iwaꞌrãmi ꞌre ꞌmanharĩ zaꞌra waꞌaba mono, ãne: Aiꞌreb zaꞌra waꞌaba hã niꞌwa dama pire na za ꞌre ihâimana mono hã te za dama wapu na ꞌre hâimana. Duré niꞌwa dama robꞌruiꞌwa hã ꞌre hâimana mono, dama romhuriꞌwa na.
27 E ꞌwa hã danhipai u dama ipire. E meza na isãmra, tisa zô. E niwamhã dama dasai ꞌwapéiꞌwa. Tô meza na isãmra tisa zô, ta hã dama pire di. Tane nherẽ, asiré ꞌre ĩhâimana zaꞌra waꞌaba mono ré hã, dama dasai ꞌwapéiꞌwa na wa ꞌre ĩhâimana.
28 — A norĩ waꞌwa hã ma tô ĩsiré ꞌre anomro uꞌâsi aba mo, marĩ te ꞌre azépata mono ré hã.
29 Tahawa, ĩnhiptete na te ꞌre daꞌaꞌmadâꞌâ mono da, Ĩmama te te ĩma ipisutu ne, tane wa duré a norĩ waꞌaba zama aipisutu zaꞌra waꞌwa,
30 Daꞌãma ꞌre Ĩnhibꞌaꞌuwẽ mono zéb ãma ĩsiré ꞌre asaihuri aba mono da, duré ꞌre âhuri aba mono da. Tame te za Apito na ĩnhamrazéb ãma duré asimroi waꞌwa, danhibꞌapito simasisizém na, ãma rowairébé zaꞌra waꞌaba da, Izaraéu nhihudu norĩ 12 na iwamri ihâimana zaꞌra norĩ ãma hã.
Zezusi hã, Pedru te te ipoꞌre puꞌu siromo zé
31 Tawamhã Zezusi hã te Pedruhu ma tinha, ãne:
— Simau, Simau, ĩwapari pese! Satanasi hã ma tô aiwaptẽrẽ zaꞌra waꞌwa, uburé te te aipibu zaꞌra waꞌaba da, te te aiꞌupõrĩ zaꞌra waꞌaba da, trigu hã iꞌrãi uptabi si, da te ꞌre iꞌupõrĩ zaꞌra mono ne.
32 Tane nherẽ, Ĩmama wi, wa tô aiꞌãma rowaptẽ, asimiꞌumnhasizéb zô aiwi sô rowaptâꞌâ tõ da, duré apâ ĩtẽme asina siri wa, asisãnawã norĩ hã anhiptete da.
33 Tawamhã Pedru ma tô tinha Zezusihi ma, ãne:
— Apito, wa tô ĩsisaꞌra siro, asiré da te ĩnherẽ da hã dazazéb ꞌre, niwamhã duré da te ĩwĩrĩ da, asiré hã.
34 Tawamhã Zezusi hã ma tô tãma waihuꞌu siro, ãne:
— Pedru, tô sena wa za aima waihuꞌu siro. Ãhã na hã siꞌa hârâ wana ré, te za siꞌubdatõ dawi aiꞌudâ, aima ĩwaihuꞌu õ na.
Zezusi hã, isiré ꞌre inomro mono norĩ te te ipoꞌre puꞌu zaꞌra zé
35 Tawamhã Zezusi ma tô sadanharĩ zaꞌra, isiré ꞌre inomro mono norĩ hã, ãne:
— Romramizéb ãna duré roꞌwapézéb ãna duré aiparaꞌuza ãna, te datẽme asatõrĩ zaꞌra waꞌaba wamhã, e marĩ zô ma tô aiwi tirowaptâꞌâ zaꞌra waꞌwa.
— Marĩ zô, wawi rowaptâꞌâ zaꞌra õ di. — Ãne ma siwi sadaꞌâ.
36 Tawamhã Zezusi hã ma tô tãma nharĩ zaꞌra, ãne:
— Tane nherẽ, ãhã na hã wa za oto aima nharĩ zaꞌra waꞌwa, ãne: Romramizé hã niwamhã roꞌwapézéb zama aima hâimana zaꞌra waꞌaba wamhã, maꞌãpé asiré ꞌwasari aba oto. Duré niꞌwa te, sibꞌézé ꞌwapa baba wamhã, tiꞌuza ihâpa te te sada wede, te te sima ꞌmaiꞌuipra da.
37 E marĩ wa. Ãne ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã ãma nomro siromo wa: “Ma tô tãma robꞌmanharĩ wasété zaꞌra ni, ꞌRe ihâimana uꞌâsi mono nhimiroti zahi ꞌmadâꞌâ pese õ ꞌwa newa.” Tô sena wa za aima waihuꞌu zaꞌra waꞌwa. Ãne hã te za tô ĩꞌãma tiromhâiba. E marĩ wa. Ĩꞌãma robꞌuiꞌéré inomro hã, tô ihâimana da si.
38 Tawamhã isiré ꞌre inomro mono norĩ hã ma tô tãma nharĩ zaꞌra, ãne:
— Uburé Wanhibꞌapito, ãhãta maparane sibꞌézé ꞌwapa.
— Tôꞌã. — Ãne ma tô asa sadaꞌâbâ zaꞌra, Zezusi hã.
Zezusi hã, ẽtẽ ꞌrãihâ Olivera ãma isãmrazé
39 Tawamhã tihâimanazéb zarina, Zezusi hã ma tô oto mo, ẽtẽ ꞌrãihâ Olivera u. Isiré ꞌre inomro mono norĩ hã ma tô duré isiré aiꞌabaꞌré.
40 Tawamhã ro te te sima ipisutuzéb u wisi wamhã, Zezusi hã ma tô tãma nharĩ zaꞌra, ãne:
— Maꞌãpé, rowaptẽrẽ zaꞌra waꞌaba, aipibuzéb ꞌre, airereꞌe aba tõ da.
41 Tawamhã isiti zaꞌra ma tô mo, romhâ prã na. Tame ma tô hiꞌrãtitõ nhamra. Rowaptẽrẽ na ma tô oto sãnaꞌrata.
42 Ãne te rowaptẽ:
— Ĩmama, asima wẽ wamhã, ĩma baꞌa za, te irobzépatazé hã. Tane nherẽ, mare di, te ĩsima iwẽzéb zarina hã. Asima iwẽzéb zarina si.
43 Tawamhã hâiwa hawi romhuriꞌwa hã ma tô itẽme sihâiꞌré. Ta hã ma tô pawapto, siptete da.
44 Tawamhã tiwi robzeiꞌõ uptabi nherẽ, Zezusi hã ma tô oto saꞌẽtẽ uptabi rowaptẽ. Tawamhã isu hã dawapru ne ma tô tiwi tiꞌaꞌa, tiꞌai u.
45 Tawamhã te te rowaptẽrẽ pari, oto wahutu wamhã, ma tô apâ sina siri, isiré ꞌre inomro mono norĩ isiꞌubumrozéb u. Tane nherẽ, sõtõ zaꞌra ré, ma tô sõpẽtẽ zaꞌra, robzeiꞌõ hã saꞌẽtẽ na tãma hâimana zaꞌra wa.
46 Tahawa, te tãma nharĩ zaꞌra, ãne:
— E marĩ wa, te asõtõ zaꞌra waꞌwa. Aiwahutu zaꞌra waꞌaba. Rowaptẽrẽ zaꞌra waꞌaba da, aipibuzéb ꞌre, airereꞌe aba tõ da.
Zezusi hã, da te dasiwi iꞌârizé
47 Tawamhã Zezusi hã zahadu te te tãma nharĩ zaꞌra ré, ma tô daꞌahâ uptabi na aihutu ni. Zudasi hã ma tô te te danhimro, isiré ꞌre inomro mono 12 na ihâiba zaꞌra norĩ siré ꞌre imorĩ hã. Ta hã ma tô Zezusihi u aiꞌré, tobꞌrata hârâ na te te sawi da.
48 Tane nherẽ, Zezusi hã ma tô tãma tinha, ãne:
— Zudasi, e tobꞌrata hârâ na isawi na te za dama ihâiba zaꞌré, Tiꞌai ãma Dasiré Ipodo hã.
49 Tawamhã isiré ꞌre inomro mono norĩ Zezusihi siré ihâimana zaꞌra hã, ãne za iromhâimanazé te te ꞌmadâꞌâ zaꞌra wamhã, ma tô siwi sadanha, ãne:
— Uburé Wanhibꞌapito, e wa za daꞌwapé zaꞌra ni, sibꞌézé ꞌwapa na hã.
50 Tawamhã nima hã isiré ꞌre inomro mono norĩ siré hã ma tô sasedoti ipire uptabi ma romhuriꞌwa hã uꞌa, sibꞌézé ꞌwapa na. Ma tô poꞌre nhizâ, ipoꞌre nhimire niwĩ.
51 Tane nherẽ, Zezusi hã ma tô tiwi sawi, ãne:
— Tôꞌã. Tane hã ꞌmanharĩ tõ!
Tawamhã ma tô poꞌre upi. Tahawa ma tô pese apâ.
52 Taha pari, Zezusi hã ma tô tinha sasedoti ipire norĩ ma, duré ꞌRe ihâimana uꞌâsi mono nhorõwa ꞌri ꞌrãihâ ꞌmadâꞌâꞌwa norĩ nhibꞌihâꞌa norĩ ma, duré Zudeu norĩ ma rotiꞌwa norĩ ma zama, sô isõpré mono norĩ ma, ãne:
— E marĩ wa, ma we ĩzô aihutu ꞌwa, sibꞌézé ꞌwapa ré duré wede wãi ré zama. E wa hã danhibrob zô dapãrĩꞌwa pâ.
53 Bâtâ sidâpâsi, wa tô asiré ꞌre ĩhâimana zaꞌra waꞌwa, ꞌRe ihâimana uꞌâsi mono nhorõwa ꞌri ꞌrãihâ ãma hã. E niha bâ tame asiwi ĩꞌâri aba õ di. Tane nherẽ, ã hã tô bâdâ ate zaꞌra waꞌwa, te aima tihâimana zaꞌra waꞌwa, duré robra na Satanasi marĩ te te ꞌre iꞌabꞌmanharĩ mono zé, te te sima ꞌre iꞌawẽ mono zéb zarina.
Pedru hã, Zezusi te te iꞌudâzé
54 Tawamhã ma tô oto siwi tiꞌâ, Zezusi hã. Taha pari ma tô siwi saprõ, sasedoti tisiré norĩ nhipai u ipire uptabi nhorõwa u. Tawamhã Pedru hã ma tô te te pibu, romhâ na.
55 ꞌRi ꞌwawi waꞌra ꞌre rowaꞌwa ãma, uzâ te te oto siwi pré wamhã, Pedru hã ma tô tame dame nhamra, uzâ te te siwi iꞌuirĩ norĩ siré.
56 Tawamhã piꞌõ romhuriꞌwa hã ma tô ꞌmadâ unhama roꞌo na, unhama dawa sãmra ré. Ma tô ꞌmadâꞌâ pese. Tahawa te tãma tinha, ãne:
— Ã hã aibâ zama te Zezusihi siré ꞌre mo.
57 Tane nherẽ, Pedru hã ma tô aiꞌudâ. Ãne ma tô tãma tinha:
— Mare di. Ĩma waihuꞌu õ di, ã hã aibâ hã.
58 Tawamhã ãma ronomro prãi wi, ma tô duré aibâ hã ꞌmadâ. Ta hã te duré tãma tinha, ãne:
— A zama, te isiré zaꞌra ꞌre aimo.
Tane nherẽ, Pedru hã ma tô tãma tinha, ãne:
— Mare di. Isiré ꞌre ĩmorĩ zaꞌra õ di.
59 Tawamhã niwamhã misi bâtâ pibuzé, ãma siꞌutõrĩ parimhã, aimawi hã ma tô duré tãma tinha, ãne:
— Ã hã aibâ zama te isiré ꞌre timorĩ zaꞌra, tô Galiléia hawi wa duré.
60 Tahawa, Pedru te duré tãma tinha, ãne:
— Mare di. Tane inharĩ hã, ĩma waihuꞌu õ di.
Tawamhã zahadu te te tãma nharĩ ré, ma tô siꞌa hã hâ.
61 Tawamhã Uburé Wanhibꞌapito hã ma tô aipiꞌra. Sipiꞌrai wamhã, Pedru ma tô ꞌmadâꞌâ waré. Tahawa, Pedru hã ma tô poꞌre puru, Uburé Wanhibꞌapito te te tãma iwaihuꞌu siromo zém na hã, ãne: “Ãhã mara na hã siꞌa hârâ wana ré, te za siꞌubdatõ dawi ĩꞌudâ, aima ĩwaihuꞌu õ na hã.”
62 Tahawa, Pedru hã ma tô watobro ta hawi. Saꞌẽtẽ uptabi ma tô aiwaꞌõ.
63 Tawamhã aibâ norĩ, Zezusi te te siwi iꞌmadâ hã ma tô ãma tiwaꞌẽ zaꞌra. Te duré nasi siwi ahâ.
64 Ma tô siwi tob ubu. Taha sina te nasi siwi sadanha, ãne:
— E ꞌwa hã ma aiꞌazâ. Maꞌãpé ãma uwaimrami.
65 Ma tô duré timreme wasété na nasi ãma wasété zaꞌra, ãma waꞌẽ zaꞌra da.
66 Tawamhã awẽ wamhã oto, Zudeu norĩ ma rotiꞌwa norĩ hã ma tô siꞌrãꞌõtõ, duré sasedoti ipire norĩ hã duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama. Taha pari, ma tô siwi tiꞌru, Zezusi hã da te dasiwi saprõni da, isõꞌre u zaꞌra.
67 Itẽmeb zaꞌra, da te dasiwi ãwisi wamhã, ma tô Zezusi siwi sadanha, ãne:
— A hã Danhoꞌreptuiꞌwa da, ꞌRe ihâimana uꞌâsi mono te te iꞌaipisutu wamhã, maꞌãpé wama asiwasuꞌu zaꞌra na.
Tawamhã Zezusi hã ma tô asa tãma nharĩ zaꞌra, ãne:
— Tô sena wa hã Danhoꞌreptuiꞌwa na aima ĩsiwasuꞌu zaꞌra waꞌaba nherẽ, asiwi ĩzazei waꞌaba dai õ di za.
68 Te duré asadanharĩ zaꞌra aba wamhã, ãma asiwi ĩzadaꞌâbâ aba dai õ di za.
69 Tane nherẽ, ã hawim haré te za Tiꞌai ãma Dasiré Ipodo hã oto ꞌre sãmra, dama pire uptabi na, ꞌRe ihâimana uꞌâsi mono Iwaihuꞌu pese uptabi nhimire niwĩ.
70 Tahawa te uburé siré siwi sadanha, ãne:
— E tawamhã a hã, ꞌRe ihâimana uꞌâsi mono ꞌra.
Zezusi hã ma tô asa tãma nharĩ zaꞌra, ãne:
— Tane te a norĩ waꞌwa hã inharĩ zaꞌra waꞌwa.
71 Tahawa, ma tô nharĩ zaꞌra, ãne:
— E marĩ da, wa za duré amnhasi zaꞌra ni, iwasuꞌu wasété ꞌwa norĩ zô hã. Wasiꞌuihâ na wa tô wapari zaꞌra ni, nimosi te te sina inharĩzé hã.
