Galata 2:1-21
2 Tawamhã 14 na ĩꞌãma wahu pari, wa tô apâ mo, Zeruzalẽ u. Tawamhã tamomo ĩmorĩ wamhã, ma tô Banabé hã ĩsiré mo. Taha wamhã, Titu hã wa duré ĩsiré saprõ.
2 ꞌRe ihâimana uꞌâsi mono hã za apâ ĩmorĩzém na, te te ĩma waihuꞌu siromo wa, wa tô apâ hã mo. Tawamhã ꞌri nhoꞌõmo u wasihutu wamhã, aibâ dama ipire na ꞌre ihâimana zaꞌra mono norĩ me, wa tô wahâiba pisutu wasiꞌrãꞌõtõ ni. Tahawa, wa tô ta norĩ ma ĩsiwaihuꞌu, zudeuꞌõ norĩ ma, Wanhibꞌapito wasuꞌuwẽ hã te tãma ꞌre iwaihuꞌu zaꞌra mono zém na. Te te ãma ĩzaze zaꞌra zô, wa tô ĩnhimiromhurizém na tãma ĩsiwasuꞌu zaꞌra, te te ãma ĩzaze zaꞌra õ wamhã, taré ꞌre hâimana mono tõ da, ĩnhimiromhurizé hã.
3 Tawamhã ma tô ta norĩ hã ãma ĩzaze zaꞌra, zudeuꞌõ norĩ ma, te tãma ꞌre irowasuꞌu zaꞌra mono zém na. Tahawa, te te siwi pisutu zaꞌra õ di, Titu hã ĩsiré ꞌre imorĩ hã, sizudeu da. Titu hã gregu na ipodo, zudeuꞌõ. Ãne nherẽ, te te siwi pisutu õ di, sihâiwata nhizâri ré ꞌre imorĩ da hã, sizudeu da.
4 Niꞌwam norĩ si, zudeu norĩ hã ma tô iꞌupana sima wẽ zaꞌra, Titu hã sihâiwata nhizâri ré ꞌre imorĩ da hã. Ta norĩ hã wasiré Wanhibꞌapito zazei uptabi ꞌwa ꞌre nomro mono newa, ma tô hâimana nhipese sina wasiré ꞌre siꞌrãꞌõtõ, dama wapsãiꞌaꞌwa ne wahâimanazé ma, te te ꞌre ropibu zaꞌra mono da, rowẽ na ꞌre iwahâimana zaꞌra mono zéb zô, Cristu Zezusihi ãma. Ta norĩ hã zudeu norĩ hã, ma tô sima wawẽ zaꞌra, isine ꞌRe ihâimana uꞌâsi mono nhimiroti ꞌrata na robꞌuiꞌéré zarina, wa te ꞌre robꞌmanharĩ uꞌâsi zaꞌra mono da, taha zarina wanhoꞌreptuzé hã wa te wasina ꞌre uwaimrami zaꞌra mono da newa.
5 Tane nherẽ, ta norĩ nhimirosaꞌrata na hã, wa te ãma saze zaꞌra õ di. Mare uptabi di. Wa tô wasima wẽ zaꞌra ni, Zezu Cristuhu wasuꞌuwẽ uptabi si, aima ꞌre hâimana zaꞌra waꞌaba mono da. Tahawa, ta norĩ nhimirosaꞌrata na hã wa te ãma saze zaꞌra õ di.
6 Dama ipire zaꞌra norĩ ma, ĩnhimiromhurizém na tãma ĩsiwaihuꞌu zaꞌra parimhã, marĩ asa te te ĩma waihuꞌu zaꞌra õ di, imreme zaꞌra nhipai u, zudeuꞌõ norĩ ma, te tãma ꞌre irowasuꞌu zaꞌra mono zéb da na hã. Ta norĩ hã pire na dama ꞌre hâimana zaꞌra mono nherẽ, ipire na te ãma ꞌre rosaꞌrata zaꞌra mono õ di, wa hã. E marĩ wa. ꞌRe ihâimana uꞌâsi mono hã dapire na te te daꞌãma ꞌre rosaꞌrata mono õ wa, tãma hã taré wa.
7 Ãne si ma tô aibâ norĩ hã siwi ĩwaihuꞌu zaꞌra, ꞌRe ihâimana uꞌâsi mono tô sena te te ĩpisutu na, zudeuꞌõ norĩ ma, Wanhibꞌapito wasuꞌuwẽ hã te tãma ꞌre wasuꞌu zaꞌra mono da, Pedru hã te te ipisutu ne, tisiré zudeu norĩ ma, te te ꞌre rowasuꞌu mono da.
8 ꞌRe ihâimana uꞌâsi mono hã ma tô Pedru hã te te ꞌre pawapto tiwaihuꞌu pese na, tisiré zudeu norĩ ma, Cristu hã te te tãma ꞌre iwasuꞌu zaꞌra mono zéb da hã, ta norĩ u si te te satõrĩ wa. Tane duré wa hã tiwaihuꞌu pese na ma tô te te ꞌre ĩpawapto, zudeuꞌõ norĩ ma, Cristu te tãma ꞌre iwasuꞌu zaꞌra mono zéb da hã, ta norĩ u si te te ĩzatõrĩ na dâꞌâsina, wa hã.
9 Tahawa, ma tô oto Tiagu norĩ hã ĩꞌãma waihuꞌu zaꞌra, tãma ĩzawi pese wa, ꞌRe ihâimana uꞌâsi mono te te sima ĩpisutuzém na hã. Õ norĩ hã isimiroti pire na ma tô Wanhibꞌapito zazeiꞌwa norĩ hã ãma waihuꞌu zaꞌra, Tiagu hã, Pedru hã, duré Zuwã. Tawamhã ta norĩ hã ꞌRe ihâimana uꞌâsi mono te te ĩpisutuzém na te te ĩꞌãma waihuꞌu zaꞌra wa, ma tô tinhibꞌrata na siwi wazawi zaꞌra, Banabéhé me. Wama wẽ zaꞌra di, wa norĩ hã zudeuꞌõ norĩ u si ꞌre waneb da, Cristuhu wasuꞌuwẽ na, wa te tãma ꞌre romhuri zaꞌra mono da. Duré wama wẽ zaꞌra di, Tiagu norĩ si, tisiré zudeu norĩ u si ꞌre inomro mono da hã, Pedru norĩ me. Ãne na wa tô wanhimirosaꞌrata na wasisaze zaꞌra ni.
10 Ãne si ma tô wama waihuꞌu zaꞌra, Tiagu norĩ hã, Wanhibꞌapito zazeiꞌwa norĩ isimarĩꞌõ norĩ hã wanhimarĩ na wa te ꞌre pawaptob uꞌâsi zaꞌra mono da, ꞌre wapoꞌre simrami zaꞌra mono ãna. Ãne zô, wa ĩsima te ꞌre rosaꞌrata uꞌâsi, iwẽ na si te ꞌre daꞌapawapto mono da.
Paulu hã Pedruhu ma te te irowaihuꞌuzé
11 2:11-12 Tawamhã Ãtioquia ãma ĩnhamra ré, ma tô Pedru hã ãma ĩzarina wi. Tawamhã zudeuꞌõ norĩ ãma tinhimirosaꞌrata na te te upai wa, wa tô danhoꞌa tãma rowaihuꞌu. Ãne tinhimirosaꞌrata na te te iꞌupazé hã. Ãtioquia u wisi wamhã, ma tô aré zudeuꞌõ norĩ me ꞌre sa, Wanhibꞌapito zazeiꞌwa norĩ me hã. Tawamhã isarina si ma duré aibâ norĩ hã aihutu, Tiaguhu hawimhã. Ta norĩ hã ma tô te te sima ꞌre wẽ zaꞌra, Wanhibꞌapito zazeiꞌwa norĩ zudeuꞌõ hã, sihâiwata nhihâri ré si ꞌre nomro mono da, tawapsi sizudeu zaꞌra na ꞌre hâimana zaꞌra mono da. Tawamhã zudeuꞌõ norĩ hã, Wanhibꞌapito zazeiꞌwa oto wasiré ꞌre wahâimana zaꞌra mono nherẽ, ma tô Pedru hã tiwi sisawi zaꞌra, oto dasiré ꞌre sa tõ mono da. E marĩ wa. Zudeuꞌõ norĩ siré ꞌre sai uꞌâsi mono wa, te te siwi wẽꞌõ zaꞌra õꞌumnhasite, we isihutu norĩ hã.
12 ꞌMadâꞌâ 2:11
13 Tawamhã Pedruhu ne dazadamnhasi te, te oto isiré zudeu norĩ hã tiwi sisawi zaꞌra, zudeuꞌõ norĩ wi, Wanhibꞌapito zazeiꞌwa oto wasiré ꞌre wahâimana zaꞌra mono nherẽ. Banabéhé zama ma tô dazadamnhasi te, tiwi sisawi zaꞌra.
14 Ãne na ma tô Pedru norĩ hã tinhimirosaꞌrata na upa zaꞌra, zudeuꞌõ norĩ ãma hã. Tô sena Cristuhu wasuꞌuwẽ zarina si oto dama ꞌre hâimana zaꞌra mono õ di, Pedru norĩ hã. Ãne wa tô ãma waihuꞌu zaꞌra. Tahawa, wa tô Pedruhu ma tinha, uburé Wanhibꞌapito zazeiꞌwa norĩ nhoꞌa, ãne: “A hã zudeu nherẽ, ma tô zudeuꞌõ norĩ siré ꞌre asai mo aré, a hã zudeuꞌõ ꞌre aihâimana mono newa. E niha ma tô bété oto tiwi asisawi zaꞌra, zudeuꞌõ norĩ wi, aꞌâ sizudeu zaꞌra da, isazeiꞌwa norĩ hã.” Ãne wa tô tãma tinha.
15 Wa norĩ hã zudeu na wa tô wapoto ni. Zudeuꞌõ na wapoto õ di, siwaꞌru ꞌre inomro mono norĩ ne.
16 Wa norĩ hã wa tô oto marĩ hã waihuꞌu ni, ꞌRe ihâimana uꞌâsi mono te te ꞌre idaꞌawẽsãmri mono zém na hã. Zezu Cristu, Danhoꞌreptuiꞌwa na da te dasina ꞌre umnhasi zaꞌra mono wamhã, ꞌRe ihâimana uꞌâsi mono, dawasédé hã te te daꞌãma ꞌre iꞌabꞌmadâꞌâ mono õ zéb zarina, te oto te te ꞌre daꞌawẽsãmri. Taha zarina, dawasété ꞌru te, te te dahâ zaꞌra õ di za, robꞌrãsutuzéb ãma hã. Isimiroti na Mozési te te irobꞌuiꞌéré ꞌrata zarina, da te ꞌre robꞌmanharĩ zaꞌra mono nherẽ, taha zarina te te dama ꞌre apari mono õ di za, dawasédé hã. Ãne na wa tô oto waihuꞌu ni, wa norĩ hã.
17 Tahawa, Cristu Zezusi hã wa tô wasina umnhasi zaꞌra ni, taha zarina si wawasédé hã te te oto waꞌãma ꞌre abꞌmadâꞌâ tõ mono da, tawapsi te te ꞌre waꞌawẽsãmri mono da, ꞌRe ihâimana uꞌâsi mono hã. Isimiroti na robꞌuiꞌéré zarina, da te ꞌre robꞌmanharĩ zaꞌra mono nherẽ, taha zarina te te dama ꞌre awaihuꞌu mono õ di za, dawasédé te te daꞌãma ꞌre iꞌabꞌmadâꞌâ mono õ na. Tahawa, wa norĩ hã ꞌRe ihâimana uꞌâsi mono nhimiroti ꞌrata na robꞌuiꞌéré zarina, wa te ꞌre irobꞌmanharĩ mono zém na wa te ꞌre ꞌmadâꞌâ mono õ di oto, taha zarina wawasédé hã te te waꞌãma ꞌre iꞌabꞌmadâꞌâ mono õ zéb zarina, te te ꞌre waꞌawẽsãmri mono da, ꞌRe ihâimana uꞌâsi mono hã. Wa norĩ hã Cristu, Danhoꞌreptuiꞌwa na wa tô wasina saze ni, taha zarina si wawasédé hã te te waꞌãma ꞌre abꞌmadâꞌâ tõ mono da, tawapsi oto duré te te wawẽsãmri mono da, ꞌRe ihâimana uꞌâsi mono hã. Isimiroti na robꞌuiꞌéré ꞌrata zarina wa te ꞌre irobꞌmanharĩ mono zém na, wa te ꞌre ꞌmadâꞌâ mono õ di oto, taha zarina, te te wanhoꞌreptu dai õ wa. Ãne wa, ma tô niꞌwam norĩ hã wama nharĩ zaꞌra, zudeu norĩ hã, wanhimirosaꞌrata na wa te ãma upa newa, aimawi na. E tô iꞌuwaibaba ãne hã. Mare di. Cristu te te wama iwaihuꞌuzéb zarina, wanhimirosaꞌrata na wa te ãma upai ꞌwaꞌâhã, te aré Cristu hã wanhowa ãma upa naꞌrata, te te wama iwaihuꞌuzém na hã. E tô sena, ma tô Cristu hã wanhowa ãma upa naꞌrata. Mare di. Te te ãma upai waihuꞌu õ di. Mare uptabi di.
18 Wa hã wa oto te dama ꞌre awaihuꞌu uꞌâsi, ꞌRe ihâimana uꞌâsi mono nhimiroti ꞌrata na robꞌuiꞌéré zarina, da te ꞌre robꞌmanharĩ zaꞌra mono nherẽ, taha zarina, ꞌRe ihâimana uꞌâsi mono za te te ꞌre idaꞌanhoꞌreptui mono õ na. Tawamhã nimahã na ĩnhimirosaꞌrata na te saprĩ wamhã, wa za tô tãma ãma upa. Tawapsi ĩwẽꞌõre di za.
19 2:19-20 Ãne te aré ĩnhimirosaꞌrata ꞌrada hã ĩma ꞌre hâimana: ꞌRe ihâimana uꞌâsi mono nhimiroti ꞌrata na robꞌuiꞌéré zarina te ꞌre robꞌmanharĩ mono wamhã, taha zarina si ĩwasédé hã te te ĩꞌãma ꞌre ꞌmadâꞌâ mono õ di za. Tawapsi te za oto te te ꞌre ĩwẽsãmri. Taha zarina ĩwasété ꞌru te, robꞌrãsutuzéb ãma te te ĩꞌazâri õ di za, ꞌRe ihâimana uꞌâsi mono hã. Ãhã na ĩnhimirosaꞌrata ꞌrada hã te oto ĩzaꞌu ꞌre simiꞌwara. Ta hã wa tô oto rẽme pese ĩsipara, ꞌRe ihâimana uꞌâsi mono te te ĩma iwaihuꞌuzéb uwaibaba si ꞌre ĩmorĩ da. Zezu Cristu, wedepoꞌo nhonhiꞌrãmi na dâꞌâ wa, isiré ĩdâꞌâ ne, ĩsiꞌuihâ na te ĩsima ꞌre irosaꞌrata mono zém na ꞌre ĩhâimana mono õ di oto, Cristuhu si oto ĩpẽꞌẽ ꞌre, ꞌre hâimana mono wa, ꞌre ĩwadaꞌuri wẽ mono ꞌwa da hã. Cristu hã, ꞌRe ihâimana uꞌâsi mono ꞌra. Ta hã te te ꞌre ĩzawi pese mono wa, ma tô ĩzada sisõ, ĩzada dâꞌâ da. Tahawa, ꞌRe ihâimana uꞌâsi mono ꞌra umnhasi sina, wa oto ꞌre ĩhâimana.
20 ꞌMadâꞌâ 2:19
21 Wa hã te ĩsiwi ꞌre wẽꞌõ mono õ di oto, ꞌRe ihâimana uꞌâsi mono te te ꞌre ĩzawi pese mono zé hã, Cristu te te ĩwaꞌâbâzém na dazada idâꞌâzém na hã. Tahawa, ĩsiꞌuihâ na ĩsisõꞌreptu dai õ wa, ꞌRe ihâimana uꞌâsi mono nhimiroti ꞌrata na robꞌuiꞌéré zarina te ꞌre irobꞌmanharĩ mono zém na, te ꞌre abꞌmadâꞌâ mono õ di oto, taha zarina, ĩwasédé hã te te ĩꞌãma ꞌre abꞌmadâꞌâ tõ mono da, te te ꞌre ĩwẽsãmri mono da oto, ꞌRe ihâimana uꞌâsi mono hã. Dasiꞌuihâ na dasisõꞌreptu dai õ wa, ꞌRe ihâimana uꞌâsi mono nhimiroti ꞌrata na robꞌuiꞌéré zarina, da te ꞌre robꞌmanharĩ zaꞌra mono nherẽ, taha zarina te te dama ꞌre apari mono õ di dawasédé hã, da te ꞌre iꞌmanharĩ zaꞌra mono zé hã. Ãne ꞌwaꞌâhã, aré marĩ dai õ di, Zezu Cristu dazada idâꞌâzé hã. Tahawa, te oto ĩsiwi ꞌre wẽꞌõ mono õ di, ꞌRe ihâimana uꞌâsi mono te te ꞌre ĩzawi pese mono zé hã, Cristu te te ĩwaꞌâbâzém na, dazada idâꞌâzém na hã. Mare uptabi di. Ãne Pedruhu ma, te tãma ãma irowaihuꞌuzé mono hã.
