1 Pedru 4:1-19
4 Tahawa, Cristu hã tihâiba na te te irobzépata ne, te za ꞌre asisaꞌra wẽ zaꞌra waꞌaba mo, te te irosaꞌrata ne, rosaꞌrata zaꞌra waꞌaba da, za isine ꞌre irobzépata zaꞌra waꞌaba mono na hã. E marĩ wa. Niꞌwa hã tihâiba na te te robzépata wamhã, tiwasédé hã te za oto rẽme pese.
2 Tahawa, ã hawimhã oto tiꞌai ãma aihâimanazé, ꞌre iꞌrãsutu zaꞌra waꞌaba mono zéb u, ꞌRe ihâimana uꞌâsi mono te te sima ꞌre iwẽ mono zéb zarina si, ꞌre aihâimana zaꞌra waꞌaba mono. Mare di, ꞌrâwi marĩ iwasédé, da te dasima ꞌre iwẽ zaꞌra mono zéb zarina si hã.
3 Duréihã ma tô aiꞌãma tironomro hâ zaꞌra waꞌwa, ꞌRe ihâimana uꞌâsi mono zazeiꞌõꞌwa norĩ te te ꞌre iꞌmanharĩ zaꞌra mono ne, ꞌre iꞌmanharĩ zaꞌra waꞌaba mono zém na hã. Taha bâtâ mono na hã ma tô aré siwaꞌru ꞌre aihâimana zaꞌra waꞌaba mo, dasina dahâimana wasété na duré ꞌrâwi marĩ iwasété si, da te dasima ꞌre iwẽ zaꞌra mono zém na, duré âzé na dasiꞌrãiwamnarĩ na duré dato iwẽꞌõ na duré siwaꞌru marĩ na da te dasima ꞌre rowẽ zaꞌra mono da, ꞌre idasiꞌrãꞌõtõ mono zém na duré ihâibaꞌõ na dawata na iwasété uptabi na zama.
4 Tahawa, ãhã na hã ꞌRe ihâimana uꞌâsi mono zazeiꞌõꞌwa norĩ hã te te oto aimawi ꞌre aiꞌmadâꞌâ zaꞌra waꞌwa, isiré oto ꞌre aihâimana zaꞌra waꞌaba mono õ wa, dahâimanazé iwasété na duré siwaꞌru dasima iwẽ na dahâimana na zama. Tahawa, te ta norĩ hã te te aiꞌãma ꞌre wasété zaꞌra waꞌwa.
5 Tazahã, ta norĩ hã niwapsi te za tihâimanazém na siwasuꞌu zaꞌra, te te daꞌãma ꞌre arowairébé mono da, ꞌre isimipari mono ma, ihâiba ré norĩ ãma duré idâꞌâ norĩ ãma zama.
6 Tahawa, Rowasuꞌuwẽ ité hã ma tô wapari zaꞌra idâꞌâ norĩ zama, ta norĩ hã ma tô tidâꞌâ zaꞌra ꞌRe ihâimana uꞌâsi mono te te daꞌãma ꞌre iꞌarowairébézé mono uꞌâbâ, uburé aibâ norĩ ꞌre idâꞌâ zaꞌra mono ne. Rowasuꞌu wẽ ité hã ma tô wapari zaꞌra duré õ norĩ zama ꞌre hâimana zaꞌra mono da tihâiba uptabi na, ꞌRe ihâimana uꞌâsi mono te te sima ꞌre iwẽ mono zéb zarina.
ꞌRe ꞌmadâꞌâ pese zaꞌra waꞌaba mono, ꞌRe ihâimana uꞌâsi mono nhoprubzé iwẽ uptabi hã
7 Uburé iropsiꞌutõrĩzéb u hã, romhuture di oto. Tahawa, maꞌãpé ãma ꞌre pibui pese zaꞌra waꞌaba mono, marĩ na ãma ꞌre upa zaꞌra waꞌaba mono tõ da. Duré asimizaꞌrese ꞌre aihâimana zaꞌra waꞌaba mono, ꞌre rowaptẽrẽ uꞌâsi zaꞌra waꞌaba mono da.
8 Uburé marĩ nhipai u, maꞌãpé ꞌre asisawi pese zaꞌra waꞌaba mono. E marĩ wa. Dasisawizé hã te za dawasédé hã te te ꞌre aꞌupsibi, ahâ uptabi nherẽ.
9 Asõrõwa u ꞌre asiwaibui wẽ waꞌaba mono, aiwapsari aba ãna.
10 Asima ꞌre romhuri wẽ zaꞌra waꞌaba mono, romhuri mono bâ ꞌRe ihâimana uꞌâsi mono tinhoprubzé iwẽ uptabi hã sipuꞌu pese na te te aima isõmri zaꞌra waꞌaba zém na. Tô ꞌRe ihâimana uꞌâsi mono nhoprubzé iwẽ uptabi na asima ꞌre iꞌaihâimana zaꞌra waꞌaba mono da si, iwẽ hã.
11 Rowahutuꞌwai wamhã, ꞌRe ihâimana uꞌâsi mono nhimiroti na si ꞌre rowahutu zaꞌra waꞌaba mono. Dapawaptoꞌwai wamhã, ꞌRe ihâimana uꞌâsi mono asiptede te te aima ꞌre isõmri zaꞌra waꞌaba mono zéb zarina si, dama ꞌre romhuri zaꞌra waꞌaba mono. Ãne uburé marĩ hã ꞌre ꞌmanharĩ zaꞌra waꞌaba mono, ꞌRe ihâimana uꞌâsi mono ãma si ꞌre dawata zaꞌra mono da, Wanhibꞌapito Zezu Cristuhu nhimipawaptobzéb zarina. ꞌRe ihâimana uꞌâsi mono hã wẽ uptabi wa, duré waihuꞌu pese uptabi wa, wa za ãma ꞌre wawata uꞌâsi zaꞌra.
Wanhibꞌapito zazeiꞌwai wa, wa te ꞌre irobzépata zaꞌra mono zé
12 Ĩsisãnawã norĩ, ĩma iꞌasawi pese zaꞌra waꞌaba norĩ hã, ꞌre aꞌrãmi zaꞌra waꞌaba mono tõ, aipibuzé ipire asada ꞌre iwairébé aba mono ma hã, ꞌre sépata zaꞌra waꞌaba mono da, marĩ isaꞌreseꞌõ aimawi hã asada ꞌre hâimana zaꞌra waꞌaba mono newa.
13 Tane nherẽ, ãma asima ꞌre rowẽ zaꞌra waꞌaba mono, Cristu te te irobzépata ne, ꞌre robzépata zaꞌra waꞌaba mono wamhã, ta hã niwa apâ wei morĩ wamhã, tite rowaꞌa zaꞌẽne, ꞌRe ihâimana uꞌâsi mono za te te dama ihâiꞌrézéb ãma hã, aima rowẽ uptabi zaꞌra waꞌaba da.
14 Cristuhu zazeiꞌwa ꞌre anomro waꞌaba mono ꞌru te, da te aiꞌãma ꞌre wasété zaꞌra waꞌaba mono wamhã, aima ꞌre rowẽ uptabi zaꞌra waꞌaba mono di za. E marĩ wa. ꞌRe ihâimana uꞌâsi mono Pẽꞌẽzani Iwẽ uptabi hã, aiwa ꞌre hâimana zaꞌra waꞌaba mono wa.
15 Tane nherẽ, a norĩ waꞌwa ꞌre iꞌaihâimana zaꞌra waꞌaba mono ꞌremhã, niꞌwa hã te te robzépata wamhã, mare di te te daꞌmaiwĩrĩ wa, mare di simisaihuri wa, mare di duré dama robꞌmanharĩ wasétéꞌwai wa, niwamhã duré mare di, titei õ nherẽ, dahâimanazéb u dawi ꞌre zasi mono wa.
16 Tazahã, niꞌwa hã isazeiꞌwai wa, te te ꞌre robzépata mono wamhã, ꞌre sisé mono tõ. ꞌRe ihâimana uꞌâsi mono ãma si ꞌre wata mono, isisi uꞌâbâ, ꞌre hâimana mono wa.
17 Bâdâ hã ma tô oto iwa waptãrã, dahâimanazéb zarina daꞌãma rowairébézéb da hã. Ta hã, ꞌRe ihâimana uꞌâsi mono nhibꞌaꞌuwẽ, ꞌre ihâimana zaꞌra mono norĩ hawi te za tinhanaꞌrata. Wahawib zaꞌra sãnaꞌrata da wamhã, e niha za tawamhã, ihâimana ꞌrãsutu zaꞌra zé hã, ꞌRe ihâimana uꞌâsi mono nhimiroti te te ꞌre iꞌmadâꞌâ pese zaꞌra mono õ norĩ hã.
18 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré inomro hã, ãne:“Ropire hã tãma ꞌre hâimana zaꞌra mono nherẽ, te za iwẽ norĩ hã, tinhoꞌreptuzé hã te te sina ꞌre uwaimrami zaꞌra. E niha te za bété iwasété norĩ ma hã tiromhâimana zaꞌra, tiwasété si te te ꞌre iꞌmanharĩ zaꞌra mono norĩ ma hã.”
19 Tahawa ꞌRe ihâimana uꞌâsi mono te te sima ꞌre iwẽ mono zéb zarina te te ꞌre irobzépata zaꞌra mono hã, te za tô tipẽꞌẽzani na te te sina ꞌre umnhasi zaꞌra, marĩ iwẽ te te ꞌre ꞌmanharĩ zaꞌra mono ré hã. ꞌRe ihâimana uꞌâsi mono hã Roꞌapoto mono ꞌwa. Ta hã wa za wa te wasina ꞌre umnhasi zaꞌra.
