ʼE FETOGI E TE TOHI-TAPU TE ʼU MAʼULI
Neʼe Au Manatu ʼe Lelei ʼOsi Toku Maʼuli
-
TONA TAʼU TUPU: 1982
-
TONA FENUA: POLOGNE
-
TONA HISITOLIA: NEʼE AU AGAMALOHI, MO FAKAʼAOGAʼI TE TOLOKE PEA MO FAIGA KE MAʼU HAKU GAUE LELEI
TOKU MAʼULI ʼI MUʼA ATU:
Neʼe au tupu ake ʼi he kiʼi kolo ʼo Pologne ʼe ovi ʼi te tuʼakoi ʼo Siamani. Neʼe au maʼuli ʼi he koga meʼa ʼe mole logoaʼa. Neʼe fakalotomalohiʼi au e ʼaku matuʼā ke au liliu ko he tahi ʼe agalelei. Neʼe nā loto ke au ako lelei ʼi te fale ako pea mo faiga ke au maʼu haku gaue lelei.
Neʼe kamata ʼoku fihifihia ʼi taku alu ʼo hoko atu taku ako ʼi te univelesite ʼi te kolo ko Wrocław. ʼI taku kua mamaʼo mai ʼaku matuʼā, neʼe au fakakaugā mo he ʼu hahaʼi ʼe mole lelei ʼanatou aga. Neʼe au leleiʼia te ʼaka fitipolo pea ʼaki te fakaneke ʼo ʼoku kaumeʼa neʼe toe ʼasili age taku leleiʼia te faigaoʼi ʼaia. Ko te kau faigaoʼi ʼae neʼe au leleiʼia neʼe ʼomai mai Varsovie. Pea ka fakaʼosi vahaʼa ʼe au muliʼi ʼanatou feʼoloʼaki ʼi te ʼu koga meʼa ʼae ʼe olo ʼo gaoʼi ai. Neʼe au inu kava ʼi taku feʼaluʼaki ʼaia, mo fakaʼaogaʼi te toloke pea mo fuhu mo natou ʼae ʼe mole lagolago ki te foʼi gaoʼi ʼae ʼe au leleiʼia. Neʼe mahino kia au ʼe ko te faʼahiga fai ʼaia ke pulihi ai te ʼu tuʼania ʼo te maʼuli ʼae ʼo te ʼaho fuli. Neʼe au iloʼi kapau ʼe puke au e te kau polisi ʼe mole kei ʼi ai anai hoku matagafua lelei ʼi taku gaue avoka.
Ko au mo ʼoku kaumeʼa neʼe matou leleiʼia te olo ki te ʼu fale meʼe. Ka matou tau atu ki ai, ʼe matou tau fuhu ʼi te ala. Neʼe tuʼa lahi toku puke e te kau polisi. Kaʼe neʼe au faiga tuʼumaʼu ke mole lahi ʼoku fihifihia mo te lao. ʼE ʼi ai ʼihi temi neʼe au totogi fakafufu ai te kau polisi. Neʼe au manatu ʼe lelei ʼosi toku maʼuli. ʼI taku fai te ʼu faʼahi ʼaia, neʼe au iloʼi lelei ʼosi pe ʼe kovi te ʼu meʼa ʼae neʼe au fai. Koia, neʼe au alu ʼi te ʼAhotapu fuli ʼo misa ke fimalie toku leʼo ʼo loto.
TE FETOGI ʼO TOKU MAʼULI E TE TOHI-TAPU:
ʼI te taʼu 2004, neʼe ʼomai te ʼu Fakamoʼoni ʼa Sehova ʼe toko lua ki toku ʼapi. Pea neʼe au tali lelei ke matou faipalalau ki te Tohi-Tapu. Neʼe lahi te ʼu manatu neʼe au ako ʼo ʼuhiga mo te liliu ko he Kilisitiano moʼoni. Pea neʼe kamata vevele leva toku leʼo ʼo loto. Neʼe au iloʼi ʼe tonu ke tuku taku inu kava, mo te fakaʼaogaʼi ʼo te toloke pea mo te fakatahi mo te hahaʼi ʼae ʼe mole natou maʼuliʼi te ʼu pelesepeto Fakatohi-tapu. Neʼe toe ʼaoga ke au fai he ʼu fetogi ʼi toku maʼuli ke au liliu ko he tahi ʼe agamalu. Logo la neʼe au iloʼi ʼe tonu ke au fetogi kaʼe neʼe au hoko atu pe te fai ʼo te ʼu meʼa ʼae ʼe kovi.
Neʼe hoko te aluʼaga neʼe fetogi ai leva toku maʼuli. ʼI te tahi po, neʼe au fuhu mo te ʼu tagata ʼe toko valu. Neʼe au manatuʼi neʼe au takoto ʼi te ala kaʼe ta au. Neʼe au logo ifo ʼe ko au ko te mate, neʼe au faikole fenei: “Ke ke fakalelei mai Sehova he neʼe mole au ako fakamalotoloto tau Folafola. Kapau ʼe au maʼuli, ʼe au fakapapauʼi atu ʼe au ako te Tohi-Tapu
mo te kau Fakamoʼoni pea mo fai he ʼu fetogi ʼi toku maʼuli.” Neʼe au punamaʼuli koteʼuhi neʼe mole au mate. Koia, neʼe au fakahoko ai taku fakapapau ʼae ke au ako te Tohi-Tapu.ʼI te taʼu 2006, neʼe au alu ki Pilitania. Ko taku fakatuʼutuʼu ke maʼu haku foʼi falā feʼauga ke au toe liliu ai ki Pologne pea mo hoko taku ako ʼi te ʼu fale ako maʼoluga. ʼI te hoko atu ʼo taku ako ia te Tohi-Tapu, neʼe ʼi ai te vaega Tohi-Tapu neʼe malave kia au. Neʼe tohi fenei e te apositolo ko Paulo: “Pea kua au sio foki ki te u mea fuli o hage ko he puli noa, uhi ko te mauhiga o te iloi o Sesu-Kilisito toku Aliki, ae kua au fakafisi ai ki te u mea fuli; pea e au sio ki te u mea aena o hage ko he pela, koteuhi ke mau ia Kilisito.” (Filipe 3:8) Ohage ko au, neʼe ako e Paulo te ʼu lao pea neʼe ko he tahi neʼe agamalohi. (Gaue 8:3) Neʼe mahino kia au ko te faʼahiga maʼuli ʼae ʼe lelei tokotahi age, ʼe ko te tauhi ki te ʼAtua pea mo fai ia meʼa fuli ʼe tou lavaʼi moʼo faʼifaʼitakiʼi ia Sesu. ʼI taku metitasio ki te faʼifaʼitaki ʼa Paulo, neʼe au iloʼi ai ko te faiga ke maʼu ʼo he gaue ʼe lelei pea mo agamalohi ʼe mole tou maʼu ai te fiafia. Neʼe au tui papau kapau neʼe feala kia Paulo ke fetogi pea ʼe toe feala pe mo au ke au fetogi. Koia, neʼe au fakatuʼutuʼu ai ke au nofo ʼi Pilitania pea ke mole hoko atu taku ako ʼi te ʼu fale ako maʼoluga.
ʼI te lahi ʼo taku ako ʼo ʼuhiga mo Sehova, neʼe toe lahi age mo taku fakaovi kia te ia. Neʼe malave kia au tana fakapapau ʼae ke ina fakamolemole kia natou ʼae ʼe natou fia fai moʼoni he ʼu fetogi. (Gaue 2:38) Pea neʼe au metitasio ki te vaega ʼo 1 Soane 4:16 ʼae ʼe ui ai ko te ‘ ʼAtua ʼe ʼofa.’ ʼI taku fai te faʼahi ʼaia, neʼe au mahino ai pe koʼe ʼe fehiʼa te ʼAtua ki te agamalohi.
Neʼe au fia kau ki te famili fale tau tehina fiafia ʼo te kau Fakamoʼoni ʼa Sehova
Neʼe au toe punamaʼuli ki te aga ʼa te kau Fakamoʼoni ʼa Sehova. Neʼe au mahino neʼe natou faiga ke natou maʼuliʼi te ʼu pelesepeto Fakatohi-tapu. Neʼe au fia kau ki te famili fale tau tehina fiafia ʼaia. Hili pe te ʼu fetogi ʼae neʼe au fai ʼi toku maʼuli, neʼe au papitema ai ʼi te taʼu 2008 ko te Fakamoʼoni ʼa Sehova.
TE ’U LELEI NEʼE AU MAʼU AI:
Ki muʼa atu neʼe au fialahi, mo agamalohi, mo fakaʼaogaʼi te toloke pea mo inu kava kaʼe neʼe fetogi toku maʼuli ʼuhi ko taku ako te Tohi-Tapu. Kua au liliu ko te kaugana ʼa te ʼAtua pea ʼe au fiafia ʼi te akoʼi ki ʼihi te Tohi-Tapu. ʼE kei au hoko atu pe taku sioʼi te ʼaka fitipolo. Kaʼe kua au fakatotonu ke ʼaua naʼa au toe lagolago ki he foʼi gaoʼi.
ʼI te temi nei, kua au ʼohoana mo he tuagaʼane finemui ko Esther. Kua ma maʼu te fiafia moʼoni. Koteʼuhi ʼe ma akoʼi te Tohi-Tapu ki te hahaʼi ʼae ʼe palalau ʼi te lea ʼo Pologne. Pea ko te hahaʼi ʼaia ʼe maʼuʼuli ʼi te potu noleto uesite ʼo Pilitania. ʼE ko taku hoki logoʼi ʼae te fiafia ʼi toku maʼuli. Kua au maʼu he leʼo ʼo loto ʼe maʼa pea kua ʼi ai te ʼuhiga moʼoni ʼo toku maʼuli.