ʼE FEGOTOGI TE ’U MAʼULI ʼUHI KO TE TOHI-TAPU
Ki Au, Neʼe Mole Au Tui ʼe ʼi Ai He ʼAtua
-
TONA TAʼU TUPU: 1974
-
TONA FENUA: RÉPUBLIQUE DÉMOCRATIQUE ALLEMANDE
-
TONA HISITOLIA: NEʼE MOLE TUI ʼE ʼI AI HE ʼATUA
TOKU MAʼULI ʼI MUʼA ATU
Neʼe au tupu ʼi te kiʼi kolo ʼi Saxe, ʼi te fenua ʼae neʼe higoa ʼafeā ko te République Démocratique Allemande (RDA). Neʼe lelei ʼamatou felogoʼi ʼae ʼi fale, pea neʼe akoʼi mai ʼe ʼaku matuʼā te ʼu aga ʼae ʼe tonu ke fai. Ko te RDA neʼe ko he fenua Communiste. Koia ki te tokolahi ʼi Saxe neʼe mole maʼuhiga kia natou ia te lotu. Pea kia au neʼe mole au tui ʼe ʼi ai he ʼAtua. Ko taku tui ki te Communisme pea mo te mole ʼe ʼi ai he ʼAtua, neʼe faʼufaʼu ki ai te ʼu ʼuluaki taʼu ʼe 18 ʼo toku maʼuli.
Kotea te meʼa ʼae neʼe au leleiʼia ʼi te Communisme? Neʼe au leleiʼia te manatu ʼae ʼe tatau te hahaʼi fuli. Pea tahi, neʼe au ui ʼe tonu ke vaʼevaʼe tatau te ʼu koloa, ke mole ʼi ai he kau maʼu koloa pea mo he kau masisiva. Neʼe au maʼumaʼua ʼi te ʼu kautahi fakatupulaga ʼo te Communisme. ʼI toku taʼu 14 neʼe au fakaʼaogaʼi lahi toku temi moʼo fakafoʼou te ʼu pepa ʼae neʼe kua fakaʼaogaʼi. Neʼe lotofakafetaʼi te hahaʼi ʼo te kolo ko Aue ki te gaue ʼae neʼe au fai ʼo natou fakapale ai au. Logo la neʼe kei au tupulaga, kaʼe neʼe au feiloʼiʼaki mo te kau pule politike ʼo te RDA. Kia au neʼe ko he ʼu fakatuʼutuʼu lelei pea ko toku ka haʼu ʼe fimalie anai.
Fokifa pe, kua fetogi te aluʼaga ʼo toku maʼuli. ʼI te taʼu 1989, neʼe holoʼi te kaupa ʼo Berlin pea puli atu ai te faʼahi politike Communiste ʼo te potu Esite ʼo te Eulopa. Neʼe hoko hoholo ai te ʼu fihifihia. Neʼe au iloʼi leva ʼe mafola te heʼe faitotonu ʼi te fenua. Ohage la ko te hahaʼi ʼae neʼe mole lagolago ki te Communisme neʼe gaohi natou ohage ko he ʼu meʼa noa. He koʼe neʼe hoko te faʼahi ʼaia? Neʼe mole koa la tui ia te kau Communiste ʼe tatau te hahaʼi fuli? Ko te Communisme neʼe ko he moemisi pe koa ia? Neʼe au hoha ai.
Koia, neʼe au fetogi leva ʼaku fakatuʼutuʼu kaʼe au haga age muʼa ki te faimaholo pea mo te fai pena. Neʼe au ako ai ʼi he fale ako faimaholo mo te fealagia ʼae ke au alu ki te univelesite, neʼe au fakaʼamu ke au liliu ko he tagata faimaholo iloa. Neʼe au liakī ai te ʼu aga ʼae ʼe lelei neʼe akoʼi mai ʼe ʼaku matuʼā ʼi taku kei veliveli. Ko te meʼa ʼae neʼe maʼuhiga kia au neʼe ko te ʼu fakafiafia mo lahi haku ʼu fafine. Kaʼe ko te faimaholo mo te fai pena pea mo taku maʼuli faʼifaʼitaliha neʼe mole puli ai taku hoha. Pea ʼi te ʼu pāki ʼae neʼe au pena neʼe toe ha ai pe la te mataku ʼae neʼe au logoʼi. Neʼe kotea te fakatuʼutuʼu ʼo ʼuhiga mo te ka haʼu? Pea kotea ia te ʼuhiga ʼo te maʼuli?
ʼI taku maʼu leva te ʼu tali ʼo ʼuhiga mo te ʼu fekumi ʼae neʼe au fai, neʼe au punamaʼuli ai. ʼI te tahi afiafi ʼi te fale ako faimaholo, neʼe * neʼe kau ʼi te kau ako ʼaia pea neʼe ko he Fakamoʼoni ʼa Sehova, neʼe ina fai mai ʼi te afiafi pe ʼaia ia he tokoni ʼe lelei. Neʼe ina ui mai: “Andreas, kapau ʼe ke fia maʼu he ʼu tali ki ʼau fehuʼi ʼo ʼuhiga mo te maʼuli pea mo te ka haʼu, haga fakasiosioʼi lelei te Tohi-Tapu.”
au faipalalau mo he ʼu kaugā ako ʼo ʼuhiga mo te ka haʼu. Ko MandyNeʼe mole au tui pau ki ai, kaʼe ʼaki taku fia iloʼi meʼa fuli neʼe au kamata fetogi ai taku manatu. Neʼe ina fakaha mai ia Taniela kapite 2 pea neʼe au punamaʼuli ʼi te meʼa ʼae neʼe au lau. ʼE talanoa te lea fakapolofeta ʼaia ki te ʼu puleʼaga ʼo te malamanei ʼe ʼi ai tonatou pikipikiga mo totatou temi. Neʼe toe fakaha mai e Mandy te tahi ʼu lea fakapolofeta Fakatohi-tapu ʼo ʼuhiga mo te ka haʼu. Neʼe kua au maʼu leva te ʼu tali ki ʼaku fehuʼi. Kaʼe ko ai ʼae neʼe ina tohi ia te ʼu lea fakapolofeta, pea ko ai ʼae ʼe feala ke ina fakakikite te ka haʼu ʼi hona aluʼaga ʼe totonu? ʼE ʼi ai moʼoni koa he ʼAtua?
NEʼE FETOGI TOKU MAʼULI ʼUHI KO TE TOHI-TAPU
Neʼe fakaha mai leva e Mandy ia he taumatuʼa Fakamoʼoni ʼa Sehova ko Horst mo Angelika ke nā tokoni mai ke au mahino lelei ki te Folafola ʼa te ’Atua. Neʼe au tokagaʼi ai ko te kau Fakamoʼoni ʼa Sehova ʼe ko te kautahi fakalotu pe ʼaia ʼe tahi ʼe ina fakamaʼuhigaʼi ia te huafa ʼo te ʼAtua, ʼae ko Sehova. (Pesalemo 83:19; Mateo 6:9) Neʼe au iloʼi ai ʼe foaki e Sehova ʼAtua he ʼamanaki ki te hahaʼi fuli ke natou maʼuʼuli ʼo talu ai ʼi he palatiso ʼi te kele. ʼE ui fenei ia Pesalemo 37:9: “Ko natou ae e amanaki lelei [kia Sehova] e natou mau anai te fenua.” Neʼe malave kia au ia te ʼamanaki ʼaia, ʼae ʼe feala ke maʼu e te hahaʼi fuli ʼae ʼe faiga fakamalotoloto ke natou mulimuli ki te ʼu pelesepeto ʼa te ʼAtua, ohage ko tona fakamahino ʼi te Tohi-Tapu.
Kaʼe neʼe au faiga malohi ke au fetogi la toku faʼahiga maʼuli ke alu tahi mo te ʼu manatu ʼo te Tohi-Tapu. ʼI toku maʼuli faimaholo, neʼe au liliu ai ʼo fiameʼameʼa, koia neʼe tonu muʼa ke au ako ia te agavaivai. Neʼe faigataʼa kia au haku tuku ia toku maʼuli ʼafeā. ʼE au lotofakafetaʼi kia Sehova ʼi tana fakaha ia tana faʼa kataki, mo tona manavaʼofa pea mo tana lotomahino kia natou ʼae ʼe faiga fakamalotoloto ke natou maʼuliʼi te ʼu pelesepeto ʼae ʼe natou ako ʼi te Tohi-Tapu.
Ko taku tui ki te Communisme pea mo te mole ʼe ʼi ai he ʼAtua, neʼe faʼufaʼu ki ai te ʼu ʼuluaki taʼu ʼe 18 ʼo toku maʼuli, kaʼe neʼe fetogi leva toku maʼuli ʼuhi ko te Tohi-Tapu. Ko te ʼu meʼa ʼae neʼe au ako, neʼe puli ai taku hoha ʼo ʼuhiga mo te ka haʼu pea kua ʼi ai mo he ʼuhiga ʼo toku maʼuli. ʼI te taʼu 1993, neʼe au papitema ko he Fakamoʼoni ʼa Sehova, pea ʼi te taʼu 2000 neʼe au ʼohoana ai mo Tabitha ʼe ko he Fakamoʼoni ʼa Sehova faiva. Neʼe ma fakaʼaogaʼi lahi toma temi moʼo tokoni ki te hahaʼi ke natou iloʼi te Tohi-Tapu. Tokolahi te hahaʼi neʼe matou felaveʼi neʼe tatau ʼamatou faʼahiga manatu. Neʼe faʼufaʼu ʼonatou maʼuli ki te tui ki te Communisme pea mo te mole ʼe ʼi ai he ʼAtua. ʼE au logoʼi ia he toe fiafia lahi moka au fakaha age kia natou peʼe feafeaʼi hanatou iloʼi ia Sehova.
TE ’U LELEI NEʼE AU MAʼU AI
ʼI taku kamata fakatahi mo te kau Fakamoʼoni ʼa Sehova, neʼe iita ʼosi ʼaku matuʼā. Kaʼe ʼi te temi nei, kua nā sisio ki te ʼu fua lelei ʼo toku maʼuli ʼi taku fakatahi mo te kau Fakamoʼoni ʼa Sehova. Neʼe au fiafia, heʼe kua nā lau te Tohi-Tapu pea kua nā kau ki te ʼu fono Fakakilisitiano ʼa te kau Fakamoʼoni ʼa Sehova.
ʼE ma maʼuʼuli fiafia mo Tabitha koteʼuhi ʼe ma faiga ke ma mulimuli fakalelei ki te ʼu tokoni ʼae ʼe foaki mai ʼi te Tohi-Tapu ʼo ʼuhiga mo te ʼohoana. Ohage la, ko te maʼuliʼi ʼo te ʼu tokoni ʼo ʼuhiga mo te nofo agatonu ʼi te maʼuli fakataumatuʼa ʼe ʼasili malohi ai tama feʼofaʼofani.—Hepeleo 13:4.
ʼE mole kei au tuʼania he meʼa ʼo ʼuhiga mo te maʼuli pea mo hoha ki te ka haʼu. ʼE au kau ki he foʼi famili fakamalamanei ʼo te kau Fakamoʼoni ʼa Sehova, ʼae ʼe natou maʼuliʼi ia te tokalelei pea mo te logo tahi moʼoni. ʼI te foʼi famili ʼaia ʼe mole fakakeheʼi ai he tahi. Neʼe ko he aluʼaga neʼe au tui papau ki ai pea ʼe kei au fia fakahoko ʼi toku maʼuli katoa.
^ pal. 12 Neʼe fetogi te ʼu higoa.