Sugad nga mga Saksi ni Jehova, nangangalimbasog kami nga parig-unon an mga pamilya, an amon mga pamilya ngan an pamilya han iba. Ginrirespeto namon an Dios sugad nga amo an nagpatikang han kahikayan han pamilya. (Genesis 2:21-24; Efeso 3:14, 15) Ha Biblia, igintututdo niya an mga prinsipyo nga nakakabulig ha mga tawo ha bug-os nga kalibotan nga magkaada marig-on ngan malipayon nga pag-asawa.

 Ginbubuhat namon an amon gimaopayi basi sundon an sagdon ha Biblia kay nakakabulig ini ha amon nga magin mas maopay nga bana, asawa, ngan kag-anak. (Proberbios 31:10-31; Efeso 5:22–6:4; 1 Timoteo 5:8) An kinaadman ha Biblia nakakabulig nga maglampos bisan an mga pamilya nga iba-iba an relihiyon. (1 Pedro 3:1, 2) Pansina ini nga mga ginsiring han mga diri Saksi nga an padis nagin Saksi ni Jehova:

•   “Ha amon siyahan nga unom ka tuig pirme la kami nag-iinaway. Pero han nagin Saksi ni Jehova na hi Ivete, nagin mas mahigugmaon ngan mas pasensyoso hiya. Tungod han mga pagbag-o nga iya ginhimo nasalbar an amon pag-asawa.”—Clauir, tikang ha Brazil.

•   “Kinontra ako han an akon bana nga hi Chansa nagtikang pag-Bible study ha mga Saksi ni Jehova, kay kahuna ko nga ginbubungkag nira an mga pamilya. Pero akon nakita nga an Biblia nakabulig lugod ha amon pag-asawa.”—Agness, tikang ha Zambia.

 Ha amon ministeryo, iginpapakita namon ha mga tawo kon paonan-o an pag-aplikar han kinaadman ha Biblia makakabulig ha ira nga

•   Magin maaramon ha pagpili hin maarasawa

•   Maglampos ha siyahan nga tuig han pag-asawa

•   Magkaada maopay nga relasyon ha mga ugangan

•   Magin maaramon ha paggamit han kwarta

•   Malikyan an pag-inaway

•   Mahibaro ha pagpasaylo

•   Tutdoan an ira mga anak

 Oo, usahay nahitatabo ito. Pananglitan, sumala ha 1998 nga report han Sofres, usa nga kompanya nga nagsusurbey, 1 ha kada 20 nga mag-asawa an nagkakaada seryoso nga mga problema ha dida nga nagin Saksi an ira padis.

 Igintagna ni Jesus nga an mga nasunod ha iya katutdoan usahay makakaeksperyensya hin kasamok ha pamilya. (Mateo 10:32-36) An historyador nga hi Will Durant nagsiring nga ha panahon han Imperyo han Roma, “an Kristianidad gin-akusaran nga nagbubungkag han panimalay,” a ngan ito liwat an igin-aakusar ha pipira han mga Saksi ni Jehova yana. Pero karuyag sidngon ba hini nga an Saksi an hinungdan han kasamok?

 May kalabotan ha akusasyon nga an mga Saksi ni Jehova nagbubungkag hin mga pamilya, an European Court of Human Rights nagpalusad hin desisyon nga nagsiring nga an diri Saksi nga kapamilya kasagaran nga amo an hinungdan han kasamok kay nadiri hira “nga karawaton ngan respetuhon an kagawasan han ira relihiyoso nga paryente nga ipakita ngan buhaton an iya relihiyon.” An Korte nagsiring pa: “Ini nga kahimtang komon ha ngatanan nga pamilya nga magkaiba an gintotoohan ngan upod na hito an mga Saksi ni Jehova.” b Pero bisan kon an mga Saksi ni Jehova ginkukontra tungod han ira relihiyon, nangangalimbasog hira nga sundon ini nga sagdon ha Biblia: “Ayaw pagbulos hin maraot ha maraot ha bisan hin-o. . . . Kon posible, buhata an iyo gimaopayi ha pakigmurayaw ha ngatanan nga tawo.”—Roma 12:17, 18.

 Ginsusunod han mga Saksi an instruksyon ha Biblia nga mag-asawa “ha sumurunod la han Ginoo,” karuyag sidngon, ha kapariho nira hin pagtoo. (1 Corinto 7:39) Ini nga sugo ha Biblia mapulsanon ngan praktikal. Pananglitan, usa nga artikulo ha Journal of Marriage and Family han 2010 an nagsiring nga “an mga mag-asawa nga pariho an relihiyon, turumanon, ngan gintotoohan” kasagaran na nga mas maopay an relasyon. c

 Pero diri gin-aaghat han mga Saksi an ira mga igkasi-tumuroo nga bulagan an ira padis nga diri Saksi. An Biblia nasiring: “Kon may bugto nga lalaki nga an asawa diri tumuroo ngan naruruyag magpadayon pakig-upod ha iya, diri niya bayaan an iya asawa; ngan kon may babaye nga diri tumuroo an bana ngan naruruyag magpadayon pakig-upod ha iya, diri niya bayaan an iya bana.” (1 Corinto 7:12, 13) Ginsusunod han mga Saksi ni Jehova ini nga sugo.