“Yana na an panahon nga ibanan an tensyon ngan pakalmahon an sitwasyon. Yana na an panahon nga magpugong gud ha kalugaringon,” siring han United Nations Secretary-General nga hi António Guterres parte ha direkta nga pag-atake han Iran ha Israel han Sabado, Abril 13, 2024.

 An araway ha Middle East usa la han mga araway nga nahitatabo ha bug-os nga kalibotan.

 “An kalibotan yana naatubang han pinakahitaas nga kadamu han bayolente nga mga araway tikang han Ikaduha nga Girra ha Kalibotan ngan 2 ka bilyon nga tawo—usa ha kada upat nga tawo—an apektado.”—United Nations Security Council, Enero 26, 2023.

 An mga lugar nga nakakaeksperyensya hin bayolente nga mga araway nag-uupod han Israel, Gaza, Syria, Azerbaijan, Ukraine, Sudan, Ethiopia, Niger, Myanmar, ngan Haiti. a

 San-o matatapos an araway? Makakaghatag ba hin kamurayawan an mga lider han kalibotan? Ano an ginsisiring han Biblia?

 An mga kasamok ha bug-os nga kalibotan nagpapakita nga hirani na matapos an ngatanan nga girra. Ini nga mga girra nagtutuman han tagna han Biblia parte ha peryodo han panahon diin kita nabubuhi. Gintatawag ito han Biblia nga “ikatarapos han sistema han mga butang.”—Mateo 24:3.

•   “Makakabati kamo hin mga girra ngan hin mga sumat mahitungod han mga girra. . . . An usa nga nasud makikig-away ha lain nga nasud ngan an usa nga ginhadian makikig-away ha lain nga ginhadian.”—Mateo 24:6, 7.

 Basaha an artikulo nga “Ano an Tigaman han ‘Kataposan nga mga Adlaw,’ o ‘Panahon han Katapusan’?” basi hibaroan kon paonan-o an mga girra yana nagtutuman han tagna han Biblia.

 An Biblia nagtatagna han kataposan han mga kasamok. Paonan-o ito mahitatabo? Diri pinaagi han pangalimbasog han mga tawo, kondi pinaagi han Armagedon, an “pakiggirra ha daku nga adlaw han Dios nga Makagarahum-ha-ngatanan.” (Pahayag 16:14, 16) Katapos hini nga girra, tutumanon han Dios an iya saad para ha katawohan basi magpahimulos han nagpapadayon nga kamurayawan.—Salmo 37:10, 11, 29.

 Basi mahibaro hin dugang parte ha girra han Dios nga magtatapos han ngatanan nga girra, basaha an artikulo nga “Ano an Girra han Armagedon?”