Tungod han teknolohiya, mahimo ka na yana makigkomunikar ha mas damu nga tawo—ngan ha kombinyente na gud nga paagi—kay ha kakan-o pa man. Kondi bangin diri sugad kahilarom an iyo pagkamagsangkay. Iginhulagway ito han usa nga batan-on: “Baga hin diri man nag-iiha an akon mga kasangkayan. Diri pariho han kasangkayan ni Daddy nga duok gud hira bisan kon naglabay na an mga dekada!”

Kay ano nga makuri yana magkaada duok ngan nagpapadayon nga pagkamagsangkay?

Bangin teknolohiya an usa nga hinungdan. An pag-text, social networking, ngan iba pa nga social media bangin nakakabulig ha pagtipig han pagkamagsangkay bisan kon diri nagkikita an magsangkay. An mapulsanon nga mga pag-uroistorya nasaliwnan na hin waray undang nga pagtext ngan pag-tweet. “Nagtitikagutiay na la an nakikiistorya hin personal,” siring han libro nga Artificial Maturity. “Mas damu nga panahon an ginagamit han mga estudyante ha atubangan han kompyuter kay ha personal nga pakiistorya ha iba.”

Ha pipira nga sitwasyon, baga hin nakakabulig an teknolohiya nga magin mas duok an pagkamagsangkay, pero ha reyalidad diri ngay-an. An 22 anyos nga hi Brian * nagsiring: “Nasantop ko nga matrabaho an pagtineks ha akon kasangkayan basi kumustahon hira. Salit umundang ako pagtineks basi makita ko kon pipira ha ira an mangungumusta ha akon. Ha pagkamatuod, gutiay gud la. Klaro nga diri ngay-an ako sugad kaduok ha pipira ha ira sugad han akon ginhuhunahuna.”

Pero diri ba nakakabulig an pagtext ngan an social media basi makaistorya mo an imo kasangkayan ngan magin mas duok an iyo pagkamagsangkay? Oo—labi na kon diri la ha sugad hito nga paagi kamo nag-iistorya. Kondi kasagaran nga an social media pariho la hin tulay nga nagkukonektar ha iyo, pero hirayo la gihap kamo ha kada tagsa.

Hibaroi an kahulogan han tinuod nga pagkamagsangkay. Iginhuhulagway han Biblia an sangkay sugad nga usa nga mas duok pa kay han bugto. (Proberbios 18:24) Ito ba an klase han sangkay nga imo karuyag? Sugad ka ba hito nga klase hin sangkay? Basi mabaton ito, isurat an tulo nga kalidad nga imo karuyag ha usa nga sangkay. Katapos isurat an tulo nga kalidad nga maipapakita mo ha imo sangkay. Pakianhi an imo kalugaringon: ‘Hin-o ha akon online contact an nagpapakita hin mga kalidad nga akon naruruyagan ha usa nga sangkay? Ano nga mga kalidad an karuyag niya nga ipakita ko ha iya?’—Prinsipyo ha Biblia: Filipos 2:4.

Paghimo hin mga prayoridad. An online nga pagkamagsangkay kasagaran nga naiestablisar tungod han ginkakaparihoan nga mga hilig, sugad hin kaliawan. Kondi mas importante an pagkaada magkapariho nga prinsipyo kay ha pagkaada magkapariho nga hilig. “Waray man ako damu nga sangkay,” siring han 21 anyos nga hi Leanne, “kondi an akon mga sangkay an nabulig ha akon nga magin mas maopay nga tawo.”—Prinsipyo ha Biblia: Proberbios 13:20.

Pakigsangkay ha iba. Waray gud kapariho an personal nga pakiistorya ha usa, diin pariho niyo maoobserbaran an gudtiay nga detalye han tono han tingog, ekspresyon han nawong, ngan gios han lawas.—Prinsipyo ha Biblia: 1 Tesalonica 2:17.

Paghimo hin surat. Bisan kon baga hin kadaan na an pagsurat, nagpapasabot ini nga naghahatag ka ha usa hin diri nababahin nga atensyon. Ito nga klase hin paghatag hin atensyon talagsahon na la yana. Pananglitan, ha libro nga Alone Together ni Sherry Turkle, hiya nagsurat mahitungod han usa nga batan-on nga lalaki nga nagsiring nga waray pa gud hiya nahinunumdoman nga nakakarawat hiya hin surat. Han gin-unabi niya an panahon diin komon pa an paghimo hin surat, hiya nagsiring: “Ginhahandom ko ito nga panahon bisan kon waray pa ako hito matawo.” Kay ano nga diri gamiton inin ‘daan nga teknolohiya’ basi makigsangkay?

Hinumdumi: An tinuod nga pagkamagsangkay diri la nag-uupod hin hamabaw nga pakigkumustahay. Nagkikinahanglan ito nga ipakita mo ngan han imo sangkay an gugma, empatiya, pagpailob, ngan pagpasaylo. Ito nga mga kalidad nabulig gud nga magin makalilipay an pagkamagsangkay. Kondi makuri ito ipakita kon online la kamo nag-iistorya.