“Kon may problema kami, iginsusumat ito han akon asawa ha iya mga kag-anak. Katapos, gintatawagan ako han iya tatay basi sagdonan. Diri gud ako nalilipay hito!”—James. *

“An akon ugangan nga babaye agsob sumiring, ‘Namimingaw na gud ako ha akon anak!’ Iya igin-iinistorya ha akon nga duok gud hira hinduro, salit pag-abat ko, sala ko nga nagin masurub-on hiya kay ginpakasalan ko an iya anak.”—Natasha.

Posible ba nga an problema ha ugangan diri magin problema han mag-asawa?

Ha pag-asawa, nagkakaada an usa hin bag-o nga pamilya. An Biblia nasiring nga an lalaki nga nag-aasawa ‘mabaya ha iya tatay ngan ha iya nanay ngan magpapadayon nga kaupod han iya asawa.’ Ini liwat an kahimtang han babaye. Kon mag-asawa hiya, an Biblia nasiring nga an duha magigin “usa nga unod.” Nagigin usa hira nga bag-o nga pamilya.—Mateo 19:5.

An imo asawa amo na an imo prayoridad. “Usa han pinakaimportante nga butang nga sadang hibaroan han mag-asawa amo an pagkonsiderar pirme ha usa kag usa anoman an ira ginbubuhat,” nagsurat an magsaragdon nga hi John M. Gottman. “Basi magkaada o maipahiuli an iyo pagkahiusa sugad nga mag-asawa, bangin kinahanglan an pagbulag ngan pagpahirayo tikang ha imo pamilya.” *

May mga kag-anak nga bangin nakukurian pagkarawat han sitwasyon. Usa nga batan-on nga bana an nagsiring: “Antes kami ikasal, pirme gin-uuna han akon asawa an karuyag han iya mga kag-anak. Han mag-asawa kami, nakita han akon ugangan nga babaye nga an iya anak may iba na nga prayoridad, ngan nakurian hiya pagkarawat hito.”

May mga bag-o nga kasal nga nakukurian pag-adjust. “An pagkaada mga ugangan diri pariho ha pagkaada kasangkayan nga mahimo mo pilion,” siring ni James nga gin-unabi kanina. “Sugad han ginsisiring han iba, ‘karuyag mo man o diri, may-ada ka duha nga bag-o nga sangkay.’ Bisan kon naaaringit ka ha ira, pamilya mo na hira!”

Kon nagkakaproblema kamo nga mag-asawa tungod han iyo mga ugangan, magbinuligay kamo ha pagsulbad hito. Sunda an sagdon han Biblia nga ‘bilnga an kamurayawan ngan sunda ito.’—Salmo 34:14.

Basi mabuhat ito, tagda an masunod nga mga kahimtang. Bisan kon an tagsa hini iginpresenta uyon ha panhunahuna han bana o han asawa, ini nga mga problema mahimo liwat mahitabo ha bisan hin-o ha ira. Ngan an ginhihisgotan nga mga prinsipyo dinhi mahimo makabulig ha pagsulbad han pipira nga problema may kalabotan ha mga ugangan.

An imo asawa nasiring nga karuyag unta niya nga magin maopay an imo relasyon ha iya nanay. Kondi para ha imo, makuri pakiangayan an iya nanay.

Sarihi ini: Ipakiistorya ha imo asawa an problema, ngan magin andam ha pagpaumaya. An isyu diri an gin-aabat han imo ugangan, kondi an imo inaabat ha imo asawa—an imo ginsaaran nga hihigugmaon. Ha iyo pag-istorya, pamiling hin usa o duha nga espisipiko nga paagi kon paonan-o mo mapapauswag an imo relasyon ha iya nanay, ngan buhata ito. Samtang nakikita han imo asawa an imo pangalimbasog, sigurado nga mas rirespetuhon ka niya.—Prinsipyo ha Biblia: 1 Corinto 10:24.

An imo bana nasiring nga mas gin-uuna mo an imo mga kag-anak kay ha iya.

Sarihi ini: Ipakiistorya ha imo bana an problema, ngan pangalimbasugi nga hisabtan an iya panhunahuna mahitungod hito. Syempre, diri sadang mabaraka an imo bana kon imo la iginhahatag an respeto nga angay para ha imo mga kag-anak. (Proberbios 23:22) Kondi kinahanglan mo la gihapon hiya pasarigon—ha pulong ngan ha buhat—nga mas prayoridad mo hiya kay han imo mga kag-anak. Kon naaabat ito han imo bana, posible nga diri niya huhunahunaon nga karibal niya an imo mga kag-anak ha imo atensyon.—Prinsipyo ha Biblia: Efeso 5:33.

An imo asawa nangangaro hin sagdon ha iya mga kag-anak imbes nga ha imo.

Sarihi ini: Pakig-istorya ha imo asawa, ngan paghimo kamo hin mga limitasyon may kalabotan hito. Pangalimbasog nga magin makatadunganon. Sayop ba pirme an pag-aro hin sagdon ha kag-anak? San-o ito puydi buhaton? Kon maghihimo kamo hin makatadunganon nga mga limitasyon, ini nga isyu diri magigin problema.—Prinsipyo ha Biblia: Filipos 4:5.