“Malipayon an mga namamati ha pulong han Dios ngan nagtutuman hito!”​—Lucas 11:28, Bag-o nga Kalibotan nga Hubad.

Maieksperyensyahan mo an tinuod nga gugma.​—Efeso 5:28, 29.

Ipapakita ha imo an tinuod nga respeto.​—Efeso 5:33.

Magkakaada ka tinuod nga seguridad.​—Marcos 10:6-9.

Oo, ha diri maminos duha nga hinungdan:

• An Dios an nagpatikang han pamilya. An Biblia nasiring nga “nakarawat han tagsa nga pamilya . . . an ngaran hito” tikang kan Jehova nga Dios. (Efeso 3:14, 15) Karuyag sidngon, nagkaada kahikayan han pamilya tungod kay ginhimo ito ni Jehova. Kay ano nga kinahanglan naton hibaroan ito?

  Hunahunaa ini: Kon nakakaon ka hin marasa nga pagkaon ngan karuyag mo hibaroan an mga salakot hito, hin-o an imo papakianhan? Syempre, an nagluto hito.

  Sugad man, basi hibaroan an mga “salakot,” o an sekreto, ha pagkaada malipayon nga pamilya, maopay nga mangaro kita hin giya kan Jehova, an nagpatikang han kahikayan han pamilya.​—Genesis 2:18-24.

• An Dios nagtatagad ha imo. Maaramon an pamilya kon mangaro hira kan Jehova hin sagdon, nga iya iginhahatag pinaagi han iya Pulong. Kay ano? “Kay nagtatagad hiya ha iyo.” (1 Pedro 5:6, 7) Karuyag ni Jehova an pinakamaopay para ha imo, ngan pirme epektibo an iya sagdon!​—Proberbios 3:5, 6; Isaias 48:17, 18.