An mga parasaliksik nasiring nga mahimo gamiton han mga ayam an ira sentido ha pag-amyon basi mahibaroan an edad ngan mood han iba nga ayam, pati na kon lalaki o babaye ba ito. Mahimo pa ngani i-train an mga ayam basi maka-detect hin mga bomba ngan ilegal nga mga droga. Kaurogan nga gin-gagamit han mga tawo an ira mata basi usisahon an ira palibot, pero an mga ayam, gin-gagamit nira an ira sentido ha pag-amyon. “Nagbabasa” hira pinaagi han ira irong.

 Tagda ini: An sentido ha pag-amyon han ayam yinukot ka beses nga mas maopay kay han aton. Sumala ha U.S. National Institute of Standards and Technology, maaamyon han ayam an usa ka trilyon ka parte han usa nga substansya. “Maipapariho ini ha usa nga kaya marasahan an 1⁄4 ka kutsarita nga asukar nga gintunaw ha swimming pool nga pan-Olympic an kadaku.”

 Kay ano nga an sentido ha pag-amyon han ayam mas maopay gud kay han aton?

•   Mahulos an irong han ayam, salit masayon ito makahinggot hin mga scent particle.

•   An irong han ayam may-ada duha nga agian han hangin​—an usa para ha pagginhawa, an usa naman para ha pag-amyon. Kon nahinggot an ayam, an hangin nahingangadto ha parte han nasal cavity nga may mga scent receptor.

•   An parte han irong han ayam nga ginagamit ha pag-amyon mahimo umabot hin 20 ka pulgada kwadrado o sobra pa an kadaku, samtang an kanan tawo 0.8 ka pulgada kwadrado la.

•   An mga scent receptor cell han ayam mas damu hin mga 50 ka beses kay han aton.

 Tungod hini ngatanan, naaamyon han ayam an iba-iba nga parte han usa nga komplikado nga amyon. Pananglitan, naaamyon naton an sopas, pero an ayam naaamyon niya an tagsa nga panakot hito, sumala ha pipira nga eksperto.

 An mga parasaliksik ha Pine Street Foundation, nga usa nga cancer research institute, nasiring nga an utok ngan irong han ayam nagbibinuligay basi magin “usa han pinakamaopay gud nga garamiton ha bug-os nga kalibotan nga pan-detect hin amyon.” An mga syentista nag-iimbento hin elektroniko nga mga garamiton nga makaka-detect hin mga bomba, ilegal nga mga produkto, ngan sakit, upod na an kanser.

 Ano ha imo panhunahuna? An sentido ha pag-amyon ba han ayam produkto han ebolusyon, o may nagdisenyo hito?