AN MGA misay kasagaran nga aktibo ha gab-i. An mga bungot hito nabulig ha ira basi masabtan kon ano an aada ha ira palibot ngan makadakop hin mabibiktima, labi na kon masirom.

Tagda ini: An mga bungot han misay konektado ha mga tisyu nga damu an ugat. Ini nga mga ugat sensitibo bisan ha mahinay la hinduro nga harupoy han hangin. Salit nahibabaroan han mga misay an mga butang nga aada ha ira hirani bisan kon diri nira ito nakikita—matin-aw nga bentaha ini kon masirom.

Tungod kay sensitibo an bungot han mga misay, ginagamit nira ini para hibaroan an lokasyon ngan gios han usa nga butang o han ira bibiktimahon. Nabulig liwat ini ha ira nga hibaroan an kadaku han usa nga luho antes hira magsari ha pagsulod hito. An Encyclopædia Britannica nasiring nga “diri pa bug-os nga nasasabtan an gamit han mga bungot (vibrissae); pero nahibaroan nga kon gin-uutod ito, temporaryo nga naiibanan an kapasidad han misay.”

An mga syentista nagdidisenyo hin mga robot nga may mga sensor nga pariho han mga bungot han misay basi mabuligan an mga robot nga makalikay ha mga butang nga nakakaulang ha ira. Ini nga mga sensor nga gintatawag nga mga e-whisker, “damu an gamit ha pagpauswag may kalabotan ha paghimo hin mga robot, ha koneksyon han tawo ngan han kompyuter, ngan ha mga butang nga may kinabuhi,” siring ni Ali Javey, usa nga syentista nga propesor ha University of California, ha Berkeley.

Ano ha imo panhunahuna? An mga bungot ba han misay produkto han ebolusyon, o may nagdisenyo hito?