Taani Laativiyaa waanna kataman Rigan yelettaas. Tananne ta michiyo nu aayyiyaa dichaasu. Aayyiyaa Katolike gidikkokka, nuuni woosa keettaa baalay deˈiyo wode boosippe attin hara wode bi erokko. Taani Xoossay deˈiyoogaa ammanays; shin yelagatettan ta qofay shaahettanaadan oottiya dumma dummabaa oottiyoogaa doommaas.

Taani naatettan deˈiyo wode, issi issi miishshaa birshsha simmada zaaretta giigissiyoogaa dosiyoogaa ta aayyiyaa akeekaasu. Hegaadan birshshiyo darobay nu son deˈiyo gishshau, ta aayyiyaa tana son yeggada harasaa baana koyukku. Hegaa gishshau, birshshetti uttidabaa giigissada, qassi zaaretta birshsha kaaˈiyoobaa tau immaasu. Hegaadan oottiyoogaa dosiyoogee taani motoriyaa laaggiyoogaakka dosiyo gishshau, keehi maaddiis. Ta aayyiyaa taani qeeri motoriyan annaacettanaadan mazggabissaasu. Taani qeeri motoriyan annaacettaydda takkada, wogga motoriyan annaacettiyoogaa doommaas.

Taani oorattabaa sohuwaara meezetiyo gishshau, takkennan ha shemppo miya ispporttiyan keehi goobaas. Laativiyaa biittan motoriyaa laaggiya asatuura annaacettada heezzutoo xoonaas; qassi nu biittaa gujjin heezzu biittan deˈiyaageetuura annacettada naaˈˈutoo xoonaas.

Taani hegan keehi erettido wode, ta laggiyaa Evija (guyyeppe o machaas) Yihoowa Markkatuura gayttaasu. Issi wode, Geeshsha Maxaafaa xannaˈanau koyiyaageeti xaafiyo qitsee deˈiyo Yihoowa Markkatu xuufiyaa demmaasu. A he qitsiyaa kunttada yeddaasu. Sohuwaara naaˈˈu michoti yiidi oychin, a Geeshsha Maxaafaa etaara xannaˈiyoogaa doommaasu. A xannaˈiyoogaa taani ixxabeykke; shin he wode ayyaanaabaa taani darin koyikke.

Guyyeppe, he michoti Evijo Geeshsha Maxaafaa xannaˈissiyo wode taani eti xannaˈiyoobaa siyanaadan shoobbidosona. Yaatin, taani he wode siyidobaa dosaas. Tana keehi  ufayssidabay, Geeshshaa Maxaafay saˈay gannate gidanaagaa yootiyoobaa. Leemisuwau, taani Mazamure 37:10, 11n, “Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona. SHin ashkketi biittaa laattana; eti sarotettaaninne duretettaani ufaittidi daana” yaagiyaagaa nabbabanaadan shoobbidosona. Hegee tana keehi ufayssiis.

Taani ayyaanaabaa eranau koyaas. Qassi haymaanooteti tamaarissiyo worddo gidida darobay deˈiyoogaa akeekiyoogaa doommaas. SHin Geeshsha Maxaafay tamaarissiyoobay tumanne qoncce gidiyo gishshau ufayttaas.

Geeshsha Maxaafaa amarida wodiyau xannaˈada Yihooway deˈuwaa ay keena xoqqu ootti xeelliyaakko akeekaas. (Mazamure 36:9) Hegee, taani annaacettiyoogan ta shemppo miyaabaa oottenna mala qoppanaadan maaddiis. Yaatiyo gishshau, ta deˈuwan Yihoowa bonchanau koyaas. Hegaa gishshau, motoriyan annaacettada demmiyo bonchuwaanne ufayssaa aggabayaas.

Isttooniyaa biittan, Taalinen daro biittaappe yiida Yihoowa Markkati issippe shiiqiyo awuraajjaa shiiquwaa 1996n baas; he sohoy taani darotoo motoriyan annacettiyo isttaademiyaa matan deˈees. He shiiquwan daro biittaappe yiida asay issippe saruwan shiiqidoogaa beˈaas. Leemisuwau, issi Yihoowa Markkeeppe miishshaa borssay bayiis; taani a hegaa demmana gaada qoppabeykke. SHin sohuwaara issi Yihoowa Markkiyaa he borssaa demmada, appe aybinne paccennan iyyo immaasu. Taani hegan keehi garamettaas! Yihoowa Markkati Geeshsha Maxaafan deˈiya xoqqa maaraa naagidi deˈiyoogaa akeekaas. Taaninne Evija Geeshsha Maxaafaa minni xannaˈidi, 1997n xammaqettidi Yihoowa Markka gidida.

Ta laggetuppe issoti issoti keehi eesotidi motoriyaa laaggiyo gishshau hayqqidosona. Geeshsha Maxaafaa xannaˈada, taani ta deˈuwaa suure goˈettanaadan Yihooway tau immidoogaa akeekaas. Taani paxa deˈiyoy hegaa akeekido gishshataassa gidana danddayees.

Taaninne Evija Rigan deˈiya Yihoowa Markkatu macara biiruwan oyddu layttau kumetta wodiyaa haggaazida. Haˈˈi qassi nu naˈiya Alisa Yihoowa siiqanaadan maaddidi dichiiddi deˈoos. Taani saaminttan issi gallassi kaamiyaanne moorettida issi issibaa giigissanau nu xuufiyaa birshshiyo biiruwaa baada maaddiyoogan ufayttays. Taani naatettaappe doommada eridobaa loˈˈobau goˈettiyo gishshau daro ufayttays. Haˈˈikka issi issibaa birshshada zaarettada giigissays.

Ta soo asaara tumu Xoossaabaa haratuyyo yootiyo maataa xoqqu oottada xeellays; taani Geeshsha Maxaafaappe tamaaridobay hegau maaddiis. Tumakka, saˈay gannate gidanaagaa siyidoogee taani laamettanaadan oottiis!