WORANA danddayiya sahoy nena woy ne siiqiyo ura sakkikko, hegee ay keena unˈˈissana danddayiyaakko neeni eraasa. Sakkiyoogaa bolli, eesuwan yiillotiyoogaa woy hirggiyoogaa neeni danddayana koshshees. Akkamettiyo keeruwan unˈˈettiyoogee, xale demmanawu woy shammanawu metootiyoogee, woy xalee gattiyo qohuwaa yayyiyoogee keehi hirggissananne yashshana danddayees. Wolqqaama sahuwaara gayttidaagan qofan paxa kaaˈettiyoogee qohiyaaba gidana danddayees.

Nuuni maaduwaa awappe demmana danddayiyoo? Xoossaakko woossiyoogaaninne Geeshsha Maxaafaappe minttettiya qofaa nabbabiyoogan daroti  keehi minettidosona. Qassi so asaynne laggeti immiyo maadoynne eta siiqoy maaddana danddayees.

Layttay 58 gidido Roberti hagaadan giis: “Xoossan ammanetta, qassi neeni sahuwaa genccanaadan I nena maaddana. Yihoowa woossa. Neeyyo siyettiyaabaa ayyo yoota. Geeshsha ayyaanaa immanaadan A oychcha. Neeni loˈˈobaa qoppanaadaaninne ne soo asaa minttettanaadan, qassi sahuwaa genccada woppu gaada deˈanaadan maaddana mala A oychcha.

Ne soo asay nena qofan maaddiyoogee keehi goˈˈiyaaba. ‘Payyatettay ay malee?’ giidi oychchanawu galla galla issi woy naaˈˈu asi taassi dawalees. Dumma dumma sohuwan deˈiya laggeti tana minttettoosona. Eti taani woppu gaanaadan oottoosona; qassi hegee taani hidootaa qanxxennaadan maaddiis.”

Neeni sahettida ne laggiyaa oychchiyo wode, Linda giidobaa akeeka: “Sahettida uri danddayettida keenan payya asadan deˈanawu koyiyoogeenne ubbatoo sahuwaabaa haasayanawu koyennan aggana danddayiyoogee qoncce. Yaatiyo gishshawu, haroodeegaadan haasaya.”

Xoossay minotettaa immin, Geeshsha Maxaafay minttettin, qassi siiqiya so asaynne laggeti maaddin, nuuni wolqqaama harggiyan gencciyo wodekka, deˈuwan deˈiyoogee goˈˈiyaaba gidiyoogaa ammanettana danddayoos.