TIMIRTTE 01
Geeshsha Maxaafay Nena Waati Maaddana Danddayii?
Nuuni ubbay deˈuwaa, metuwaa, hayquwaanne sinttanaabaa xeelliyaagan loytti eranawu koyoos. Nuussi koshshiyaabawu miishshaa demmanawu woy so asaa deˈuwan ufayttanawu metiyaabaa giigissanawukka nuussi maadoy koshshees. Geeshsha Maxaafay daro asay bantta deˈuwan oychchiyo keehi koshshiya oyshatussi zaaruwaa demmanaadan maaddiyoogaa xalla gidennan, deˈuwan galla galla maaddiya zoriyaa eta zorees. Geeshsha Maxaafay asa ubbaa maaddana danddayees gaada qoppikkii?
1. Geeshsha Maxaafay zaaruwaa yootiyo amarida oyshati awugeetee?
Geeshsha Maxaafay ha keehi koshshiya oyshatussi zaaruwaa yootees: Deˈoy waani doommidee? Deˈuwawu halchchidobi aybee? Asay waayettiyoy aybissee? Asay hayqqiyo wode waanii? Ubba asay sarotettaa koyishin, olay keehi daridoy aybissee? Saˈan sinttappe aybi hananee? Hegaa mala oyshatu zaaruwaa demmanaadan Geeshsha Maxaafay nuna minttettees; qassi miilooniyan qoodettiyaageeti he oyshatussi aliya zaaruwaa appe demmidosona.
2. Nuuni deˈuwan ubba galla ufayttanaadan Geeshsha Maxaafay nuna waati maaddana danddayii?
Geeshsha Maxaafay nuna loˈˈobaa zorees. Leemisuwawu, so asay waanidi tumuppe ufayttanaakko tamaarissees. Geeshsha Maxaafay nuuni unˈˈettiyo wode waatanaakko, qassi nu oosuwan waani ufayttanaakko yootees. Geeshsha Maxaafay qommoora denttidobatanne hara darobaa xeelliyaagan tamaarissiyoobaa nuuni issippe ha maxaafaa tobbiyo wode neeni erana. ‘Xoossaa maxaafa ubbay [Geeshsha Maxaafan deˈiya ubbabay] maaddiyoogaa’ neeni maayettana danddayaasa.—2 Ximootiyoosa 3:16.
Ha maxaafay Geeshsha Maxaafaa gishshaa giigidaba gidenna. Geeshsha Maxaafaa neeni nerkka pilgganaadan ha maxaafay minttettees. Hegaa gishshawu, neeni ha timirttetun deˈiya xiqiseta nabbabanaadaaninne eta ne tamaariyoobaara geeddarssanaadan nuuni nena minttettoos.
LOYTTA AKEEKA
Geeshsha Maxaafay asaa waati maaddiyaakko, A nabbabiyoogan neeni waana ufayttana danddayiyaakko, qassi A akeekanawu maadoy koshshiyoy aybissakko yuushsha qoppa.
3. Geeshsha Maxaafay nuna kaalettana danddayees
Geeshsha Maxaafay keehi pooˈiya pooˈo mala. I nuuni loˈˈobaa kuuyanaadan maaddananne sinttappe hananabaa nuuyyo yootana danddayees.
Mazamure 119:105 nabbabite; yaatidi ha oyshata tobbite:
-
Ha mazamuriyaa xaafidaagee Geeshsha Maxaafaabaa ay qoppidee?
-
Geeshsha Maxaafaa xeelliyaagan ne qofay aybee?
4. Nu oychchiyo oyshata Geeshsha Maxaafay zaarana danddayees
Issi maccaasiyaa bana daro layttawu keehi qofissida oyshatussi Geeshsha Maxaafaappe zaaruwaa demmaasu. BIIDUWAA beˈite; yaatidi kaallidi deˈiya oyshata tobbite.
-
Ha biiduwan, maccaasiyo qofissida oyshati awugeetee?
-
Geeshsha Maxaafaa xannaˈiyoogee O waati maaddidee?
Nuuni oyshata oychchanaadan Geeshsha Maxaafay nuna minttettees. Maatiyoosa 7:7 nabbabite; yaatidi kaallidi deˈiyaabaa tobbite:
-
Geeshsha Maxaafay zaarana danddayiyo nena qofissiya oyshati deˈiyoonaa?
5. Geeshsha Maxaafaa nabbabiyoogee nena ufayssana danddayees
Geeshsha Maxaafaa nabbabiyoogee daro asaa ufaysseesinne goˈˈees. BIIDUWAA beˈite; yaatidi kaallidi deˈiya oyshata tobbite.
-
Ha biiduwan neeni beˈido yelagati nabbabiyoogaa waati xeelliyoonaa?
-
Geeshsha Maxaafaa nabbabiyoogaa eti haˈˈi kaseegaappe dumma ogiyan xeelliyoy aybissee?
Geeshsha Maxaafay nuna minttettiyaabaanne nuussi hidootay deˈanaadan oottiyaabaa tamaarissana danddayiyoogaa yootees. Roome 15:4 nabbabite; yaatidi ha oyshaa tobbite:
-
Ha xiqisee yootiyoobaa loytta eranawu koyay?
6. Nuuni Geeshsha Maxaafaa akeekanaadan harati nuna maaddana danddayoosona
Daroti banttarkka Geeshsha Maxaafaa nabbabiyoogaa bolli, haratuura tobbiyoogee maaddiyoogaa akeekidosona. Oosuwaa 8:26-31 nabbabite; yaatidi ha oyshaa tobbite:
-
Nuuni Geeshsha Maxaafaa waati akeekana danddayiyoo?—Paydo 30nne 31 xeella.
Geeshsha Maxaafaa akeekanawu Toophphiyaa bitaniyawu maadoy koshshiis. Geeshsha Maxaafaa haratuura tobbiyoogee maaddiyoogaa ha wodiyan daro asati akeekoosona
ISSI ISSI ASAY HAGAADAN GEES: “Geeshsha Maxaafaa xannaˈiyoogee coo wode wurssiyooba.”
-
Neeni woyguutee? Aybissi?
AY AKEEKADII?
Geeshsha Maxaafay deˈuwan ubba galla maaddiyaabaa zorees, keehi koshshiya oyshata zaarees, qassi asaa minttetteesinne etawu hidootay deˈanaadan oottees.
Zaaretuwaa
-
Nuuni Geeshsha Maxaafaappe ay mala zoriyaa demmana danddayiyoo?
-
Geeshsha Maxaafay zaaruwaa yootiyo amarida oyshati awugeetee?
-
Neeni Geeshsha Maxaafaappe tamaarana koyiyoobay aybee?
PILGGA
Geeshsha Maxaafay ha wodiyan nuna maaddiyaabaa zorees.
“Geeshsha Maxaafay Tamaarissiyoobay Ay Wodenne Aadhdhida Eratetta” (Wochchiyo Keelaa Paydo 1 2018)
Naatettaappe doommidi I qoppiyo iita qofaara baaxetida issi bitaniyaa Geeshsha Maxaafay waati maaddidaakko akeeka.
So asaa deˈuwaa xeelliyaagan Geeshsha Maxaafay yootiyo maaddiya zoriyaa pilgga.
“So Asaa Ufayssawu Maaddiya 12 Zoriyaa” (Beegottite! Paydo 2 2018)
Ha alamiyaa tumu haariyay oonakko daro asay qoppiyo bala qofaa Geeshsha Maxaafay waati suurissiyaakko tamaara.
Geeshsha Maxaafaa Xannaˈana Koshshiyoy Aybissee?—Kumetta Biiduwaa (3:14)
Hageeta Beˈadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaˈissiyoy Ayba Ogiyaanee?
Yihoowa Markkati miishsha qanxxissennan xannaˈissiyo prograamiyan, Geeshsha Maxaafaa birshshettaa awugaakka goˈettana danddayaasa. Ne so asa ubbaynne ne laggetikka nenaara xannaˈanaadan shoobbana danddayaasa.
