Taani Guwatimalan arggo bagga gezziyan haakkidi deˈiya Akula kataman yelettaas. Nu so asay Maya sheeshsha gidida Isili yara. Taani naatettan Isppenettuwaa gujjin, nu heeraa qaalaa haasayaydda diccaas. Taani naatettan Guwatimala asay qareti baynnan issoy issuwaara olettiiddi 36 laytta takkido wode deˈaas. He wode daro Isili asay hayqqiis.

Tawu layttay oydda gidiyo wode, laappun laytta naˈa gidida ta bayra ishay bombbiyaa kaaˈishin qoppennan xuqqibays. He xuussan ta ayfee toˈiis, ta ishaykka hayqqiis. Hegaappe simmin, naatetta layttaa Guwatimala Sitin qooqetussi giigida issi dirijjitiyan deˈaas; breyiliyaa xaafuwaanne nabbabuwaa yan tamaaraas. Yaani oottiya asati ta erenna gaasuwan hara naatuura haasayennaadan tana diggidosona, naatikka taakko shiiqokkona. Taani ubbatoo boorasiyo gishshawu, soo baada layttan naaˈˈu aginaa taayeera takkiyo wodiyaa yeemuwan naagays; A ubba wode kehanne qarettiya asa. SHin taassi tammu laytta gidiyo wode A hayqqaasu; hegee keehi azzanttiyaaba. Ha alamiyan tana iigaadan siiqiya hara asi baynnabadan qoppiyo gishshawu kayyottaas.

Tawu layttay 11 gidiyo wode, yelettido katamaa baada ta ishaaranne A so asaara deˈiyoogaa doommaas. Eti taassi asatettawu koshshiyaabaa kunttoosona; shin tana qofan maaddida uri baawa. Issi issitoo yeekkaydda, “Taayyiyaa ayssi hayqqadee? Ta ayfee ayssi qooqidee?” gaada Xoossaa oychchays. Ha daafabay gakkidoy Xoossaa shene gidiyo gishshataassa gidiyoogaa asay tawu yootees. Yaatiyo gishshawu, Xoossay meqetta iita, qassi pirdda pacabaa oottiyaaba gaada kuuyaas. Taani tana worabeennay hegawu haniyaaba demmabeenna gishshattaassa.

Ayfiyaa xayoy, taani asatettaaninne qofan qohettanaadan oottiis. Naatettan deˈishin, asay darotoo tanaara wolqqan zinˈˈiis. Tawu qarettiya asi baynnabadan qoppiyo gishshawu, he danobaa oossinne yootabeykke. Tana haasayissiya asi darenna gishshawu, taanikka asaara haasayikke. Taani asaakko shiiqennaagee unˈˈettanaadan oottiis, hegaappe denddidaagan oonanne ammanikke.

Tawu layttay 13 gidiyo wode, timirttiyaappe shemppiyo gallassi naaˈˈu Yihoowa Markkati (azinanne machcho) tanaara gayttidosona. Ta hanotan azzaniya, ta asttamaaretuppe issinniyaa eti tana haasayissanaadan etawu yootaasu. Geeshsha Maxaafay hayqqidaageeti denddanaagaanne qooqetu ayfee xeellanaagaa yootiyoogaa eti tawu odidosona. (Isiyaasa 35:5; Yohaannisa 5:28, 29) Eti tana tamaarissidobaa dosaas, shin taani asaara haasayiyoogaa aggoosappe takkido gishshawu, etaara haasayanawu metootaas. SHin taani asakko shiiqennaba gidikkokka, eti kehatettaaninne danddayan tana Geeshsha Maxaafaabaa tamaarissanawu yiyoogaa aggibookkona. He azninaynne machchiyaa 10 kilo metireppe dariya ogiyaa hemettidinne deriyaa kiyidi ta deˈiyo katamaa gakkoosona.

Ta ishay eti geeshsha maayuwaa maayiya asa gidikkokka, dure gidennaagaa tawu yootiis. Gidikkokka, eti tawu ubbatoo qoppiyoogaa bessoosonanne amarida imotaa immoosona. Taani hegaadan bantta goˈˈaa aggiyaageeti tumu Kiristtaanetu xalla gidana gaada qoppaas.

Taani breyle xuufeta goˈettada Geeshsha Maxaafaa xannaˈaas. Tamaariyoobaa akeekana danddayikkokka, issi issibay tawu gelenna. Leemisuwawu, Xoossay tawu tumuppe qoppiyoogaanne hara asay tana Xoossay xeelliyoogaadan xeellanaagaa amananawu metootaas. Yihooway amarida wodiyawu iitatettaa paqqadidoy aybissakko eraas, shin tumuppe qoppiya Aawaadan A xeellanawu metotaas. *

Geeshsha Maxaafaappe tamaaridobay taani leddan leddan ta qofaa laammanawu maaddiis. Leemisuwawu, tuggatiya asawu Xoossay wozanappe qarettiyoogaa akeekaas. Xoossay baassi goynniya, naaqettida asaa xeelliyaagan, “Ta asai tugatiyo tuggaa geeshsha be7ada, . . . taani eta waayiyaa qoppaas” yaagiis. (Kessaabaa 3:7) Taani ufayssiya Yihoowa eeshshata akeekidoogee ta deˈuwaa awu sheedhdhanaadan tana denttettiis. Hegaa gishshawu, 1998n xammaqettada Yihoowa Markka gidaas.

Taani xammaqettoosappe issi laytta gidiyaagee aadhdhin, Eskuwintila katamaa matan qooqetussi giigida timirttiyaa tamaaraas. Nu gubaaˈiyan deˈiya issi cimay taani deˈiyo katamaappe shiiquwaa biyoogee metiyoogaa akeekiis. Tawu mata giyo gubaaˈee, tana xannaˈissida azinaynne machchiyaa kanttidi yiyo deriyaappe hefinttan deˈiyaagaa; qassi yaa baanaagee tana metees. He cimaa maaduwan, taani eta son deˈanaadan koyiya, Eskuwintila kataman deˈiya Yihoowa Markka gidida issi keettaa asay beettiis; shiiquwaa baanaadan eti tana maaddidosona. Hanno gakkanawu, eti tana bantta so asadan maaddoosona.

Gubaaˈiyaa yarati tawu bessido tumu siiquwaa xeelliyaagan yootana danddayiyo darobay deˈees. Ha ubbay hanotay, taani Yihoowa Markka gidiyo gishshawu, tumu Kiristtaanetu yara gidiyoogaa ammananaadan oottees.—Yohaannisa 13:34, 35.

Haˈˈi pattennabadaaninne hidooti baynna asadan tana xeellikke. Ta deˈoy haˈˈi halchchoy kumidoogaa. Yihoowa Markkati Geeshsha Maxaafaa tamaarissiyo oosuwaa taani ubba wode oottiyo gishshawu, tawu paccidabaa qoppiyoogaappe alˈˈo gidida Geeshsha Maxaafaa tumaa tamaarissiyoogaa mintta qoppays. Qassi gubaaˈe cima gidada haggaaziyoonne heeran deˈiya gubaaˈetun dere haasayaa haasayiyo maataa demmaas. Ubba shaˈan qoodettiya asay shiiqiyo killiliyaa shiiqotun Geeshsha Maxaafan amppida haasayaa haasayiyo maataakka demmaas.

Taani 2010n, El Salvadororen giigida Gubaaˈiyawu Haggaaziyaageetu Timirtte Keettaappe (haˈˈi Kawotettaa Mishiraachchuwaa Yootiyaageetu Timirtte Keettaa geetettees) anjjettaas. Ha timirtte keettay taani ta aawatettaa loytta kiyanawu giigettanaadan maaddiis. Ha loohissoy oonakka gidin ba oosuwawu danddayissiya, Xoossaa Yihooway tana wozanappe siiqiyoogaanne keehi xoqqu ootti xeelliyoogaa akeekanaadan maaddiis.

Yesuusi, “Ekkiyaagaappe immiyaagee daro ufayttees” yaagiis. (Oosuwaa 20:35, NW) Haˈˈi taani ufayttiyoogaa tumuppe yootana danddayays, hegaa kase mule qoppana danddayikke; shin haˈˈi taani hara asa maaddiyaabadan qoppays.