Taani Rooma katamaa gaxan hiyyeesa oosanchchati deˈiyo heeran yelettada diccaas. He wode deˈoy keehi metees. Taani ta aayyiyo erikke, qassi ta aawaarakka darin siiqettokko. Wayssiya heeran waana deˈanaakko tamaaraydda diccaas.

Tawu layttay tammaa gidiyo wode, wuuqqiyoogaa doommaas. Qassi, taani so asaappe shaahettada koyro kiyiyo wode 12 laytta naˈa. Darotoo, ta aaway polisetu waanna biiruwan tana demmidi soo ehees. Taani asaara ubbatoo ooyettays, qassi kobattiyanne hanqquwaa suulliya asa gidiyo gishshawu oonaaranne maayettikke. Tawu layttay 14 gidin, sooppe kiyada mule simmabeykke. Yaatada, jallissiyaabaa goˈettiyoogaanne oge doonan deˈiyoogaa doommaas. Aqiyoosi baynna gishshawu, asa kaamiyaa mentta gelada wonttimaatta gakkanaashin A giddon takkays. Yaatada, meecettanawu goggiya haattay deˈiyoosaa koyays.

Asa borssaa wotti ekkiyoogaa gidin, qammi asa soo gelada boggiyoogaa gidin, aybanne wuuqqiyoogan hanttaara kayso gidaas. Taani iitabaa oottiyoogan erettida asa gidaas, qassi keehi kobattiya asati banttanaara walahettanaadan tana shoobbin, bankke keettaa boggiya ura gidaas. Taani keehi amalanchcha gidiyo gishshawu, takkennan he kobattiyaageetikka bonchchiyo asa gidaas. Ta shugguxee baynnan awanne ba erikke; ubba, borkkotaappe garassaara wottada xiskkays. kobattiyoogee, jallissiyaabaa goˈettiyoogee, wuqqiyoogee, shori baynnabaa haasayiyoogeenne pokkobaa haniyoogee tawu meeze gidiis. Poliseti tana ubba wode koyoosona. Eti tana darotoo oyqqin, daro layttawu qashettayddanne bireshshettaydda deˈaas.

Issi wode qasho keettaappe birshshettada, ta aayee michchiyo baada oychchanawu koyaas. Ta aayee michchiyaanne I naatuppe naaˈˈati Yihoowa Markka gidiyoogaa erabeykke. Eti Yihoowa Markkatu shiiquwaa baanaadan tana shoobbidosona. Taani he shiiqoy ay malakko erana koyido gishshawu, etaara baanawu maayaas. Nuuni SHiiquwaa Addaraashaa gakkido wode, taani geliyaanne kiyiya asaa beˈanawu penggiyaa matan uttana koyiyoogaa yootaas. He wodekka shugguxiyaa gixxa uttaas.

He shiiqoy ta deˈuwaa laammiis. Taani deˈiyoy hara pilaanetiyana gidana gaada qoppidoogaa hassayays. Asay pashkki giidinne ufayttiiddi tana sarotiis. Yihoowa Markkati xeelliyo wode, eta kehatettaynne xilotettay qoncci beettiyoogaa hanno gakkanawu hassayays. Hegee taani eriyo alamiyaappe keehi dumma!

Yihoowa Markkatuura Geeshsha Maxaafaa xannaˈiyoogaa doommaas. Taani xinaatiya sugiyo wode, ta deˈuwaa muleera laammana bessiyoogaa akeekaas. Taani Leemiso 13:20n deˈiya, “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees” giya zoriyaa kaallaas. Yaatiyo gishshawu, kobattiyaageetuppe shaahettana bessiyoogaa akeekaas. Hegee metiyaaba gidikkokka, Yihooway maaddin yaataas.

Ta asatettaykka geeshsha gidiis. Keehi baaxetada sijaaraa uyiyoogaanne jallissiyaabaa goˈettiyoogaa aggaas. Ta binnaanay keehi diccidaagaa qanxxettaas, gutuchchaa olaas, shori baynnabaa haasayiyoogaa aggaas. Taani oottiyooban naagettiyoogaa doommaas; kase hegaadan mule ootta erikke.

Nabbabiyoogaanne xannaˈiyoogaa mule dosenna gishshawu, Geeshsha Maxaafaa minna xannaˈanawu metootaas. SHin taani baaxetada, guyyeppe Yihoowa siiqaas; qassi ta kahay qumˈˈiyoogaa doommiis. Taani oottido iitabaa ubbaa Yihooway tawu atto gaanaagaa sirada darotoo unˈˈettaas. Hegaa mala wodiyan, Kawuwaa Daawiti gita nagaraa ootti simmin Yihooway awu atto giidoogaa nabbabiyoogan keehi minettaas.—2 Sameela 11:1–12:13.

Tawu meto gidida harabay qassi sooppe soo baada ta ammanuwaabaa haratussi yootiyoogaa. (Maatiyoosa 28:19, 20) Kase taani qohido woy naaqqido asa demmanaakkonne gaada yayyaas! SHin leddan leddan yayyiyoogaa aggaas. Taani kehatettan atto giya, saluwan deˈiya nu gita Aawaabaa asay eranaadan maaddiyoogan wozanappe ufayttiyoogaa doommaas.

Yihoowabaa tamaaridoogee ta shemppuwaa ashshiis! Ta kase laggetuppe daroti hayqqidosona woy qashuwan deˈoosona; shin taani haˈˈi ufayssiya deˈo deˈays, qassi ufayssiyaabaa demmanaagaa naagays. Taani ashkkenne azazettiya asa gidiyoogaanne kobattennan aggiyoogaa meezetaas. Hegaappe denddidaagan, asaara saro deˈays. Haˈˈi loˈˈiya machchiyo Karmeno ekkada ufayssiya deˈo deˈays. Asay Geeshsha Maxaafaa tamaaranaadan iira issippe maaddiyoogan keehi ufayttoos.

Haˈˈi taani asaa maaddiya oosuwaa oottays; issi issitoo bankke keettaakka bays, shin yaa biyoy bogganaassa gidennan, geeshshanaassa!