Bollawu maaddiya qumaa meennaagee ne payyatettaa qohana danddayiyoogaa erennan aggakka. Darotoo yelagatettan payyatettay paccido urawu gasttiyo wodekka payyatettay paccees; yaatiyo gishshawu neeni yelagatettan bollawu maaddiya qumaa miyoogee keehippe loˈˈo.

•  Bollawu maaddiya qumay aybee?

•  Taani bollawu maaddiya qumaa maana danddayiyoy ayba ogiyaanee?

•  Ne laggeti woygiyoonaa?

 Geeshsha Maxaafay nuuni “kiphatanchchata” gidanaadan yootees, qassi hegee nuuni miyoobaakka gujjees. (1 Ximootiyoosa 3:11) Ha maaraa akeekidi kaallidi deˈiyaabata eriyoogee loˈˈo.

•   Bollawu maaddiya qumay ubba qumaa eta qommuwaadan qommuwaadan oyqqiis. Ichchashu qumaa qommotun maattay, pilaynne oyssay, prootinee, mittaa ayfee, ataakiltteenne kattaa ayfee deˈees. Issi issi asay bollaa leeˈanawu maaddiyaabadan qoppidi issi issi qumaa qommota mule meenna. SHin hegaadan oottiyoogee ne bollaa payyatettawu maaddiya qumaa neeni meennaadan oottana danddayees.

   Hagaadan oottanawu mala: Qumaa qommotuppe demmiyo dumma dummabatu goˈˈaa eranawu dottoriyaa oychcha woy pilgga. Leemisuwawu:

   Karbohaydiretee neeyyo wolqqaa immana danddayees. Prootinee ne bollay harggiyaa teqqanaadan, qassi seeleti minnanaadaaninne ooraxxanaadan maaddana danddayees. Issi issi faateti bessiyaagaa keenaa miikko, wozanaa harggiyan oyqettiyo hanotaa guuttananne neeyyo wolqqaa immana danddayoosona.

   “Taani bollawu maaddiya ubba qumaa qommotuppe maanawu malays. Qassi issi issitoo laqilaqiyaabata woy bollawu keehi maaddenna qumaa miyoogee bala gaada qoppikke. SHin issi uri ubbatoo miyoobay hegeetu xalla gidana koshshenna. Ubbatoo bollawu maaddiyaabaa miyoogee loˈˈo”—Birenddo.

•   Bollawu maaddiya qumaa miyoogee bessennabaa oottennaadan diggees. Bessennabaa giyoogee bollawu gidiyaagaa keesaa meennaagaa, keehi daruwaa miyoogaa woy issi qumaa dosiyaaba gidikkonne mule meennaagaa.

   Hagaadan oottanawu mala: Issi aginawu ne miyoobaa loytta akeeka. Qommoora deˈiya bessennabatuppe issuwaa aapputoo oottadii? Bollawu maaddiya qumaa maanawu ne ay giigissana danddayay?

   “Taani issi issitoo daro kaalooree deˈiyo qumaa keehi daruwaa mays, qassi issi issitoo guutta kaalooree deˈiyo qumaa mays. Wurssettan, taani miyo quman ay keena kaalooree deˈiyaakkonne qoodiyoogaa agganawu, daruwaa meennaadaaninne kallikko miyoogaa agganawu kuuyaas. Hegaadan oottanawu daro wodiyaa ekkiis, shin haˈˈi taani bollawu maaddiya qumaa mays.”—Heelo.

•   Ne maanabaa kasetada qoppa. Geeshsha Maxaafay, “Mino oosanchchaa halchchoi dureyees” yaagees. (Leemiso 21:5) Bollawu maaddiya qumaa maanawu kasetada qoppana koshshees.

   “Bollawu maaddiya qumaa maanawu halchchananne, hegaa darotoo son kattana koshshees. Hegee metiyaaba gidikkonne guyyeppe goˈˈees; qassi ne miishshaa qoraphphanaadankka maaddees.”—Toomaasa.

•   Bollawu maaddenna qumaa aggada maaddiyaagaa ma. Geeshsha Maxaafay, ‘aadhdhida eratettaa naaga’ yaagees. (Leemiso 3:21) Aadhdhida eratettay kaseegaappe aaruwan bollawu maaddiya qumaa miyo ogiyaa qoppanaadaaninne hegaa meeze oottanaadan nena maaddana.

   “Gallassan issitoo payyatettawu maaddenna qumaa aggada maaddiyaagaa kattiyoogaa doommaas. Leemisuwawu, karameellaa miyoogaa aggada appiliyaa mays. Daro takkennan galla galla bollawu maaddiyaabaa miyoogaa doommaas!”—Kiiyo.

•   Nebaa bessiyaagaadan xeella. Geeshsha Maxaafay, “ne qumaa ufaissan ma” yaagees. (Eranchchaa 9:7) Bollawu maaddiya qumaa miyoogaa giyoogee ne miyooban ufayttana danddayakka giyoogaa, woy ne miyo qumaa ubbaa xeelliyaagan hagaa moo, hagaa mooppoo gaada unˈˈettana koshshees giyoogaa gidenna. Ne leeˈanawu koyiyaaba gidikkonne ne halchchoy payyatettaa naaganaassa gidiyoogaa dogoppa. Ne oottanawu koyiyooban nebaa bessiyaagaadan xeella.

   “Taani mata wode 14 kilo gidiyaagaa laafaas, qassi hegaadan oottanawu mule namisettabeykke; issi issi qumaa qommuwaa miyoogaa woy laqilaqiyaabaa miyoogaa aggabayaas. Bollaa leeˈiyoogee issi kutti hanennaba gidiyoogaa akeekaas, qassi taani qumaa miyo meeziyaa laammana koshshiis.”—Meelaano.