Ne laggeti ubbay sooshal miidiya goˈettennan, qassi ubbatoo hegaabaa haasayennan waayi aggana. Eti ubba, neeni hegaa goˈettenna gishshawu ne bolli qilliiccennan aggokkona. Neeni hegaabaa erana koshshiyabay aybee? Qassi hegaara gayttidaagan ay oottana danddayay?

 Diggidoy ne xalaala gidakka. Daro aawatinne aayoti bantta naati sooshal miidiya goˈettennaadan diggoosona. Eti diggiyoy sooshal miidee kaallidi deˈiyabatuura gayttidaba gidiyogaa eriyo gishshaassa gidennan aggenna:

•   unˈˈettiyogaanne hara guuggiya sahuwa.

•   pornograafiya, pokkiya kiitaa woy pootuwa moobayle malaban kiittiyoogaa, qassi intternneetiyan harati qohiyogaa.

•   laggeti issoy issuwara kobattiyogaa.

 Daro yelagati sooshal miidiya goˈettiyogaa agganawu kuuyidosona. Sooshal miidee eta goˈˈiyogaappe daro baggi qohiyogaa eti banttawu akeekidosona. Deˈuwan hanida, kaallidi deˈiyabata akeeka:

•   Prisiila, hegee A loˈˈobawu goˈettana danddayiyo wodiya coo wurssiyogaa akeekaasu.

•   Jeremi, hegan yiya iitabaa teqqana danddayibeenna gishshawu sooshal miidiya dosibeenna.

•   Biitaniya, hegee A harati oottiyobaa daro wodiyawu qoppanaadan oottiyogaa akeekaasu.

 “Taani sooshal miidiya appilikeeshiniya xayssanawu kuuyaas, qassi xayssidoogan keehi ufayttaas. Tumuppe ayssi xayssidanaashsha giikke, taassi keehi koshshiyabaa oottanawu daro wodiya demmaas.”—Siyeero.

 “Sooshal miidee amale gidiyogaanne taani sooshal miidiyan wottiyobaa asay woyganeeshsha gaada hirggiyogaa dosabeykke. He appilikeeshiniya xayssanawu metootaas, shin taani yaatido wode sohuwara woppu gaas. A xayssada daro saruwa demmaas.”—Kaato.

 Nena yelidaageeti yootiyobaa siya. Yiillotennan woy amassalennan eti yootiyobaa siyiyogan neeni wozannaama gidiyogaa bessa.

 Geeshsha Maxaafaa maaraa: “Eeyya asi ba hanqquwaa yeddi bessees; shin aadhdhida era asi ba hanqquwaa mittees.”—Leemiso 29:11.

 Issoti issoti, nena yelidaageetuppe qosettada, woy sunttaa laammada sooshal miidiya goˈettanaadan zorana dandayoosona. Hegaadan oottiyogee bala! Qosan oottiyobay neeni unˈˈettanaadaaninne nena mooranchchadan xeellanaadan oottees. Qassi eti hegaa erikko nena ammanettennan aggana.

 Geeshsha Maxaafaa maaraa: “Nuuni ubba wode lo77obaa oottanau [koyoos.]”—Ibraawe 13:18.

 Hegaa agganawu kuuya. Qommoora beˈido yelagatuugaadan, sooshal miidiya goˈettiyogaa agganaadan oottiya darobaa qoppana danddayaasa. Sooshal miidiya goˈettiyogee neessi loˈˈo gidennaagaa erikko, hegaa agga baya; nena yelidaageeti kuuyidoba gidiyo gishshataassa gidennan, neeni kuuyido gishshawu hegaadan ootta. Yaatidoogan ne laggeti nena oychchiyo wode yeellatakka, qassi eti nena qilliiccennan aggana danddayoosona.

 Keehi koshshiyabay, nena yelidaageeti giyobaa siya, eti kuuyidobay likke gidiyogaa neeni maayettanaadan oottiyabaa akeeka. Haˈˈissawu sooshal miidiya goˈettennan deˈana danddayaasa.