Geeshsha Maxaafay Zaarettidi Yelettiyoogaabaa Tamaarissii?
Geeshsha Maxaafay yootiyoobaa
Akkay, tamaarissenna. Geeshsha Maxaafan “zaaretti yelettiyoogaa” giya qaali woy hegaa mala qofay baawa. Ha ammanuwawu baasoy shemppoy hayqqenna giyo timirtte. a SHin Geeshsha Maxaafay issi asi muleera shemppo gidiyoogaanne I hayqqiyoogaa tamaarissees. (Doomettaabaa 2:7; Hizqqeela 18:4) Issi uri hayqqiyo wode deˈuwan deˈenna.—Doomettaabaa 3:19; Eranchchaa 9:5, 6.
Zaaretti yelettiyoogaanne dendduwaa giddon deˈiya dummatettay aybee?
Geeshsha Maxaafay tamaarissiyo dendduwawu baasoy shemppoy hayqqenna giyo qofa gidenna. Dendduwan, hayqqida asay Xoossaa wolqqan zaarettidi paxa gidana. (Maatiyoosa 22:23, 29; Oosuwaa 24:15) Denddoy zaarettidi mule hayqqennaagaa qoppiiddi, ooratta alamiyan deˈanawu hidootanaadan oottees.—2 PHeexiroosa 3:13; Ajjuutaa 21:3, 4.
Zaaretti yelettiyoogaanne Geeshsha Maxaafay yootiyoobaa xeelliyaagan asay qoppiyo balabaa
Bala qofaa: Geeshsha Maxaafay Eelaasi Xammaqiya Yohaannisa gididi zaaretti yelettidoogaa yootees.
Tumaa: Xoossay, “Taani inttessi hananabaa yootiya Eelaasa kiittana” yaagidi kaseti yootiis; qassi Yesuusi he hiraagay Xammaqiya Yohaannisan polettidoogaa yootiis. (Milkkiyaasa 4:5, 6; Maatiyoosa 11:13, 14) SHin hegee Eelaasi Xammaqiya Yohaannisa gididi zaaretti yelettiis giyoogaa gidenna. Yohaannisi ba huuphe I Eelaasa gidennaagaa yootiis. (Yohaannisa 1:21) SHin Yohaannisi asay ba nagaraappe simmanaadan yootiyoogan, Eelaasaagaa mala oosuwaa oottiis. (1 Kawotu 18:36, 37; Maatiyoosa 3:1) Yohaannisi hananabaa yootiya “Eelaasa ayyaanaaninne wolqqan” oottidoogaakka bessiis.—Luqaasa 1:13-17.
Bala qofaa: Geeshsha Maxaafay zaarettidi yelettiyoogaa “naaˈˈantto yelettiyoogaa” gees.
Tumaa: Geeshsha Maxaafay naaˈˈantto yelettiyoogee issi asi paxa deˈiiddi ayyaanaaban zaaretti yelettiyo hanota gidiyoogaa yootees. (Yohaannisa 1:12, 13) Ha naaˈˈantto yeletay issi asi kase oottido iitabaa woy loˈˈobaa gaasuwan demmiyo attenna deˈo gidennan, Xoossaa anjjuwan amarida asay sinttappe demmiyo dumma deˈo.—Yohaannisa 3:3; 1 PHeexiroosa 1:3, 4.
a SHemppoy hayqqennabadan, qassi zaaretti yelettiyaabadan ammaniyoogee beni Baabilooneppe yiidaba gidana danddayees. Guyyeppe Hindde eranchchati Karma giyo timirttiyaa kessin issi ammanoy doomettiis. Britanika Insaykilopidiya of World Rilijins giyo maxaafay Karmi “gaasuwaanne ayfiyaa higge; issi uri haˈˈi deˈuwan oottiyoobay kaalliya deˈuwan I ay mala gidanaakko bessees.”—Sinttaa 913.
Hageeta Beˈadii?
GEESHSHA MAXAAFAABAA OYCHCHIYOOBATU ZAARUWAA
SHemppoy Aybee?
Hegee ne giddon deˈiyaabee? Neeni hayqqa simminkka paxa deˈana danddayiyaabee?
GEESHSHA MAXAAFAABAA OYCHCHIYOOBATU ZAARUWAA
Denddoy Aybee?
Ooni hayquwaappe denddanaakko neeni eriyo wode garamettennan aggakka.
GEESHSHA MAXAAFAA TIMIRTTETA
Geeshsha Maxaafaa xannaˈiyo prograamiyaa
Issi uraara Geeshsha Maxaafaa xannaˈa.