“Yihoowan ufaytta; I neeyyo ne wozanaa amuwaa immana.”—Mazamure 37:4, Ooratta Alamiya Birshshettaa.

 “Godan ufaytta, qassi I neeyyo ne wozanaa amuwa immana.”—Mazamure 37:4, Inglish Isttandard Vershine.

 Mazamuraawee Xoossawu goynniyageeti Aara mino dabbotaa medhdhiyogan ufayttanaadan minttettiis. Aara hegaa mala mino dabbotettaa medhdhiyageeti Yihooway a etawu bessiya koshshaa kunttanaagaa ammanettana danddayoosona.

 ‘Yihoowan ufaytta.’ Ha guussay “Yihoowan keehi ufaytta,” “Godawu haggaaziyogan ufaytta,” woy “Goday neeyyo immana giido hidootan ufaytta” geetettanakka danddayees. Qanttan, nuuni tumu Xoossawu goynniyogan “gita ufayssaa” demmana geetettana danddayees. (Mazamure 37:4) Hegaadan giyoy aybissee?

 Yihoowawu goynniyageeti hanotata I Geeshsha Maxaafan qonccissidoogaadan xeelliyo gishshataassa. Eti Xoossaa eriyogaa xalla gidennan ayyo azazettiyogee aadhdhida eratetta gidiyogaakka eroosona. Hegaappe denddidaagan, etawu loˈˈo kahay deˈees; qassi eti daro balaa oottiyogaappenne iitabaa kuuyiyogaappe naagettidosona. (Leemiso 3:5, 6) Leemisuwawu, yaaretiya woy ammanettenna asatuyyo injjetidaba milatiyo wode eti yiillotidi woy qanaatidi bantta saruwa xayssokkona. (Mazamure 37:1, 7-9) Xoossay matan naaqo ubbaa xayssanaagaanne loˈˈo eeshshay deˈiyo ammanettida asata woytanaagaa Xoossaa asay eriyo gishshawu ufayttees. (Mazamure 37:34) Saluwan deˈiya eta Aaway eta nashshiyogaa eriyo gishshawukka keehi ufayttoosona.—Mazamure 5:12; Leemiso 27:11.

 “I neeyyo ne wozanaa amuwaa immana.” Ha qofay “I ne woosaa zaarana” woy “neeni keehi koyiyobaa I neeyyo immana” geetettidikka birshshettana danddayees. Yihooway nuuni oychchiyo ubbabaa immees giyogaa gidenna. Issi keha aawaagaadan, Yihooway ba naatussi keehi loˈˈobi aybakko erees. Hegaa bollikka, nuuni oychchiyobaynne nu deˈoy, I kessido maaraaranne A sheniyara maayettana koshshees. (Leemiso 28:9; Yaaqooba 4:3; 1 Yohaannisa 5:14) Nuuni hegaadan oottikko, ‘woosaa siyiyagee’ nu woosaa siyanaagaa ammanettidi A woossana danddayoos.—Mazamure 65:2; Maatiyoosa 21:22.

 Mazamure 37 xaafiday beni Israaˈeela Kawuwa Daawita. I he mazamuriya machchallaa kasiya kaaluwan xaafiis. b

 Daawita daro naaqoy gakkiis. Kawuwa Saaˈoolinne A woranawu koyiya harati A shankkatidosona. (2 Sameela 22:1) Shin, Daawiti ba Xoossan ubbatookka wozanappe ammanettiis. Yihooway sinttappe iitata qaxxayanaagaa Daawiti erees. (Mazamure 37:10, 11) Aaca “maataadan” etawu injjetidaba milatikkokka sinttappe eti xayanaagee attenna.—Mazamure 37:2, 20, 35, 36.

 Mazamure 37y Xoossay kessido maarawu azazettiyageeti demmanabaanne azazettennaageetu bolli gakkanabaa geeddarssidi qonccissees. (Mazamure 37:16, 17, 21, 22, 27, 28) Yaatiyo gishshawu, ha mazamuree nuuni aadhdhida eratettaa demmanaadaaninne Xoossay nashshiyo asa gidanaadan nuna maaddees.

 Mazamure maxaafaa erissiya ha qantta biiduwa beˈa.