Kha nyambo dze Bivhili ya ṅwalwa ngadzo, Hele kana “Sheol” na “Hades” ndi vhiḓa ḽo ḓoweleaho, hu si fhethu hune vhathu vha shengedzwa hone nga u fhiswa nga mulilo. Ndi vhonnyi vhane vha ya heleni? Ndi vhavhi na vhavhuya. (Yobo 14:13; Phisalema 9:17) Bivhili i ri ḽeneḽi vhiḓa ḽo ḓoweleaho ndi nnḓu “ine vhoṱhe vha tshilaho vha ḓo ṱangana khayo.”​—Yobo 30:23.

 Na Yesu o ya heleni musi a tshi fa. Fhedzi ho ngo “litshwa heleni,” ngauri Mudzimu o mu vusa.​—Mishumo 2:31, 32, The Bible in Basic English.

Naa vha re heleni vha nga vuswa?

 Mudzimu u ḓo ṋea Yesu maanḓa a u vusa vhoṱhe vha re heleni. (Yohane 5:28, 29; Mishumo 24:15) Nzumbululo 20:13 i tshi amba nga ha yeneyo mvuwo, yo ri: “Lufu na Hele zwi ḓo bvisa vhafu vha re khazwo.” (King James Version) Musi vhoṱhe vha re heleni vho no vuswa, hele a i tsha ḓo vha hone ngauri “lufu a lu tsha ḓo vha hone.”​—Nzumbululo 21:3, 4; 20:14.

 Fhedzi a zwi ambi uri muṅwe na muṅwe ane a lovha u ya heleni. Bivhili i sumbedza uri vhaṅwe vhathu ndi vhavhi lune vha nga si tsha shanduka. (Vhahevheru 10:26, 27) Vhenevho vhathu vha sa shanduki a vha yi heleni musi vha tshi lovha, vha ya Gehenna, hune ha fanyisela u fheliswa lwa tshoṱhe. (Mateo 5:29, 30) Sa tsumbo, Yesu o sumbedza uri vhaṅwe vharangaphaḓa vha vhurereli vhane vha vha vhadzia muhoyo vha ḓo ya Gehenna musi vha tshi lovha.​—Mateo 23:27-33.