Evangeli Ya Mateo 23:1-39
23 Ndi hone Yesu a tshi amba na gogo na vhafunziwa vhawe, a ri:
2 “Vhamaṅwalo na Vhafarisei vho ḓivhea vhuimoni ha Mushe.
3 Zwoṱhe zwine vha ni vhudza, ni zwi tevhedze, fhedzi ni songo vha edzisa, ngauri vha a amba, fhedzi vha si ite zwe vha amba.+
4 Vha vhofha mihwalo i lemelaho vha i hwesa kha mahaḓa a vhathu,+ ngeno vhone vha sa ṱoḓi na u i takula nga munwe wavho.+
5 Zwoṱhe zwine vha zwi ita, vha zwi itela u vhonwa nga vhathu,+ vha vhofhelela zwibogisi* zwihulu zwi re na maṅwalo+ na u ambara zwiambaro zwi re na mashaphu malapfu.+
6 Vha funa u dzula zwiduloni zwo vhetshelwaho vhaeni vha vhuimo ha nṱha zwimimani, na u dzula zwiduloni zwa phanḓa sinagogoni,+
7 na u lumeliswa mimakete na u vhidzwa Rabi.*
8 Fhedzi inwi ni songo tenda u vhidzwa Rabi, ngauri Mufunzi+ waṋu ndi muthihi, inwi noṱhe ni vharathu na vhakomana.
9 Zwiṅwe hafhu, ni songo vhidza muthu na muthihi kha ḽifhasi na ri ndi khotsi, ngauri Khotsi+ aṋu ndi muthihi fhedzi, ndi Wa ṱaḓulu.
10 Ni songo tenda u vhidzwa vharangaphanḓa ngauri Murangaphanḓa waṋu ndi muthihi, ndi Kristo.
11 Fhedzi ane a vha muhulwane kha inwi a vhe mushumeli waṋu.+
12 Ane a ḓihudza u ḓo ṱukufhadzwa,+ ane a ḓiṱukufhadza u ḓo huliswa.+
13 “Khombo inwi vhamaṅwalo na Vhafarisei, inwi vha re na muhoyo! Ngauri ni thivhela vhathu uri vha si dzhene Muvhusoni wa ṱaḓulu; ngauri inwi a ni dzheni, ni thivhela na vhane vha ṱoḓa u dzhena.+
14 * ——
15 “Khombo inwi vhamaṅwalo na Vhafarisei, inwi vha re na muhoyo!+ Ngauri ni pfukekanya lwanzhe na mashango ni tshi ṱoḓa ane na nga mu rembulusela kha vhurereli ha Tshiyuda, musi o no rembuluwa, ni mu ita uri a fanelee u ya Gehena* u ni fhira.
16 “Khombo inwi vhane na sumbedza nḓila ngeno ni sa vhoni,+ na amba uri, ‘Arali muthu a ana nga thembele, a zwo ngo khakhea, fhedzi arali muthu a ana nga musuku wa thembeleni, u fanela u ita zwe a ana.’+
17 Inwi matsilu a sa vhoni! Ndi zwifhio zwa ndeme, naa ndi musuku kana ndi thembele ye ya ita uri musuku u vhe mukhethwa?
18 Ni dovha na ri, ‘Arali muthu a ana nga aḽeṱare, a zwo ngo khakhea, fhedzi arali a ana nga tshifhiwa tshi re khayo, u fanela u ita zwe a ana.’
19 Inwi vha sa vhoni! Ndi zwifhio zwa ndeme, naa ndi tshifhiwa kana ndi aḽeṱare ine ya ita uri tshifhiwa tshi vhe tshikhethwa?
20 Ngauralo, ane a ana nga aḽeṱare u ana ngayo na nga zwoṱhe zwi re khayo;
21 na ane a ana nga thembele u ana ngayo na nga Ane a dzula khayo;+
22 na ane a ana nga ḽiṱaḓulu u ana nga khuluṋoni ya Mudzimu na nga Ane a dzula khayo.
23 “Khombo kha inwi vhamaṅwalo na Vhafarisei, inwi vha re na muhoyo! Ngauri ni bvisa tshafumi kha minthi, dili na khumini,*+ na nyadza mafhungo a ndeme a Mulayo a ngaho u haṱula nga nḓila yo teaho,+ u khathutshela+ na u fhulufhedzea. Zwo vha zwo tea uri ni bvise tshafumi kha zwenezwo zwithu, fhedzi ni songo fanela u nyadza mafhungo a ndeme a Mulayo.+
24 Inwi vhane na sumbedza nḓila ngeno ni sa vhoni,+ ni bvisa lunyunyu,+ fhedzi na mila gamela!+
25 “Khombo inwi vhamaṅwalo na Vhafarisei, inwi vha re na muhoyo! Ngauri ni nga tshinwelo na ndilo zwo ṱanzwiwaho nga nnḓa,+ ngeno ngomu no ḓala tseḓa*+ na u ḓitakadza nga ho kalulaho.+
26 Inwi Vhafarisei vha sa vhoni, thomani ni ṱanzwe tshinwelo na ndilo nga ngomu, uri zwi kune na nga nnḓa.
27 “Khombo inwi vhamaṅwalo na Vhafarisei, inwi vha re na muhoyo!+ Ngauri ni fana na mavhiḓa o nakiswaho,+ o nakaho nga nnḓa ngeno nga ngomu ho ḓala marambo a vho faho na tshika dzoṱhe.
28 Na inwi ni vhonala no luga phanḓa ha vhathu, fhedzi nga ngomu no ḓala muhoyo na vhuvhi.+
29 “Khombo inwi vhamaṅwalo na Vhafarisei, inwi vha re na muhoyo!+ Ngauri ni vusulusa mavhiḓa a vhaporofita na nakisa mavhiḓa a vhavhuya,+
30 na ri, ‘Arali ri vhe ro tshila misini ya vhomakhulukuku washu, ndi musi ri songo vha thusa u vhulaya vhaporofita.’
31 Ngauralo, ni khou khwaṱhisedza uri ni vharwa vha vho vhulayaho vhaporofita.+
32 Fhedzisani zwe vhomakhulukuku waṋu vha zwi thoma.
33 “Inwi dziṋowa, inwi vhana vha mavuluvulu,+ ni ḓo ponyoka hani khaṱhulo ya Gehena?*+
34 Ndi ngazwo ndi tshi khou ni rumela vhaporofita+ na vhanna vha vhuṱali na vhafunzi.+ Vhaṅwe vhavho ni ḓo vha vhulaya+ na vha ombela kha danda, vhaṅwe vhavho na vha rwa+ sinagogoni dzaṋu na vha tovhola+ u bva kha muṅwe muḓi u ya kha muṅwe,
35 uri ni vhilwe malofha oṱhe a vhavhuya o shululwaho kha ḽifhasi, u bva kha a Abele+ u swika kha a Sakaria murwa wa Barakia, we na mu vhulaya vhukati ha nnḓu khethwa na aḽeṱare.+
36 Ngoho ndi a ni vhudza uri, zwenezwi zwoṱhe zwi ḓo ḓela wonoyu murafho.
37 “Hee Yerusalema, iwe Yerusalema, iwe muvhulayi wa vhaporofita na ane a kanḓa nga matombo vho rumiwaho kha iwe,+ ndi kale ndi tshi ṱoḓa u kuvhanganya vhana vhau sa khuhu i tshi kuvhanganya zwikukwana zwayo fhasi ha phapha dzayo! Fhedzi iwe wa hana.+
38 Mudzimu o ṱutshela nnḓu yau.+
39 Ngauri ndi a ni vhudza ndi ri, a ni tsha ḓo dovha na mmbona u bva zwino u swika ni tshi ri, ‘Nga hu fhaṱutshedzwe a ḓaho nga dzina ḽa Yehova!’”*+
Ṱhaluso dzi re magumoni a siaṱari
^ Ndi zwibogisi zwiṱuku zwi re na maṅwalo. Vhanna vha Vhayuda vho vha vha tshi zwi vhofhelela u itela u ḓitsireledza.
^ Kana “Mufunzi.”
^ Sedzani Mutevhe Wa Ṱhalutshedzo Ya Maipfi.
^ Minthi, dili na khumini ndi zwimela zwine zwa ḓifhisa zwiḽiwa.
^ Kana “vhupangwa.”
^ Sedzani Mutevhe Wa Ṱhalutshedzo Ya Maipfi.
